Azərbaycan Gömrük Xidməti İKT sahəsində böyük uğurlar əldə edib

Yanvarın 30-u Azərbaycan Gömrük Xidməti əməkdaşlarının peşə bayramıdır. Qeyd edək ki, düz 20 il bundan əvvəl ölkəmizdə Dövlət Gömrük Komitəsi yaradılıb. Amma o zamankı ictimai-siyasi vəziyyət bu qurumun formalaşmasına imkan vermədiyindən Dövlət Gömrük Komitəsinin inkişafı məhz mərhum prezident Heydər Əliyevin adı ilə bağlıdır. Çünki onun hakimiyyətə qayıdışından sonra Azərbaycan Gömrük Xidməti mükəmməl hüquqi bazaya, inkişaf etmiş infrastruktura malik olmaqla ölkənin quru, hava və dəniz yollarında respublikanın iqtisadi mənafeyini və təhlükəsizliyini daha etibarlı şəkildə qorumağa başlayıb. Bu gün Dövlət Gömrük Komitəsi öz fəaliyyətində ən müasir informasiya texnologiyalarını tətbiq etməklə işini uğurla davam etdirir. Azərbaycan Gömrük Xidmətinin 20 illik yubileyi ərəfəsində "Həftə içi" qəzetinin müsahibi Dövlət Gömrük Komitəsinin Statistika və İnformasiya Texnologiyaları Baş İdarəsinin rəisi, gömrük xidməti general-mayoru İqbal Babayevdir.

- İqbal müəllim, bu gün Azərbaycanda demək olar ki, bütün sahələrdə elektron xidmətlərin tətbiqinə başlanılıb. Sizin fikrinizcə, hazırda mövcud hüquqi baza əhaliyə beynəlxalq standartlara uyğun elektron xidmətlərin göstərməsinə imkan verirmi?

- Ümumiyyətlə, beynəlxalq təcrübələrə görə informasiya texnologiyalarının inkişafı müasir cəmiyyətin formalaşmasına böyük təsir göstərir və insanlara asanlıqla informasiya əldə edilməsinə imkan yaradır. İnformasiya cəmiyyətinin qurulması ictimai həyatın bütün sahələrində müasir informasiya-kommunikasiya texnologiyalarının (İKT) tətbiqi yolu ilə həyata keçirilir. Elektron hökumət, elektron iqtisadiyyat, elektron ticarət, elektron təhsil, elektron gömrük və s. digər sahələr üzrə elektron xidmətlərin yaradılması informasiya cəmiyyətinin əsasını təşkil edir. Hesab edirəm ki, Azərbaycan Respublikasında informasiya cəmiyyətinin qurulması üçün kifayət qədər mükəmməl hüquqi baza formalaşıb.

Hüquqi bazanın əsasını isə ümummilli liderimiz Heydər Əliyevin 17 fevral 2003-cü il tarixli "Azərbaycan Respublikasının inkişafı naminə informasiya və kommunikasiya texnologiyaları üzrə Milli Strategiyanın (2003-2012-ci illər) təsdiq edilməsi" haqqında sərəncamı təşkil edir. Sərəncamın icrası və ondan irəli gələn vəzifələrin həyata keçirilməsi informasiya-kommunikasiya texnologiyalarının bütün sahələrdə tətbiqinə geniş şərait yaradıb. Məsələn, "Azərbaycan Respublikasında rabitə və informasiya texnologiyalarının inkişafı üzrə 2010 - 2012-ci illər üçün Dövlət Proqramı"nın (Elektron Azərbaycan)" təsdiq edilməsi haqqında Azərbaycan Respublikası Prezidentinin sərəncamı, Azərbaycan Respublikası Prezidentinin 23 may 2011-ci il tarixli "Dövlət orqanlarının elektron xidmətlər göstərməsinin təşkili sahəsində bəzi tədbirlər haqqında" fərmanı, "İnformasiya əldə etmək" haqqında Azərbaycan Respublikasının Qanunu, Elektron imza və elektron sənəd haqqında Azərbaycan Respublikasının Qanunu, Elektron ticarət haqqında Azərbaycan Respublikasının Qanunu, Azərbaycan Respublikasında Milli Ödəniş Sisteminin inkişafı üzrə 2005-2007-ci illər üçün Dövlət Proqramı, Azərbaycan Respublikasında 2005-2008-ci illərdə "Elektron hökumət"in formalaşdırılması üzrə Fəaliyyət Proqramı, Azərbaycan Respublikasında kosmik sənayenin yaradılması və inkişafı üzrə Dövlət Proqramı və s. sənədlər mövcud hüquqi bazanın daha da təkmilləşdirilməsinə imkan verib. Beləliklə də bu və ya digər normativ-hüquqi aktlar əsasında dövlət orqanlarının əhaliyə beynəlxalq standartlara uyğun elektron xidmətlərin göstərməsinin əsas prinsipləri müəyyən edilib və elektron xidmətin platforması yaradılıb.

