"Eurovision" açarı Azərbaycanda...

Avropa musiqisinin ürəyi Bakıda döyünəcək

Eldar Qasımov və Nigar Camal Almaniyada təşkil olunan "Eurovision 2011" mahnı müsabiqəsində qələbə qazanmaqla Azərbaycanın qarşısına bir sıra öhdəliklər və vəzifələr qoymuş oldular. Final mərhələsindən dərhal sonra keçirilən mətbuat konfransında müsabiqənin icraçı produseri Jan-Ola Sandın müsabiqəsinin şərtlərini nümayəndə heyətimizə təqdim etməsi də ölkəmizdə eyniadlı müsabiqənin hazırlıqlarına start verilməsi demək idi. Xatırladaq ki, müsabiqə ilə əlaqədar bu il ölkəmizə 43 ölkənin iştirakçıları ilə yanaşı, həm də 10 minlərlə turist gələcəyi gözlənilir.

Həm ölkəmizin, həm də bütün avropanın bu yarışmadan gözləntiləri çoxdur. Müsabiqədən üzüağ çıxacağımıza əminik. Bunu "Eurovision-2012" İşçi Qrupunun rəhbəri Adil Kərimli saytların birinə verdiyi açıqlamada da təsdiqləyib. O, müsabiqəyə hazırlıq prosesinin çox uğurla getdiyini bildirib. Əlavə edib ki, Bakıda keçiriləcək "Eurovision-2012" mahnı müsabiqəsi bütün Avropa auditoriyasının və gələn qonaqların ürəyincə olacaq. Və budur, artıq "Eurovision" qapımızın astanasındadır...

Ölkəmizdə təşkil olunacaq müsabiqəylə əlaqədar xarici KİV nümayəndələri, "Eurovision" müsabiqəsinin təşkilatçıları öz fikirlərini bildiriblər. "Eurovision" layihəsinin rəhbəri Yan Ola Sand açıqlamalarının birində ötən illərdə müsabiqəyə qatılmayan ölkələrin builki yarışmada iştirakı yaxşı göstərici olduğunu bildirib. Onun sözlərinə görə, bu həm də Azərbaycanda keçiriləcək yarışmaya marağın yüksək olduğuna işarədir: "Hazırlıqlar yüksək səviyyədə aparılır. Müsabiqə ilə bağlı gözəl ideyalar irəli sürülüb. Mən inanıram ki, müsabiqə çox möhtəşəm keçəcək".

Nümayəndə heyətləri üzrə menecer Tahir Əliyevin fikrincə isə Eurovision səhnəsində Azərbaycan öz mədəniyyətini, Avropaya inteqrasiyasını yüksək səviyyədə əks etdirəcək bir şou göstərəcək. Müsabiqənin Azərbaycan üçün əlverişli fürsət olduğunu deyən qonaqlar hazırlıqların yüksək səviyyədə aparıldığını bildiriblər.

"Brainpool" TV-nin rəhbəri Jörg Grabosch isə bildirib ki, müsabiqənin Bakıda keçirilməsi Azərbaycan üçün böyük fürsətdir ki, öz mədəniyyətini, ölkəsini Avropaya, bütün dünyaya tanıtsın. Əlavə edib ki, çoxları Azərbaycanın Avropaya yaxınlığından, onun gözəl mədəniyyətinin olmasından xəbərsizdir: "Deyərdim ki, builki Eurovision yarışması indiyədək keçirilən müsabiqələrin ən möhtəşəmi olacaq".

"Eurovision"-nun tədbirlər və kommunikasiya rəhbəri Sietse Bekker bildirib ki, müsabiqəyə hazırlıq böyük əmək və məsuliyyət tələb edir: "Bunun üçün təşkilatçıların üzərinə daha çox iş düşür. Lakin Bakı müsabiqəyə uğurla hazırlaşır. Təşkilati işlər də öz qaydasındadır."

Hazırlıqlar barədə xarici ölkələrdə də məlumatlar yayımlanır.

EBU-nun kommunikasiya koordinatoru Jarmo Siim fanat ordusunu ətraflı məlumatla təmin etmək üçün çalışdıqlarını qeyd edib: "Eurovision mahnı müsabiqəsi bizim gündəlik işimizdir. Biz əsasən müsabiqəyə hazırlıqlarla bağlı internetdə məlumatlar yerləşdiririk. Bunu daha çox sosial şəbəkələr vasitəsilə həyata keçiririk".

"Eurovision" açarı Bakı merinin əlində

Dünəndən etibarən "Eurovision-2012" müsabiqəsi ilə əlaqədar olaraq Bakıda bir neçə təntənəli mərasim keçirilib. Tədbir "Buta Palace"da təşkil olunub. Müsabiqənin açar təqdimetməsi, təmsil olunan ölkələrin yarımfinal mərhələləri üzrə püşkatması və Eurovision Mahnı Müsabiqəsi 2012-nin loqo və şüarının prezentasiyası da eyniadlı məkanda keçirilib.

