"Mədəniyyət
gündəliyi"
Azərbaycan və dünya mədəniyyəti
barədə ən yığcam ensiklopedik məlumatları əks
etdirən elektron toplu hazırlanır
Müasir dünyada gedən qloballaşma prosesində
qabaqcıl yer tutmaq istəyən ölkə özünün
iqtisadi və siyasi gücü ilə yanaşı, tarixi irsi,
mədəniyyəti, incəsənəti ilə də
tanınmalıdır. Azərbaycan xalqının zəngin
tarixi-mədəni irsi var.
Bu zənginliyin dünyaya layiqincə təqdim
olunması nəticə etibarilə ölkəmizin təbliğinə
xidmət edir. Təqdirəlayiq haldır ki, bu istiqamətdə
həm dövlət tərəfindən, həm də Prezident
yanında QHT-lərə Dövlət Dəstəyi
Şurasının maliyyə yardımı ilə vətəndaş
cəmiyyəti institutları tərəfindən müxtəlif
layihələr həyata keçirilir. Bu işləri internet
məkanında, elektron resurslar vasitəsilə daha effektli
şəkildə görmək üçün geniş
imkanlar mövcuddur.
Hər bir inteqrativ proses kimi, mədəni inteqrasiya da
birtərəfli deyil, qarşılıqlı prosesdir. Biz
öz mədəniyyətimizi, incəsənət və ədəbiyyatımızı
dünyaya tanıtmaqla yanaşı, dünya mədəniyyətini,
müxtəlif ölkələrin ədəbiyyat və incəsənət
xadimlərini, onların əsərlərini də yaxından
tanımalıyıq. Bu, son illər Azərbaycanın
aparıcı rol oynadığı mədəniyyətlərarası
dialoq prosesinə, mədəniyyətlərin
qarşılıqlı zənginləşməsinə, mədəni
mübadiləyə əlavə zəmin yaratmış olar.
Effektiv Təşəbbüslər Mərkəzinin
QHT-lərə Dövlət Dəstəyi Şurasının
maliyyə yardımı ilə həyata keçirdiyi "Mədəniyyət
gündəliyi" - elektron ensiklopedik toplu" layihəsi də
bu məqsədə xidmət edir. Toplu gündəlik xronoqraf
formatında (1 yanvardan 31 dekabradək təqvimin günləri
üzrə) və iki bölümdən - Azərbaycan və
dünya mədəniyyəti bölümündən ibarət
olacaq. Topluda əlamətdar mədəniyyət hadisələri,
ədəbiyyat, incəsənət xadimlərinin həyat və
yaradıcılığı ilə bağlı
tarixi-avtobioqrafik məlumatlar yığcam şəkildə əksini
tapacaq, məlumatlar foto-illüstrativ materiallarla müşayiət
olunacaq.
Layihə Effektiv Təşəbbüslər Mərkəzinin
QHT-lərə Dövlət Dəstəyi Şurasının
yardımı ilə həyata keçirdiyi
"www.azerbaycanli.org - milli eyniyyətdən qlobal dünyaya pəncərə:
tədqiqat və təbliğat platformu" layihəsinin
növbəti mərhələsidir. Azərbaycanın tarix və
mədəniyyəti ilə bağlı informasiya
resurslarının hazırlanmasını ehtiva edən layihə
çərçivəsində 2008-ci ildə
www.azerbaycanli.org saytı (Azərbaycan dilində)
yaradılıb, "Azərbaycan tarixi günbəgün"
kitabı hazırlanıb və nəşr edilib, 2009-cu ildə
www.azerbaycanli.org saytında yeni informasiya resursları (o
cümlədən rus və ingilis dillərində)
yaradılıb. 2010-cu ildə "Qarabağ tarixinin salnaməsi"
elektron xronoqrafı, 2011-ci ildə "Qarabağ ədəbiyyatı"
ensiklopedik xronoqrafı hazırlanıb.
"Mədəniyyət gündəliyi" - elektron
ensiklopedik toplu" ilə www.azerbaycanli.org saytında
(ayrıca link və banneri olan veb-səhifə) tanış
olmaq olar. Bu, zəngin milli mədəniyyətimiz və
dünya mədəniyyəti ilə bağlı
tarixi-avtobioqrafik məlumatları əks etdirən ən əhatəli
ensiklopedik xronoqraf (təqvim-toplu) olacaq. Elektron topludan Azərbaycanın
mədəniyyəti, incəsənəti, ədəbiyyatı,
tarixi-mədəni irsi, şair və
yazıçıları, mütəfəkkirləri, eləcə
də dünya mədəniyyəti barədə yığcam
məlumat almaq istəyən hər kəs faydalana bilər.
Pərvin İsmayılova
Həftə içi.-2012.- 23 may.- S.6.