Tarixçi-tədqiqatçı mükafatlandırıldı

Vaqif Rüstəmov "Xalqın nüfuzlu ziyalısı" fəxri diplomuna layiq görülüb

Tanınmış tədqiqatçı, muzeyşünas Vaqif Rüstəmov mədəniyyət, təhsil və mətbuat sahəsində göstərdiyi xidmətlərə görə, Azərbaycan Kütləvi İnformasiya Vasitələri İşçiləri Həmkarlar İttifaqı Rəyasət Heyətinin qərarı ilə "Xalqın nüfuzlu ziyalısı" fəxri diplomuna layiq görülüb. Yanvarın 8-də keçirilən mükafatlandırma mərasimində KİV İşçiləri Həmkarlar İttifaqı Rəyasət Heyətinin sədr müavini, filologiya üzrə fəlsəfə doktoru Davud Dəmirli çıxış edərək Vaqif Rüstəmovu qabaqcıl müəllim, fəal ictimaiyyətçi kimi tanıdığını deyib.

Onun sözlərinə görə, hazırda Vaqif Rüstəmovun pedaqoji təcrübəsi orta ixtisas məktəblərində təbliğ olunur: "Vaqif müəllim hələ 1980-cı illərdə İmişli Tarix Diyarşünaslıq Muzeyinin direktoru vəzifəsində işləyərkən bir qrup elm və incəsənət xadimləri ilə birlikdə rayona səfər etmişdik. Biz orada tarix muzeyinə baxanda heyran qaldıq. Vətənimizə, tariximizə bağlılıq göz qabağında idi. Həm də onun apardığı və tariximizi əhatə edən ekskursiyası bu gün də gözümün önündədir. O, uzaq keçmişimizdən müasir dövrümüzə qədər tariximizi çox gözəl şərh edərək keşməkeşli yollarımızı, milli mədəniyyətimizin, etnoqrafiyamızın hər bir sahəsini böyük sevgiylə bizə təlqin edirdi. Mən muzeydəki eksponatların sənədlərinin, tarixi materiallarının xronoloji ardıcıllıqla şərhini dinləyərkən hiss edirdim ki, gec-tez biz müstəqilliyimizi, suverenliyimizi əldə edəcəyik. Artıq o dövrdən 30 ilə yaxın bir vaxt keçir. Vaqif müəllim bu gün də mətbuat sahəsində elmi tədqiqat işlərini geniş şərh edir. Bu narahat və yorulmaz insan həm təhsilimizə, həm də tariximizə nikbinliklə baxır, o, öz ənənəsini bu gün də mətbuatda işıqlandırır. Biz Vaqif müəllimin təhsildə ictimaiyyətçi-müəllim kimi xidmətlərini, mətbuat səhifələrində yazılarını nəzərə alaraq "Xalqımızın nüfuzlu ziyalısı" fəxri diplomuna layiq gördük".

Yeni Azərbaycan Partiyasının Suraxanı rayon təşkilatının sədr müavini Fərman Rəsulov isə mərasimdəki çıxışında Vaqif Rüstəmovu geniş dünyagörüşünə malik, biliyi və intellektualı dərin hörmət qazanmış tədqiqatçı olduğunu deyib: "Onun məktəb və rayon tədbirlərində bir ictimaiyyətçi kimi xidmətləri böyükdür. Bir partiya üzvü kimi dövlətimizin siyasətini geniş şərh etmək bacarığı Vaqif müəllimdə yüksəkdir. Hər dəfə elmi-kütləvi, siyasi tədbirlərdə çıxış edərkən bizim yaddaşımızda nüfuzlu ziyalı kimi qalır. Ona bu adın verilməsi həqiqətən də təqdirəlayiqdir. Biz onunla fəxr edirik".

Sonra "Xalqın nüfuzlu ziyalısı" fəxri diplomu Vaqif Rüstəmova təqdim olunub. Tanınmış tədqiqatçı ona verilən mükafata görə KİV İşçiləri Həmkarlar İttifaqı Rəyasət Heyətinin sədri, yazıçı-ilahiyyatçı Oqtay Salamzadəyə və onun müavini filologiya üzrə fəlsəfə doktoru Davud Dəmirliyə, eləcə də tədbir iştirakçılarına öz dərin minnətdarlığını bildirib.

Qələndər Xaçınçaylı

Həftə içi.- 2012.-10 yanvar.- S. 7.