Hər gün abadlaşan İmişli

Rayonda aparılan abadlıq və yenidənqurma işləri şəhərin görkəmini əməlli-başlı dəyişdirib

"Regionların 2009-2013-cü illərdə sosial iqtisadi inkişafı Dövlət Proqramı" digər rayonlarda olduğu kimi, İmişlidə də uğurla həyata keçirilir. Qısa bir vaxtda aparılan abadlıq və quruculuq işləri İmişli şəhərinin görkəmini xeyli dəyişib.

Ötən həftənin istirahət günləri İmişlidə olarkən öyrəndik ki, buradakı əsas yenidənqurma işləri Vilyam Hacıyevin rayon icra hakimiyyətinin başçısı təyin edilməsindən sonraya təsadüf edir. Qısa vaxt ərzində rayon mərkəzində Heydər Əliyev prospekti, 20 yanvar, M.Əzizbəyov, H.Aslanov və S.Ağamalıoğlu küçələrində yenidənqurma işləri aparılıb, küçə və prospektlərin hər iki tərəfində 3 metr hündürlüyündə divarlar çəkilib, piyada səkilərinə piltələr döşənilib. Həmçinin genişmiqyaslı təmir-tikinti tədbirləri çərçivəsində fərdi evlərin darvazaları dəyişdirilərək yenisi ilə əvəz edilib. Bütün ictimai, yaşayış və inzibati binaların, ticarət obyektlərinin dam örtükləri dəyişdirilib, divarların üzünə müasir üzlük daşlarla qoyulub. Bundan başqa, rayon mərkəzində və şəhərin ətrafında köhnə qaz xətləri polietlen borularla əvəzlənib, yollarda işıqlanma sistemi quraşdırılıb. Şəhərin şərq istiqamətində İmişli Şəkər Zavodu və qərb istiqamətində Rəsullu kənd yaxınlığında giriş qapısı inşa olunub.

İmişlinin də Bayraq Meydanı var

Rayonda olarkən öyrəndik ki, dəmiryolu vağzalında "Meydan" deyilən ərazidə sahəsi 8300 kvadratmetr, hündürlüyü 100 metr olan bayraq meydanı tikilib. Həmçinin Dəmir Yolu Vağzalının inzibati binası və vağzal meydanında hörülmüş daş hasarlar ağlay üzlük daşlarla üzlənilib, ərazidə işıqlanma sistemi quraşdırılıb. Şəhər ərazisindəki Səməd Vurğun və Nizami adına parklarda da abadlıq təmir və bərpa işləri aparılıb. Həmçinin hər iki parkın ərazisində köhnə işıq dirəkləri və yararsız tikililər sökülərək yerində müasir tələblərə cavab verən yeni obyektlər tikilib. Nizami adına parkda yerləşən İmişli şəhər inzibati ərazi dairəsi üzrə nümayəndəliyin və şəhər bələdiyyəsinin inzibati binasının, eləcə də digər binaların ağlay üzlük daşlarla üzlənməsi işləri aparılır.

İmişli Rayon İcra Hakimiyyəti informasiya təminatı və təhlili sektor müdiri Elnur Tağıyev rayonda görülən işlər barədə məlumat verərək bildirdi ki, Heydər Əliyev Mərkəzi, Şahmat Məktəbi, 50 min tonluq taxıl anbarı, "Araz" Damazlıq Quşçuluq Fabriki, Bayraq Meydanı tikilib. Onun sözlərinə görə, mərkəzi rayon xəstəxanasının binasında da beynəlxalq tələblərə cavab verilən səviyyədə əsaslı təmir işləri aparılıb, bu tibb müəssisəsi müasir avadanlıqlarla təchiz olunub: "Heydər Əliyev parkında da yenidənqurma işləri aparılıb. Adıçəkilən parkın ərazisindəki ictimai və inzibati binalara ağlay üzlük daşla üzlüklər çəkilib, binaların dam örtükləri dəyişdirilib, müasir işıqlandırma sistemi, fəvvarələr quraşdırılıb, yaşıllıqlar salınıb. Rayon ərazisindəki magistral avtomobil yollarının ətrafında 33,8 min ədəd müxtəlif növ ağaclar əkilib, şəhərin 14 küçəsində 41900 kvadratmetr həcmində təmir işləri görülüb, eyni zamanda, "Soyqırımı" və "20 Yanvar" abidə kompleksində abadlıq işləri başa çatdırılıb. İmişli şəhərinə Saatlı və Beyləqan rayonları istiqamətində 2 giriş qapısı qoyulub. Rayon tarix diyarşünaslıq müzeyində, eləcə də mərkəzi kitabxana binasında da təmir işləri başa çatdırılıb. Hər iki bina ağlayla üzlənilib, sahəsi 200 kvadrat metr 2 zaldan ibarət olan muzeydə 4 min ədəd eksponatın yerləşdirilməsi nəzərdə tutulub. O cümlədən şəhər 4 saylı uşaq bağçasının binasında da əsaslı təmir işləri aparılıb. Sabir parkında isə abadlıq işləri davam edir.