- Bəs Azərbaycanın gömrük xidmətində İKT-nin inkişaf tarixi neçənci illərdən başlayıb?

- Əgər gömrük xidmətində İKT-nin inkişaf tarixinə nəzər salsaq görərik ki, bu xidmətdə informasiya-kommunikasiya texnologiyalarının geniş miqyasda və planlı şəkildə işlənməsi və tətbiqi 1995-ci ildən sonra başlanıb. 1995-ci ildən 1999-cu illərdə korporativ şəbəkənin qurulması əsas prioritet istiqamətlərdən biri kimi müəyyən edilib. Eyni zamanda qeyd etmək lazımdır ki, o zamanlar gömrük orqanları arasında informasiya mübadiləsi yalnız məlumatların fiziki olaraq toplanması və vahid bazaya yazılması yolu ilə həyata keçirilirdi. 1999-cu ildən etibarən isə gömrük xidmətinin İKT strategiyası artıq beynəlxalq standartlar səviyyəsində qurulmağa başlanıb. Belə ki, BMT-nin İnkişaf Proqramı və Azərbaycan Hökuməti arasında həyata keçirilən "Azərbaycan Respublikası Dövlət Gömrük Komitəsinin Potensialının Gücləndirilməsi və Məlumatların Ötürülməsi Şəbəkəsinin yaradılması" layihəsi avtomatlaşdırılmış idarəetmə sisteminin yaradılması sahəsində gömrük xidmətinin inkişafına olduqca müsbət təsir göstərib. Layihənin icrası nəticəsində "on-line" rejimdə Dövlət Gömrük Komitəsi və gömrük orqanları arasında birbaşa informasiya mübadiləsi, həmçinin dövlət sərhəd buraxılış məntəqələrinin şəbəkə ilə əhatə olunması təmin edilib, həmçinin radiokanallar və "frame-relay" texnologiyaları tətbiq olunub.

2000-2009-cu illərdə isə gömrük işinin avtomatlaşdırılması, biznes prosesin idarə olunmasında kompyuter texnologiyalarından istifadə olunması, gömrük prosedurları üzrə müvafiq proqram təminatlarının işlənməsi və vahid məlumat bazasının yaradılması istiqamətləri üzrə layihələr reallaşdırılıb.

2009-cu ildən başlayaraq Dövlət Gömrük Komitəsi İKT sahəsində yeni bir mərhələyə, gömrük işinin avtomatlaşdırılmış idarəetmə sisteminin WEB texnologiyası əsasında qurulması mərhələsinə keçib. Bu illərdə DGK-nın korporativ şəbəkəsi yeni texnologiyalar əsasında yenidən fiber optik rabitə xətləri əsasında qurulub, server sistemi tam yenidən formalaşıb. Eyni zamanda, "Gömrük xidmətinin Vahid Avtomatlaşdırılmış İdarəetmə Sistemi (VAİS)" layihəsi işlənərək tətbiq edilib. Qeyd edim ki, VAİS gömrük işində gömrük prosedurlarının avtomatlaşdırılması və elektron gömrük xidmətinin təşkil edilməsi üçün hazırlanmış idarəetmə sistemidir. VAİS bütün gömrük işini əhatə edərək sərhəd gömrük buraxılış məntəqələrində, daxili gömrük orqanlarında və müvafiq icazə sənədlər ilə təmin edən digər dövlət təşkilatlarında inteqrasiyanı təmin edən sistemdir. Hazırda VAİS bütün gömrük orqanlarında tətbiq edilir və bütün gömrük prosedurları VAİS üzərindən həyata keçirilir.

