Ekologiya, turizm, idman...

Gənclər və İdman Nazirliyi "2012 - İdman ili"nə dair Tədbirlər Planı hazırlayır

Azərbaycanın idman sahəsində son illər əldə etdiyi nailiyyətlər göz qabağındadır. Yola saldığımız ildə ölkəmiz idman sahəsində böyük uğurlar qazandı. Nazirlər Kabinetinin 2011-ci ilin sosial-iqtisadi inkişafının yekunlarına və 2012-ci ildə qarşıda duran vəzifələrə həsr olunan iclası zamanı prezident İlham Əliyev Azərbaycanda idmanın inkişaf etdirilməsinə və bu istiqamətdə keçirilən tədbirlərə də toxunub.

Ölkə başçısı 2012-ci ildə sosial infrastrukturların, o cümlədən olimpiya komplekslərinin inşa ediləcəyini diqqətə çatdıraraq, hazırda müasir tələblərə cavab verəcək 10 olimpiya kompleksinin inşa edildiyini, daha 3 kompleksin tikintisi üçün isə hazırlıq işlərinin getdiyini vurğulayıb. Prezident 2012-ci ildə Yay Olimpiya Oyunlarının keçiriləcəyini də xatırladaraq, ölkəmizin bu beynəlxalq tədbirə ciddi hazırlaşdığını söyləyib. Onun sözlərinə görə, 65 minlik böyük olimpiya stadionu tikilir. Böyük gimnastika kompleksi, Bakı "Kristal" İdman Konsert Kompleksini də bu sıraya aid etmək olar. İlham Əliyev bütün bunlarla yanaşı, 2012-ci ilin "İdman ili" elan edilməsi haqda sərəncam da imzalayıb. Sərəncamda ölkədə idmanın inkişafının ildən-ilə geniş vüsət alması xatırlanaraq, Azərbaycan idmançılarının müxtəlif səviyyəli beynəlxalq yarışlarda 5 mindən artıq medala layiq görüldüyü diqqətə çatdırılıb.

Yeri gəlmişkən, Azərbaycan idman sahəsində həyata keçirilən dövlət siyasətinin daha da gücləndirilməsi, olimpiya hərəkatının genişləndirilməsi və geniş coğrafi məkanda təbliğinin təşkil edilməsi məqsədilə Bakı şəhərinin 2020-ci ildə XXXII Yay Olimpiya Oyunlarını keçirmək üçün namizədliyini irəli sürüb. Ötən ilin sentyabrında isə Beynəlxalq Olimpiya Komitəsi (BOK) sözügedən yay Olimpiya Oyunlarına Bakının namizədliyini təsdiq edib.

Dövlət başçısının çıxışında qeyd etdiyi idman obyektlərindən biri Bakı Olimpiya Stadionudur. Beynəlxalq səviyyəli bu arenanın təməli ötən ilin iyunun 6-da qoyulub. İlham Əliyevin də iştirak etdiyi təməlqoyma mərasimində FİFA-nın prezidenti Yozef Blatter və UEFA prezidenti Mişel Platini, eləcə də dünya futbol ictimaiyyətinin görkəmli nümayəndələri, federasiya rəhbərləri, futbol veteranları və digər qonaqlar qatılıblar. Belə ki, paytaxtda öz müasir tikinti üslubu ilə fərqlənəcək və xüsusi gözəlliyi ilə seçiləcək 65 min tamaşaçı yeri olan Bakı Olimpiya Stadionu bu tipli müasir idman qurğuları sırasında özünəməxsus yer tutacaq. Burada müxtəlif funksiyalı tribunaların, qaçış zolağının və digər infrastrukturun inşası nəzərdə tutulub. Daxili sahəsi 120,830 kvadratmetr olacaq stadionda tikinti işləri Beynəlxalq Tikinti Standartına (İBC), UEFA və FİFA standartlarına və Azərbaycanın inşaat normativlərinə uyğun aparılacaq. Stadionun layihələndirilməsi ilə bağlı ilkin işlərə 2008-ci ildən başlanılıb.

Millət vəkili Ağacan Əbiyev mətbuata açıqlamasında bildirib ki, Azərbaycanda müxtəlif idman növləri üzrə keçirilən yüksək səviyyəli yarışlar artıq deməyə əsas verir ki, olimpiya oyunlarına ev sahibliyi etmək iqtidarındayıq: "Azərbaycan 2020-ci il Yay Olimpiya Oyunlarına ev sahibliyi etmək üçün namizədliyini irəli sürüb. Bunun arxasında bizim təcrübəmiz, dövlətimizin yüksək inkişafı və idmana göstərdiyi diqqət dayanır. Bu bizə Azərbaycanın 2020-ci ildə olimpiya olyunlarını keçirmək əzmində olduğuna inanmağa ciddi əsaslar verir".

Millət vəkilinin sözlərinə görə, Azərbaycan dünyanın nüfuzlu idman ölkəsidir: "London Yay Olimpiya oyunlarında Azərbaycandan olimpiya yarışlarında iştirak edəcək idmançılarımızın sayı tam müəyyənləşməyib. Çünki lisenziya yarışları bu ilin aprel-may aylarına qədər davam edəcək. Möhtəşəm idman tədbiri isə bu ilin 25 iyul-13 avqust tarixlərində keçiriləcək. Hələlik 30-a yaxın lisenziya qazanmışıq, amma fikrimcə, bu göstərici 40-dan çox olacaq. Ümumiyyətlə, ölkəmizin olimpiya yarışlarında göstəriciləri hər dəfə artımla müşayiət olunur. Düşünürəm ki, bu il Londonda qazanacağımız medalların sayı daha çox olacaq".

Olimpiya çempionu Namiq Abdullayev düşünür ki, prezidentin sərəncamı ilə 2012-ci ilin "İdman ili" elan olunması ölkəmizdə idmana göstərilən diqqətin nəticəsidir: "Bu hər bir idmançı kimi mənim üçün də fəxrdir. Bu il həm də London Yay Olimpiya Oyunları keçiriləcək. İnanıram ki, ölkəmizə gələcək medalların sayı hər kəsin ürəyincə olacaq".

Gənclər və İdman Nazirliyinin mətbuat xidmətinin rəhbəri Səmayə Məmmədova sözügedən nazirliyin Nazirlər Kabineti ilə birgə Tədbirlər Planı hazırlandığını bildirdi: "Saytımızda idman təqvimi bölməsində hansı idman tədbirlərinin keçiriləcəyi barədə məlumatlar yerləşdirilir. Lakin sırf "İdman ili" ilə əlaqədar hansı tədbirlər planı hazırlanır və orada nələr nəzərdə tutulur. Bu haqda nəsə demək üçün hələ tezdir. Hazırda bunun üzərində iş gedir. Yaxın günlərdə nazirliyin mətbuat konfransı keçirilməlidir. Orada hər kəs üçün qaranlıq qalan məqamlara aydınlıq gətiriləcək".

Sevda Zahidqızı

Həftə içi.- 2012.- 19 yanvar.- S. 7.