Sosial infrastruktur yenidən qurulur

Elnur Tağıyev İmişli Şəkər Zavodunun nəzdində Kəllə-qənd zavodunun tikintisinin də başa çatdığını dedi. Onun sözlərinə görə, Xələfli kənd ərazisində isə yeni asfalt zavodu, Bəcirəvan kəndində baytar sahə məntəqəsi tikilib. Qarabağ Müharibəsi Əlilləri üçün 6 mərtəbəli 54 mənzilli ictimai yaşayış binasının tikintisi üçün yer ayrılıb.

Şəhərin içməli su problemi həll edildiyini də deyən Elnur Tağıyev bildirir ki, artıq rayon mərkəzin yeni su xətləri çəkilib. Onun sözlərinə görə, indiyədək şəhərin kanalizasiya xətti olmayıb. Amma indi kanalizasiya xəttinin çəkilişinə başlanılıb: "2013-cü ilin sonuna qədər bu işlər başa çatdırılacaq. Şəhər tamamilə qazlaşdırılıb, 8 kəndə qaz çəkilişi davam edir. Artıq Yalavaq kəndinə mavi yanacaq verilib, Cəfərli kəndində də qazın çəkilişi başa çatmaq üzrədir. Bundan başqa, 13 kəndə modul tipli sutəmizləyici qurğu quraşdırılaraq əhali içməli su ilə təmin olunub".

İcra hakimiyyətinin nümayəndəsi deyir ki, hazırda Aşıqlılar kəndində qazılması nəzərdə tutulmuş 5 ədəd artezian quyularının 1-də kəşfiyyat quyusu qazılaraq istismara tam hazırdır. Digər 4 quyuda isə qazma işləri davam edir. Onun sözlərinə görə, artıq 29,5 kilometr uzunluğunda olan Beyləqan-İmişli magistral su xəttinin, həmçinin 1 ədəd 1500 kubmetrlik və 2 ədəd 2500 kubmetrlik su anbarının tikintisi başa çatdırılıb: "Kəndlərin su təchizatını yaxşılaşdırmaq məqsədilə 13 yaşayış məntəqəsində modul tipli sutəmizləyici qurğular quraşdırılaraq əhalinin istifadəsinə verilsə də, digər kəndlərdə də buna ehtiyac var. Bununla bağlı Ekologiya və Təbii Sərvətlər Nazirliyinə müraciətlər olunub".

Qış hazırlıqları davam edir

Rayonun qışa hazırlıq tədbirlərindən danışan Elnur Tağıyev bildirir ki, bu il əksər kəndlərdə elektrik xətt təsərrüfatında yenidənqurma işləri aparılıb. Onun sözlərinə görə, istismar müddəti başa çatmış dayaqlar yeniləri ilə əvəz olunub. Həmçinin Qaravəli və Mirişli kəndlərinə asfalt yol çəkilib və hazırda bir neçə kənddə də yolların çəkilişinə başlanılıb: "Bütün kəndlərin yolları asfaltlanacaq. Kür-Araz çaylarında mühafizə bəndlərini möhkəmləndirmək məqsədilə 199 kubmetr həcmində beton, 392 kubmetr həcmində faşınla sahilbərkitmə, 25,3 kilometr uzunluğunda 817,1 min kubmetr həcmində qayakəsmə və təmir işləri görülüb. Artıq Xoşçobanlı, Murğuzalı, Mürsəlli və Qaraqaşlı kəndləri ərazisində 20,1 kilometr məsafədə bəndlərin hündürlənməsi və möhkəmləndirilməsi işləri artıq başa çatıb".

Qələndər Xaçınçaylı

Həftə içi. – 2012. – 6 noyabr. –S. 7.