- Sözsüz ki, digər sahələrdə olduğu kimi, gömrük sahəsində də İKT layihələrinin tətbiqi xüsusi yanaşma tələb edir. Sizcə, İKT layihələrinin işlənməsi və tətbiqi üçün əsas hansı istiqamətlər inkişaf etdirilməlidir?

- Doğrudur ki, başqa sahələrdə olduğu kimi, gömrük sahəsində də İKT layihələrinin tətbiqi üçün xüsusi yanaşma lazımdır. Ümumiyyətlə, hər hansı bir dövlət orqanında İKT layihələrinin işlənməsi və tətbiqi üçün 5 əsas istiqaməti inkişaf etdirmək zəruridir. Bu istiqamətləri həmin təşkilatda "İKT-nin dirəkləri" də adlandırmaq olar:

1. İKT-nin tətbiqi ilə bağlı siyasi iradə

2. İnfrastrukturanın inkişafı

3. Biznes prosesin təkmilləşdirilməsi

4. İnnovasiya layihələrinin tətbiqi

5. Potensialın gücləndirilməsi

Əgər bu istiqamətlərə ayrı-ayrılıqda nəzər salsaq görərik ki, hər biri çox vacibdir. Məsələn, siyasi iradə nəticəsində İKT layihələrinin tətbiqi müvafiq qanunvericilik bazası əsasında həyata keçirilə bilər. Bu istiqamətdə hüquqi baza 2003-cü ildə ümummilli lider Heydər Əliyev tərəfindən Milli Strategiyanın təsdiq edilməsi müəyyənləşdirildi. Sonra prezident İlham Əliyev 2003-cü ildə Cenevrədə təşkil edilmiş İnformasiya Cəmiyyəti üzrə Dünya Sammitində "Qara qızılı insan qızılına, intellektual potensiala çevirək" tezisini söyləməklə Azərbaycanda İKT-nin inkişafı üzrə siyasi iradəni bir daha möhkəmlətdi.

