Bu gün 9 May Qələbə Günüdür

Bununla bağlı 28 mindən çox müharibə veteranına birdəfəlik yardım verilib

Bu gün İkinci Dünya müharibəsində faşizm üzərində Qələbədən 67 il keçir. Bəşər tarixində ən dəhşətli bu müharibədə möhtəşəm Qələbənin əldə olunmasına Azərbaycan xalqı da böyük töhfələr verib.

Qeyd edək ki, Böyük Vətən müharibəsində Azərbaycandan 640 mindən çox insan cəbhəyə yola salınıb və onların təxminən yarısı döyüşlərdə həlak olub. Eyni zamanda, döyüşlərdə göstərdikləri igidliyə görə ölkəmizin 130-dan çox vətəndaşı Sovet İttifaqı Qəhrəmanı adına layiq görülüb, 170 mindən çox əsgər və zabitimiz müxtəlif orden, medallarla təltif edilib. Bundan başqa, Azərbaycanda təşkil olunmuş diviziyalar Qafqazdan Berlinədən şanlı döyüş yolu keçib, yüzlərlə həmyerlimiz isə partizan dəstələrinin tərkibində vuruşub. Azərbaycanlı çağırışçı və könüllülərdən formalaşdırılmış 77-ci, 223-cü, 336-cı, 402-ci və 416-cı milli atıcı diviziyalar döyüşlərdə misilsiz igidlik və şücaət göstərərək adlarını tarixə qızıl hərflərlə yazıblar.

Bəs görəsən, bu gün Azərbaycanda veteranlara göstərilən qayğı hansı səviyyədədir? Veteranlar onlara göstərilən diqqəti qənaətbəxş sayırlarmı?

Bakı Veteranlar Şurasının sədri Məmməd Qarayev "Həftə içi"nə açıqlamasında dövlət tərəfindən veteranlara göstərilən qayğıdan razı olduğunu deyir. Onun sözlərinə görə, mərhum prezident Heydər Əliyev Naxçıvandan Bakıya gələndən sonra müharibə veteranlarına qayğı daha da artdı: "Ona görə də biz veteranlar 9 may qələbə bayramı ərəfəsində Heydər Əliyevin məzarını ziyarət etməyi özümüzə borc bildik".

O bildirir ki, prezident İlham Əliyevin bu günlərdə imzaladığı "1941-1945-ci illər Böyük Vətən müharibəsi iştirakçılarına, həlak olmuş və sonradan vəfat etmiş döyüşçülərin dul arvadlarına, arxa cəbhədə fədakar əməyinə görə orden və medallarla təltif edilmiş şəxslərə birdəfəlik maddi yardımın verilməsi barədə" sərəncamı veteranların böyük sevincinə səbəb olub: "Düzdür, bu artıq ənənə halına çevrilib. Biz veteranlar ölkə başçımızın qayğısından razıyıq. Hər il 9 mayda ölkə başçısı Sovet İttifaqı Qəhrəmanı Həzi Aslanovun abidəsi yaxınlığında bizimlə görüşür, problemlərimizlə, qayğılarımızla maraqlanır. Bu bizi daha da ruhlandırır".

Müharibə xatirələrinə də toxunan Məmməd Qarayev deyir ki, o, 18-ci ehtiyat alayının tərkibində Smolensk vilayətinin hitlerçilərdən azad edilməsində yaxından iştirak edib: "Bundan başqa, Leninqrad uğrunda gedən döyüşlərdə də fəal iştirak etmişəm. Sonradan ağır yaralandım. İndi o illəri ancaq xatirələrdə yaşadırıq və mayın 9-da biz veteranlar bir yerə toplaşaraq xatirələrimizi bölüşürük".

Həmsöhbətimiz vurğulayır ki, hazırda sədri olduğu Bakı Veteranlar Şurasının Bakının 11 rayonunda şöbəsi fəaliyyət göstərir: "Hər şöbənin də çoxlu veteranı var. Ümumilikdə isə Veteranlar Şurası 324 təşkilatı, 90 minə yaxın veteranı öz ətrafında birləşdirir. Onların arasında 1152 müharibə veteranının adı var".

Digər veteran həmsöhbətimiz Camal Qəhrəmanov da dövlətin veteranlara göstərdiyi qayğını yüksək qiymətləndirir. Onun sözlərinə görə, Azərbaycanda veteranlar böyük qayğı ilə əhatə olunublar: "Böyük Vətən müharibəsində mən arxa cəbhədə işləmişəm. O dövrdə gecəmiz-gündüzümüz yox idi. Bütün günü işləyirdik. Çünki arxa cəbhədə yaxşı işləməsəydik, ön cəbhədə uğurlu əməliyyatlar aparıla bilməzdi. İndi o illəri xatırlayanda qazandıqlarımız üçün sevinsək də, itirdiklərimizə görə çox təəssüflənirik. Amma dövlətin göstərdiyi qayğı bizə daima ruh verir, həyata daha möhkəm bağlanırıq".

Dövlət Sosial Müdafiə Fondu (DSMF) Böyük Vətən müharibəsinin iştirakçılarına birdəfəlik maddi yardımların verilməsi məqsədilə ümumilikdə 6,645 milyon manat məbləğində ödəniş edib. DSMF sədri Səlim Müslümov jurnalistlərə açıqlamasında bildirib ki, 28 968 nəfərin hesabına köçürülməsi nəzərdə tutulan 7,5 milyon manatdan 6,645 milyon manatı artıq ödənilib. Qalan vəsait 854,5 min manat təşkil edir. Həmin məbləğ şəxslərin müraciətlərinin təmin edilməsindən asılı olaraq ödəniləcək. Onun sözlərinə görə, hər biri 500 manat məbləğində birdəfəlik maddi yardım alan şəxslərin ümumi sayı 2739 nəfərdir, qalan 26 229 nəfər isə 200 manat yardım alır.

Yeri gəlmişkən, 1941-1945-ci illər müharibəsi iştirakçılarına dövlət tərəfindən verilən birdəfəlik maddi yardımların ən yüksək məbləği Azərbaycanda qeydə alınıb. Məsələn, Qazaxıstanda bu məbləğ Azərbaycan manatı ilə götürsək, təxminən 357 manat, Ukraynada 100 manat, Belarusda 135 manat, Rusiyada 138 manat və s. təşkil edib.

Sevinc

Həftə içi.- 2012.- 9-10 may.- S.6.