"Səmavi-şəms"lə parlayan ulduz

2005-ci il Muğam Müsabiqəsi onu Azərbaycanda xeyli dərəcədə məşhurlaşdırdı. Əsl Qarabağ xanımlarına xas mədəni davranışları, gözəlliyi və ən əsası məlahətli səsilə milyonların ürəyinə yol tapdı. Gənc olmasına baxmayaraq, "Kəsmə şikəstə"si ilə yanmış ürəklərə sanki su çilədi, ruhları yerindən oynatdı. Sanki bir anlıq özümüzü özümüzdən ayırıb saflaşdıra-saflaşdıra Qarabağa, ermənilərin tapdağı altında inildəyən doğma torpaqlara, dədə-baba yurduna aparır.

Beləliklə, "Seçilənlər" rubrikasında bu dəfə həmsöhbətimiz 2005-ci il Muğam Müsabiqəsinin iştirakçısı Oksana Aslanovadır. Müsahibimiz söhbəti öz həyatından, ilk sənət müəllimindən başlayaraq Belarusiyada doğulduğunu deyir. Yeddi yaşında ailəsi ilə birlikdə Ağdam şəhərinə köçüb. Ağdam 7 saylı rus təmayüllü orta məktəbdə oxuyub: "İki il Ağdamda yaşadıq. Tanrı bu müqəddəs şəhəri mənə çox gördü. Hələ 9 yaşımda Ağdam şəhəri işğal olundu. Ailəmiz Tərtərin Hüsənli kəndinə gəlib uşaq bağçasında məskunlaşdı. Ağdamda ikimərtəbəli ağ daşdan hörülmüş evimiz var idi. Həmin evlər Bakıda indi-indi tikilir".

Oksana xanım söyləyir ki, hələ Belarusiyada yaşayarkən həmyaşıdları arasında muğama meyilliliyi, ecazkar səsi ilə fərqlənib. Dediyini görə, elə o vaxtdan qeyri-ixtiyari hərdən öz dünyasına qapılar, musiqi, xüsusən də muğam dinləyərmiş: "Anamın gözəl səsi olub. Ona görə də çəkinmədən hisslərimi, muğama meyilli olduğumu anama söylədim. Anam səsimin olduğunu biləndə mənə xalq və bəstəkar mahnıları öyrətməyə başladı. Sonradan Tərtərin Hüsənli kənd orta məktəbinin bütün tədbirlərinə məni dəvət edərdilər".

Konservatoriyadan universitetə, universitetdən səhnəyə

Ozünü musiqi, muğam sənətinin bir parçası kimi hiss edən müsahibimiz gələcək karyerasını da bu istiqamətdə qurmağa başlayır. Bunun üçün 2000-ci ildə orta məktəbi bitirən kimi sənədlərini Milli Konservatoriyaya vermək istəyib. Amma valideynləri musiqiyə böyük maraq göstərsələr də, buna razı olmayıb. Buna görə də qəbul imtahanlarında Azərbaycan Dövlət İqtisad Universitetini seçmək məcburiyyətində qalıb: "Universitetdə oxuyanda "28 may" Mədəniyyət Evində kompyuter kursuna da gedirdim. Kompyuter kursuna mənimlə birgə gedən qızlardan biri Mədəniyyət Evində səs kursunda təhsil aldığını dedi. Həmin qızla Mədəniyyət Evinin direktoru Fərhad Hüseynovun yanına getdik. Gəlişimizin səbəbini ona bildirdik. Fərhad müəllim pianinonun arxasına keçib qızın səsini yoxlamağa başladı. Amma qızın səsi pərdəyə düşmürdü. Özümdən asılı olmayaraq, qızın yerinə oxumağa başladım. Bunu görən Fərhad müəllimi sanki yuxudan oyanmış kimi təəccüb götürdü. Çünki neçə müddətdir kompyuter kursuna gəlirəm, amma o bilmirdi ki, mənim səsim var. Tez ayağa qalxıb məni muğam dərnəyinin rəhbəri, tanınmış xanəndə Əlövsət Hüseynovun yanına aparıb vəziyyəti ona danışdı. Əlövsət müəllim mənim hansı bölgədən olduğumu soruşdu. "Ağdamlıyam" cavabını verəndə Əlövsət müəllimin gözləri doldu. Çox kövrəkcə "qızım, mən də ağdamlıyam" dedi.

