"Yuxumu sulara söylə..."

Çağdaş ədəbiyyatımızda qadın şairləri arasında Gülayə öz dəsti-xətti ilə seçilir. Onun özünəməxsus yaradıcılığı, poeziya nümunələri var. Şeirləri təkcə Azərbaycanda deyil, qardaş Türkiyədə də sevilə-sevilə oxunur.

Gülayənin bu yaxınlarda işıq izü görən "Yuxumu sulara söylə" kitabı tanınmış şairin həyat və zaman, ilahi məhəbbət haqqında yazdığı şeirlər əsas yer alıb. Kitab haqqında xalq şairi Fikrət Qoca, millət vəkili, Atatürk Mərkəzinin rəhbəri, professor Nizami Cəfərov, görkəmli türk yazıçısı Bülənt Bakilər öz fikirlərini söyləyiblər. Kitabın ön sözündə Azərbaycan- Türkiyə dostluq münasibətinin genişlənməsində Gülayə kimi şairlərin böyük xidmətlərinə ümid bəslənildiyi vurğulanır: "Gülayə yazıb yaratdığı şeirləri ilə Türkiyədə keçirilən şeir yarışmasında birincilik qazanmaqla bərabər, həm də "Cümhuriyyət" qızıl medalına layiq görülmüşdür. Onun yaradıcılığında əsasını klassik şeirimizin və qədim türk folklorunun zəngin ənənələri təşkil edir".

Sərvaz Hüseynoğlunun redaktorluğu ilə çap olunan bu kitabı oxuduqca müəllifin çox bir yazar olduğu sezilir. Şairə xanım incə hissləri ilə sözə elə yanaşır ki, sözün ruhu da incimir, hər bir kəlməsi könülləri oxşayır. Onun şeirləri əsrarəngiz gül və çiçəklər kimi təbiidir. Bu təbiilik və gözəllik bir şair kimi Gülayənin ülvi sevgisindən irəli gəlir.

Onu da qeyd edək ki, Gülayə yaradıcılığının müsbət cəhətlərindən biri də onun zaman şairi olmamasıdır. Onun hər bir şeirində bir hormaniya, lirika, estetik bir gözəllik var. Şeirlərindən də göründüyü kimi, o, həmişə axtarışdadır. Yeni fikir, yeni obraz axtarmağa çalışır. İllər ötsə də, Gülayənin şeirləri bahar çiçəkləri kimi ətirli və təravətli qalacaq.

Gülayənin poeziyası gənclərin ruhuna daha çox yaxındır. Görünür, elə bu səbəbdəndir ki, onun şeirlərinin əsas oxucuları da məhz gənclərdir.

Qələndər Xaçınçaylı

Həftə içi.- 2012.- 11 may.-S.7.