İKT layihələrinin tətbiqi üçün əsas şərtlərdən biri də infrastrukturun inkişafıdır. Son dövrdə bütün gömrük sistemi üzrə daxili və sərhəd keçid məntəqələrində müasir binaların tikilməsi, onların yüksək səviyyəli maddi texniki avadanlıqlarla təmin edilməsi İKT layihələrinin tətbiqi üçün əlverişli və dayanıqlı avtomatlaşdırılmış sistemin formalaşdırılmasına şərait yaradıb. Hazırda bütün gömrük orqanlarını birləşdirən müasir texnologiyalar əsasında qurulmuş gömrük xidmətinin koorporativ şəbəkəsi fəaliyyət göstərir. Bu şəbəkə gömrük orqanları arasında yüksək keyfiyyətlə məlumatların, səsin və videogörüntülərin ötürülməsini təmin edir. Qeyd etmək lazımdır ki, Dövlət Gömrük Komitəsində İKT layihələri üçün infrastruktura tam formalaşıb. Həmçinin, İKT layihələrinin tətbiqində biznes prosesin təkmilləşdirilməsi də əsas istiqamətlərdən biridir. Məlumdur ki, müstəqilliyimizi əldə etdikdən sonra bütün sahələrdə olduğu kimi, gömrük sahəsində də müstəqil siyasətimizə və qanunverici aktlara əsaslanan yeni biznes prosesin yaradılması və işlənməsi zəruri bir hal idi. Bu biznes proseslərin əsasında dövlət orqanlarının fəaliyyət mexanizmi işə salındı və nəticədə yüksək iqtisadi göstəricilərə malik olan ölkəyə çevrildik. Hazırda inkişafımızın yeni mərhələsi - informasiya cəmiyyətinin formalaşması mərhələsi başlanmış və elektron hökumətin qurulması prosesi surətlə davam edir. Lakin mövcud olan biznes prosesi elektron hökumətin tələblərinə uyğun olaraq təkmilləşdirməsi zərurəti yaradıb. Bu sahədə Gömrük Komitəsində genişmiqyaslı işlər həyata keçirilir, beynəlxalq təcrübələr öyrənilir. Azərbaycan Respublikasının yeni "Gömrük Məcəlləsi" təsdiq edilmiş və bu qanunverici akt əsasında yeni biznes proses formalaşmaqdadır. Son zamanlar komitə sədrinin əmri ilə 30-a yaxın qeydiyyat jurnalları əlyazma formasından elektron forma ilə əvəz edilib. "Biznes-Gömrük" əməkdaşlığında yeni prosedurlar işlənilib və şəffaflığın təmin edilməsi üçün gömrük işinin biznes prosesində təkmilləşdirmə işləri həyata keçirilib.

Bundan başqa, İKT layihələri özü özlüyündə yaradıla bilməz. Bu tipli layihələrin tətbiqi və uzunömürlü olması üçün müvafiq mühit formalaşmalıdır ki, layihənin nəticəsi səmərəli olsun. Bu mühiti formalaşdırmaq üçün innovasiya tipli layihələr həyata keçirmək lazımdır. Məsələn, Dövlət Gömrük Komitəsində "Bir pəncərə" sisteminin yaranması, gömrük orqanlarına test üsulu ilə işə qəbul olunma, beynəlxalq elmi-praktiki konfransların təşkili və s. bu kimi layihələr İKT-nin tətbiqini stimullaşdırır və zəruri bir layihə kimi yaranmasını tələb edir.

İKT layihələrinin reallaşdırılmasında həm də potensialın gücləndirilməsi vacibdir. Kadr siyasəti isə potensialın gücləndirilməsində ən əsas faktorlardan biri hesab edilir. Potensialın gücləndirilməsi istiqamətində həyata keçirilən layihələrdən DGK-nın Regional Tədris Mərkəzinin yaranması, gömrük xidmətinə avtomatlaşdırılmış test üsulu ilə işə qəbul olunma kimi layihələri misal göstərmək olar. Dövlət Gömrük Komitəsi ilə Ümumdünya Gömrük Təşkilatı ilə sıx əməkdaşlıq edir və ÜGT-nin Regional Ofisinin Bakı şəhərində açılması buna misal göstərmək olar.

- Məlumdur ki, hansısa yeni layihənin reallaşdırılması zamanı həm də zəruri meyarlar müəyyənləşdirilir. Gömrük xidmətində İKT layihələrinin tətbiq edilməsi üçün əsas meyarlar nədən ibarətdir?

- Bu meyarlar layihənin məqsədinin formalaşması, layihənin tətbiq və istismar şərtlərinin müəyyənləşdirilməsi, layihənin tətbiq zonası, əhatə dairəsi və mühitinin təyin olunması, layihənin tətbiqində yarana biləcək problemlərin və risklərin müəyyən edilməsindən ibarətdir. Bu meyarlara nəzər salsaq görərik ki, hər biri olduqca zəruridir. Məsələn, layihənin məqsədi dedikdə burada ticarətin asanlaşdırılması, subyektiv amillərin ləğv olunması, məlumat mübadiləsinin operativliyi, gömrük xidmətində şəffaflığın təmin edilməsi əsas götürülür.