Müsabiqənin əsas mərasimlərindən olan açar təqdimetmə mərasimində "Eurovision 2011"ə ev sahibliyi etmiş Düsseldorf şəhərinin meri Dirk Elsbers "Eurovision" mahnı müsabiqəsinin rəmzi açarını Bakı Şəhər İcra Hakimiyyətinin başçısı Hacıbala Abutalıbova təqdim edib. Bununla da Bakı "Eurovision 2012"yə ev sahibliyini rəsmən qəbul etmiş olub.

Açar təqdimetmə mərasimindən sonra "Eurovision-2012"də yarımfinallarda iştirak edəcək 37 ölkə arasında püşkatma təşkil olunub. Həmçinin "Böyük beşliyin" (Fransa, Almaniya, İtaliya, İspaniya, Böyük Britaniya) və keçən ilki müsabiqənin qalibi olan Azərbaycanın hansı yarımfinalı yayımlayacağı və səsvermədə iştirak edəcəyi də müəyyən olunub.

Yarımfinal mərhələlərində iştirak edən ölkələrin "Eurovision 2012"də çıxış ardıcıllığı isə mart ayında nümayəndə heyətləri rəhbərlərinin görüşü zamanı keçiriləcək püşkatma nəticəsində bəlli olacaq.

Tədbirin vacib məqamlarından biri "Eurovision" mahnı müsabiqəsi 2012-nin konsepsiyasının təqdimatı olub. Möhtəşəm "Eurovision" axşamında Azərbaycanın ev sahibliyi edəcəyi müsabiqənin loqo və şüarı açıqlanıb. "Eurovision-2012"nin ilk təntənəli tədbirində Avropa Yayımları Birliyinin nümayəndələri də iştirak edib. Mərasimin gedişində 6 iştirakçı ölkə ilə canlı bağlantı da olub.

Təqdimetmə mərasimi çərçivəsində xarici jurnalistlərlə mətbuat konfransı da keçirilib. Əlavə edək ki, tədbir keçirildiyi gündən etibarən "eurovision.az" saytı da istifadəyə verilib.

"Evrovision" loqosunda Azərbaycan bayrağı

Azərbaycanın bu müsabiqəyə ev sahibliyi ilə bağlı keçirilən təntənəli mərasimdə iştirak etmək üçün müsabiqənin 2004-cü il qalibi Ruslana, 2009-cu il qalibi Aleksandr Rıbak və 2010-cu il qalibi Lena Mayer paytaxta qonaq gəliblər.

Tədbirdə "Buta Palace" səhnəsində Azərbaycana Eurovision qalibiyyəti gətirən Eldar Qasımov və Nigar Camal, 2009 və 2010-ci illərdəki təmsilçilərimiz Aysel Teymurzadə və Safurə Əlizadə ilə yanaşı, Aleksandr Rıbak, Ruslana və Lena Mayer də çıxış edib.

Qeyd edək ki, 2004-cü ildən etibarən "Eurovision" mahnı müsabiqəsinin içərisində ev sahibliyi edən ölkənin bayrağı əks olunmuş ürək şəkilli logosu var. Buna baxmayaraq, hər il ev sahibi olan ölkə həmin loqoya dəstək olaraq öz loqosunu, başqa sözlə, müsabiqənin konsepsiyasının bədii təsvirini təqdim edir.

Azərbaycan 2011-ci ilin mayında Düsseldorfda keçirilən Eurovision Mahnı Müsabiqəsində qələbə qazanaraq Avropanın məşhur yarışmasına ev sahibliyi hüququ əldə edib. Mayın 22 və 24-də "Eurovision 2012"nin yarımfinal, 26-da isə final mərhələsi keçiriləcək. Müsabiqənin qaydalarına əsasən, 5 ölkə - Almaniya, Fransa, Böyük Britaniya, İtaliya və İspaniya, eləcə də ötənilki müsabiqənin qalibi kimi Azərbaycan birbaşa final mərhələsində çıxış edəcək.

Sonda onu da qeyd edək ki, "Eurovision-2012" mahnı müsabiqəsinin harada keçirilməsi artıq rəsmi olaraq təsdiqlənib. Avropa Yayım Birliyinin nümayəndələri və Məşvərət Qrupu müsabiqənin Bayraq Meydanında inşa olunan "Baku Crystall Hall" sarayında keçirilməsinə qərar veriblər.

Nigar İxtiyarqızı

Həftə içi.- 2012.- 26 yanvar.- S. 8.