Karyera yüksəlişinə aparan təsadüf

"28 may" Mədəniyyət Evindəki bu təsadüfi görüş Oksana Aslanovanın gələcək karyerasında və ümumiyyətlə, həyatında ciddi dönüşün əsasını qoyur. Əlövsət Hüseynov onun ifasını dinləyib bəyəndikdən sonra "sənə kömək edəcəyəm , sənin gözəl və məlahətli səsin var" deyib. Bundan sonra Oksana mütəmadi olaraq kursa gəlib Əlövsət müəllimdən muğamları öyrənməyə başlayıb: "Həmin ərəfədə eşitdim ki, "SPACE" televiziyasında Muğam Müsabiqəsi keçiriləcək. Mən də müsabiqədə iştrak etmək qərarına gəldim və bu barədə müəllimim Əlövsət Hüseynovla məsləhətləşdim. O da mənim fikrimlə razı oldu və aparıb sənədlərimi müsabiqəyə təqdim etdim".

Həmin müsabiqədə Oksana xanım münsiflər heyətində Xalq artistləri, professor Arif Babayev, Mənsum İbrahimov, Səkinə İsmayılova, Ramiz Zöhrabov, Nadir İsmayılovu daha yaxından tanıyır. Nəhayət, gənc xanəndə ilk dəfə korifey sənətçilərin qarşısında imtahan verir: "Müsabiqə gərgin keçirdi. Çünki istedadlıların istedadlısı seçilirdi. Mən "Səmayi-şəms" muğamını ifa etdim. İfam münsiflər heyətinin xoşlarına gəlsə də, bir söz demədilər. Ancaq sözləri bu oldu ki, get evə, lazım olsa, biz sizi çağıracağıq. Bir neçə gündən sonra zəng gəldi. Təsadüfən telefonu mən götürdüm. Münsiflər heyətindən dedilər ki, qızım, siz artıq müsabiqənin birinci mərhələsindən keçmisiniz. Növbəti mərhələyə gəlmək lazımdır".

Növbəti mərhələdə "Şahnaz" muğamını ifa etdərək muğam müsabiqəsinə qatılan Oksana Aslanova deyir ki, həyatında xırda bir təsadüf sənətin qapılarını beləcə onun üzünə açıb. Müsabiqədən sonra Asəf Zeynallı adına Musiqi Kollecinə daxil olaraq burada korifey sənətçimiz, muğam ustası Mənsum İbrahimovdan muğamın sirlərini öyrənib. Sonra musiqi təhsilini Milli Konservatoriyada davam etdirib: "Konservatoriyada da müəllimim Mənsum İbrahimov olub. Mən ən böyük dəstəyi müəllimim Mənsum İbrahimovdan almışam".

"Biz pulun yox,sənətin arxasınca gedirik"

Muğam ifaçısı hazırda Xan Şuşinski adına Ağdam Rayonlararası Muğam Məktəbində müəllim kimi fəaliyyət göstərir. Həm də bu məktəb Rafiq Rüstəmov, Barat Fərhadov kimi sənətkarlarla işləməyin onun üçün böyük səadət olduğunu deyir: "Bu muğam məktəbi onlarla tanınmış istedadl sənətçilər yetirib. Bu günün özündə də bu məktəbdə əsl istedadlılar oxuyur. Müsabiqədən sonra Muğam Teatrına dəvət alsam da, orada ancaq 6 ay işlədim. Vaxtaşırı televiziya kanallarında çıxışlarım olur, məni tədbirlərə dəvət edirlər. Sağ olsunlar, televiziyanın kanalları bizi unutmur, dövlət tədbirlərinə də bizi çağırırlar".

Oksana xanım muğamın, eləcə də milli musiqimizin inkişafında Heydər Əliyev Fondunun prezidenti Mehriban Əliyevanın böyük xidmətlərinin olduğunu da söyləyir. Deyir ki, bu gün də fondun bütün tədbirlərinə qatılır: "Heydər Əliyev Fondu diqqət və qayğısını bizdən əsirgəmir".

Oksana xanım deyir ki, onun ən böyük arzusu Opera Balet Dram Teatrında şıxış etməkdir. Amma bu barədə teatrın rəhbərliyinə məlumat verməyib. Hərdən el şənliklərinə, çoxsaylı toylara dəvət edildiyini deyən gənc xanəndə toylara getmir. Səbəbini isə belə izah edir: "Biz pulun yox, sənətin arxasınca gedirik. Ustadım Mənsun İbrahimov həmişə bizə belə məsləhət verib, biz böyük sənətkarlardan bunu görmüşük. Baxmayaraq ki, muğam sənətindən dərs deyirəm, müəllim işləyirəm, hələ də öyrənirəm. Özümü sənətkar gözündə görürəm, ya görmürəm, bunu ilk öncə ustadlarımız deməlidir".

Qələndər Xaçınçaylı

Həftə içi.-2012.- 15 may.- S.7