Zəlzələ bölgəsinə ictimai diqqət

Deputatlar Zaqatala-Balakən zonasında zəlzələdən zərərçəkən seçicilərlə görüşür, siyasi partiyalar isə...

Oktyabrın 14-də Azərbaycanın şimal-qərb bölgəsində baş verən təkanlardan sonra Zaqatala, Balakən və Qax rayonlarının sakinlərinin narahatlığı artıb. Belə ki, hər üç rayonun icra hakimiyyətindən "Həftə içi"nə daxil olan məlumata görə, bölgədə yaşayan əhalisi tərəfindən yerli icra strukturlarına edilən müraciətlərin sayı artıb.

Bəs, bu bölgədən Milli Məclisə deputat seçilmiş şəxslər, ictimai təşkilatlar və siyasi partiyaların rəhbərləri təbii fəlakət bölgəsində yaşayan seçicilərin üzləşdiyi problemlərlə maraqlanırlarmı? Zəlzələdən ziyan çəkən vətəndaşlar seçdikləri millət vəkillərinin, siyasi iddialarla ölkənin idarəedilməsində iştirak etmək niyyətində olan partiyaların rəhbərlərinin diqqət və qayğısını hiss edə bilirmi?

"Həftə içi"nin əməkdaşı bu və ya digər məsələlərə aydınlıq gətirmək üçün parlamentdə zəlzələ bölgəsini təmsil edən deputatlar və siyasi hakimiyyətə iddialı partiyaların bir neçəsinin rəhbəri ilə əlaqə saxlayıb. Balakən rayonundan Milli Məclisə üzv seçilən Rəbiyyət Aslanova bildirib ki, o, hazırda Balakən rayonundadır. Onun sözlərinə görə, yeraltı təkanlar nəticəsində rayon icra hakimiyyətinə və onun özünə ünvanlanan müraciətlərin sayı artıb. Rayon və kəndlərdə yaşayan əhali arasında evlərinin təkan nəticəsində dağıntıya məruz qaldıqları da bildirilib: "Mən 4 gündür ki, öz seçicilərimin yanındayam. Balakənin zəlzələ nəticəsində zərərçəkən bütün kəndlərində olmuşam. Hər bir evdə öz seçicilərimlə ayrı-ayrılıqda görüşmüşəm. Onların vəziyyəti ilə maraqlanmışam. Bu gün mən Balakən rayonunda Yeni Azərbaycan Partiyasının 20 illiyinə həsr olunmuş tədbirdəyəm. Tədbir yekunlaşandan sonra da mənim kəndlərə səfərlərim davam edəcək".

Rəbiyyət Aslanova onu da əlavə edib ki, hər ay Balakən rayonuna yollanaraq öz seçiciləri ilə görüşür. Onun sözlərinə görə, son 4 gün ərzində qəza vəziyyətində olan evlərə bilavasitə o özü baş çəkib: "Zəlzələ nəticəsində zərər çəkənlərə diqqət və qayğı bilavasitə ölkə başçısı tərəfindən həyata keçirilir. Rayonda müvafiq icra strukturları, Fövqəlada Hallar Nazirliyinin əməkdaşları ilə birgə qəzalı vəziyyət yaranan ərazilərə və evlərə baxış keçirir. Təbii ki, bu proseslərdə mən özüm də iştirakçı oluram".

Zərərçəkən şəxslərin problemlərinin tezliklə həll ediləcəyini deyən Milli Məclisin üzvü onu da bildirib ki, Balakən rayonuna göndərilən yardımların və tikinti materiallarının bölünməsində də iştirakçı olub: "Səhər saat 9-dan, axşam saat 11-dək mən evləri gəzib əhalinin şikayətlərini dinləyirəm. Hazırda məndə 3100 ərizə və müraciətlər var. Bütün bunlar araşdırılır. Hər bir Balakən rayon sakini bilməlidir ki, daim onların yanındayam və onlara yardım etmək və qayğı göstərmək üçün çalışıram".

