Azərbaycan əraziləri mütləq işğaldan azad olmalıdır

Novruz Məmmədov: "Dağlıq Qarabağ münaqişəsinin həll olunmamış vəziyyətdə qalması mümkün deyil"

"Dağlıq Qarabağ münaqişəsinin həll olunmamış vəziyyətdə qalması mümkün deyil. Azərbaycan əraziləri mütləq işğaldan azad olmalıdır". Bunu jurnalistlərə açıqlamasında Azərbaycan Prezident Administrasiyası beynəlxalq əlaqələr şöbəsinin müdiri Novruz Məmmədov deyib. Onun sözlərinə görə, beynəlxalq qurumların, Avropa İttifaqının, Avropa Şurasının, İslam Əməkdaşlıq Təşkilatının, digər regional və beynəlxalq qurumların bu münaqişə ilə bağlı müəyyən qərar və qətnamələri, həmsədr dövlətlərin - ABŞ, Rusiya və Fransa prezidentlərinin 4 bəyanatı olduğu üçün status-kvo dəyişməlidir: "İndiki vəziyyət qəbuledilməzdir Bizim mövqeyimiz ondan ibarətdir. Ermənistan tərəfi vaxtaşırı müəyyən bir bəhanə axtarıb taparaq danışıqlar prosesini uzatmağa nail olmamalıdır". N.Məmmədov rəsmi Bakını ATƏT-in Minsk Qrupundan gözləntilərini də açıqlayıb: "Həmsədrlərdən bizim istəyimiz və tələbimiz ondan ibarətdir ki, ili ilə satmağa dəyməz. Neçə illərdir ki, onlar bu istiqamətdə danışıqlar aparırlar, ancaq bu danışıqların hələlik real bir nəticəsi yoxdur. Şəxsən mənim də fikrim ondan ibarətdir ki, bu, nə qədər tez olarsa, Ermənistan bir dövlət kimi erməni xalqının gələcək taleyi üçün müəyyən mənada təminat ala bilər. Vəziyyət belə qalarsa, bu dövlətin də, bu millətin də gələcəyi sual altında olacaq". Həmsədrlərin yeni təklifləri ilə bağlı məsələyə münasibət bildirən N.Məmmədov qeyd edib ki, "Madrid prinsipləri" müəyyən sənədlərdə qəbul edilib: "Onların çərçivəsində bəhanə axtarmaq yox, münaqişənin konstruktiv həllinə nail olmaq lazımdır. Ermənistan rəhbərləri bununla bağlı özlərində iradə tapmalıdırlar. Bu xalqın, bu ölkənin taleyini girov qoymaq olmaz. Onlar erməni xalqının, erməni dövlətinin taleyini öz maraqlarına qurban verərək özlərini hakimiyyətdə saxlamaq üçün danışıqlar prosesini müəyyən bəhanələr tapmaqla uzadırlar. Bu da onların faciəsidir".

Azad

Həftə içi. – 2012. – 28 noyabr. –S. 1.