"Bizim Cəbiş müəllim"in həyat yoldaşı 67 yaşında...

"Həyatda improvizasiya böyük fikirdir. İstər sənətdə, istərsə də ad günü keçirməkdə"

O, yaradıcılığı daxili ehtirası, çılğın romantik pafosu, həssas lirizmi, səhnə hərarəti ilə seçilən sənətkarlardandır. Teatr və kino tariximizdə çılğın, təkrarsız obrazlar ifa edən, səhnəmizin "Sofi Loreni", uzun müddətdir müsahibələrdən boyun qaçırır.

Söhbət Azərbaycanın Xalq artisti Şəfiqə Məmmədovadan gedir. Bu gün səhnəmizin gözəl xanımının doğum günüdür. Şəfiqə Məmmədova Azərbaycan səhnəsində 20 ildir mətbuata qapalı olan yeganə sənətkardır. Xalq artisti bir müddət öncə saytlardan birinə elə ad günü ərəfəsində verdiyi qısa açıqlamada qeyd etdiyi bir ad gününün o birisinə oxşamadığını bildirib. Əlavə edib ki, o heç vaxt doğum günü üçün nəyisə planlaşdırmayıb: "Doğum günümü improvizə şəkildə qeyd edirəm. Planlaşdırmıram. Amma çox qəşəng olur. Ümumiyyətlə, həyatda improvizasiya böyük fikirdir. İstər sənətdə, istər ad günü keçirməkdə".

Son dövrlərdə heç bir filmə çəkilməyən sənətkar özünə uyğun obraz olmadığını deyir. Bunun səbəbini ssenaristlərdə görür. "Uyğun deyil mənə. Heç bir ssenarini özümə aid görmürəm. Yaratdığım elə bir iş yoxdur. Bilirsiz mən elə öz dövrümdə də istəyirdim çəkilirdim, istəmirdim çəkilmirdim. Məndə seçim həmişə olub".

Şəfiqə Məmmədova Teatr İnstitutunun Musiqili Komediya aktyorluğu fakültəsini bitirib. Milli Dram Teatrının səhnəsində "Hamlet", "Nakam qız", "Canlı meyit", "Ana torpağı", "Xəyyam"::, "Dəli yığıncağı", "Məkr və məhəbbət", "Qızıl" faciəsində, "Bağlardan gələn səs", "Mənim günahım", "Məhv olmuş gündəliklər", Bəxtiyar Vahabzadənin "Yağışdan sonra", "Meşşanlar", "Aydın" kimi tamaşalarda maraqlı obrazlar ifa edib. Kino aktrisa kimi də özünü sınamaq qərarına gələn Şəfiqə Məmmədova tamaşaçı yaddaşında elə filmlərdəki rolları ilə dərin iz buraxıb. "Ad günü"ndə Fəridə, "Bizim Cəbiş müəllm"də Cəbişin arvadı, "Qaaraca qız"da Pəricahan, "İstintaq"dakı Gulya rolları xarakter etibarı ilə bir-birinə bənzəsə də, "Dədə Qorqud"dakı Burla xatun onlardan fərqlənir.

Hər rolunda qadın qürurunu, ana qayğısını məharətlə göstərə bilən Şəfiqə Məmmədovanın "Qaraca qız"da oynadığı Pəricahan xanım obrazı real ifa tərzi ilə özünə nifrət qazandırır. "Bizim Cəbiş müəllim" filmində məhz bu xanımın yaratdığı qayğıkeş ana, arvad obrazı filmi daha maraqlı və yadda qalan edib.

Şəfiqə Məmmədova Xalq yazıçısı Anarın "Şəhərin yay gunləri" pyesinin tamaşasındakı Dilarə roluna görə respublika Dövlət mükafatına və Rasim Ocaqovun çəkdiyi "İstintaq" filmindəki müstəntiqin arvadı obrazına görə SSRİ Dövlət mükafatına layiq görülüb.

1 iyun 1974-cü ildə respublikanın Əməkdar artisti, 1 dekabr 1982-ci ildə Xalq artisti fəxri adları ilə təltiflənib.

Yaradıcılığının parlaq dövründə, 1980-ci ildə aktrisa ailə qayğıları ilə bağlı teatrdan uzaqlaşaraq Azərbaycan Dövlət Mədəniyyət və İncəsənət Universitetində (keçmiş Teatr İnstitutu) pedaqoji fəaliyyətə başlayıb.

1995 - 2000-ci illərdə Azərbaycan Respublikası Milli Məclisinin deputatı olub.

Qeyd edək ki, aktrisamız 30 mart 1945-ci ildə qədim Azərbaycan şəhəri, hazırda Dağıstan Muxtar Respublikasının nəzdindəki Dərbənd şəhərində doğulub. O, aktyor Məmməd Məmmədovun bacısı, aktyor Ülvi Mehdinin anasıdır və teatr rejissoru Mehdi Məmmədovun həyat yoldaşı olub.

Nigar İxtiyarqızı

Həftə içi.- 2012.- 31 mart-2 aprel.- S. 15.