Zaqatala rayonundan olan deputat, Milli Məclisin Sosial Siyasət Komissiyasının üzvü Hikmət Atayev isə zəlzələ baş verən gündən etibarən seçicilərin arasında olduğunu söyləyir. Onun sözlərinə görə, sonuncu zəlzələ Zaqatalaya o qədər də təsir göstərməyib.

Mövcud problemlə bağlı ona müraciət edənlərin sayının artdığını deyən Hikmət Atayev onu da əlavə edir ki, mayın 7-də baş verən zəlzələdən sonra ona müraciət edənlərin sayı da durmadan artmaqdadır. Onun sözlərinə görə, həmin tarixdən indiyədək şifahi şəkildə Zaqatala sakinləri arasında ona 500-ə yaxın müraciət edən olub: "Yazılı şəkildə isə 235 müraciət almışam və bunun 12-si son 3 gün ərzində ünvanlanıb: "İnsanlar çox narahatlıq keçirdilər. Böyük dağıntılar olmasa da, bir çox evlərdə xırda çatlar əmələ gəlib. Hansı evlər ki, təmirə ehtiyacı var onlar təmir ediləcək. May ayında baş verən zəlzələdən bir gün sonra ölkə başçısı burada oldu. Ölkə rəhbərliyi tərəfindən bu sahəyə diqqət var. Bilavasitə dövlət başçısının göstərişi ilə qəzalı vəziyyətdə olan mənzillər sökülərək, yerində yeni mənzillər tikilir".

Qax rayonundan Milli Məclisə deputat seçilən Azər Kərimliyə ünvanlanan suallarımızı isə onun köməkçisi Nadir Muxtarov cavablandırır. Onun sözlərinə görə, bu həftə deputat sözügedən rayona baş çəkib seçiciləri ilə görüşüb: "Qax rayonunda dağıntılar olmasa da, qəzalı vəziyyətdə olan evlərin sayı az deyil. Deputatları ilə görüşən seçicilər tərəfindən şifahi və yazılı müraciətlər də gün keçdikcə artmaqdadır. Seçicilərlə görüşlər davam edəcək. Qaxda da evlərin bərpası məsələsinə başlanılıb. Çünki bu Qaxa zərər verən ikinci zəlzələdir. Bundan əvvəlki zəlzələnin də nəticələri aradan qaldırılmaqdadır. Son zəlzələ ilə bağlı isə rayon Fövqəlada Hallar Komissiyası və yerli icra strukturları tərəfindən araşdırmalar aparılır. Hazırda Qax rayonunda müraciətlərə baxılır. Zəlzələ olan gündən etibarən Qax rayonuna çadırlar gətirilərək, əhaliyə paylanıb. Hazırda bütün müraciətlərə diqqət var. Müvafiq məsləhətləşmələr aparılır".

Deputatın köməkçisi onu da əlavə etdi ki, Azər Kərimli Güllük, Zərnə, Tasmalı və Turaclı kəndlərindəki seçiciləri ilə görüşüb.

Siyasi partiyalara gəlincə, seçkilər vaxtı seçicilərindən səs istəyən partiya üzvlərinin biri də indiyədək zəlzələ bölgəsinə baş çəkməyib. Müsavat Partiyası sədrinin müavini Gülağa Aslanlı da təbii fəlakət bölgəsində olmadığını etiraf edir. Amma onun sözlərinə görə, adıçəkilən bölgədə partiyanın nümayəndəliyi olduğundan oradakı problemlərdən də xəbərdardır: "Biz mütəmadi olaraq sözügedən bölgə ilə əlaqə saxlayırıq. Orada fəaliyyət göstərən nümayəndəliyimiz tərəfindən işin gedişatına nəzər yetirilir".

Pərvin İsmayılova

Həftə ici. – 2012.- 20-22 oktyabr. –S. 9.