Gömrük işində İKT layihələrinin yaradılma şərtlərini isə belə müəyyənləşdirmək olar. İlk növbədə sistem mövcud qanun çərçivəsində fəaliyyət göstərməlidir. Sistem real vəziyyətə uyğun olaraq layihələnməli, layihə real olmalı və layihələndirmədə 4 əsas meyar nəzərə alınmalıdır: ölkənin qanunvericilik bazası, iqtisadiyyatı, coğrafi mövqeyi və sərhədləri, habelə xalqın mədəniyyəti.

Bundan başqa, sistem texnologiyanın dinamik inkişafına cavab verməlidir. Yəni sistem elə qurulmalıdır ki, texnologiya inkişaf etdikcə müəyyən dəyişiklik etməklə sistemi inkişaf etdirmək mümkün olsun.

Onu da deyim ki, gömrük işində İKT layihələri xüsusi texniki platforma üzərində qurulur. Əsas platforma İKT infrastrukturasının inkişaf etdirilməsindən, lokal informasiya platformasının, qlobal informasiya platformasının, qərar qəbuletmə platformasının yaradılmasından ibarətdir.

- Hazırda gömrük sahəsində həyata keçirilən İKT layihələri hansı sahələri əhatə edir? Ümumiyyətlə, gömrük prosedurlarının avtomatlaşdırılması və elektron gömrük xidmətlərinin təşkili məqsədilə görülən işlər barədə nə deyə bilərsiniz?

- Bu gün gömrük sahəsində İKT layihələri əsasən, mal və nəqliyyat vasitələrinin qeydiyyatı və gömrük rəsmiləşdirilməsi, gömrük əməliyyatları üzrə maliyyə fəaliyyətinin tənzimlənməsi, gömrük sahəsində hüquqpozmalar faktının qeydiyyatı, statistik məlumatların formalaşması və analitik təhlilin aparılması, müəssisələrdə resursların idarə edilməsi, gömrük sistemində sənəd dövriyyəsinin təmin edilməsi, gömrük məsələləri üzrə ictimaiyyətin müvafiq informasiya və elektron gömrük xidmətləri ilə təmin edilməsi sahələrini əhatə edir. Bundan başqa, baytarlıq, fitosanitar və sanitar-karantin xidmətləri, maliyyə və tarif dərəcələrinin tənzimlənməsi və Xarici İqtisadi Fəaliyyətin Əmtəə Nomenklaturası (XİFƏN), əqli mülkiyyət hüquqlarının qeydiyyatı və nəzarəti, xüsusi nəzarətdə olan malların gömrük təmizlənməsi, hüquqpozma faktlarının qeydiyyatı, risklərin idarə olunması, yol vergilərinin formalaşması və idarə olunması, valyuta sərvətlərinin qeydiyyatı, gömrük nəzarəti altında olan mal və nəqliyyat vasitələrinin hərəkətinə nəzarət "GPS naviqasiya", xarici ticarətin gömrük statistikası və analitik təhlil, internet resurslarının idarə olunması, gömrük rəsmiləşdirilməsi üçün tələb olunan icazə sənədləri və beynəlxalq yükdaşımalarda müyyən edilmiş "Kvotalar" üzrə digər dövlət orqanları ilə inteqrasiya sistemini əhatə edir. Ümumiyyətlə isə gömrük prosedurlarının avtomatlaşdırılması və elektron gömrük xidmətlərinin təşkili məqsədilə Gömrük Komitəsində geniş miqyasda İKT layihələri tətbiq edilir. Nəticədə "Dövlət Gömrük Komitəsində İKT-nin yeni inkişaf strategiyası" işlənərək komitənin bu sahəyə cavabdeh olan baş idarəsində struktur dəyişikliyi həyata keçirilib. 2010-cu ildə komitə sədrinin əmri ilə baş idarədə "İnternet resurslarının idarə olunması", "Sistem inteqrasiyası", "Layihələrin idarə olunması", "İnformasiya təhlükəsizliyi" və s. kimi yeni şöbələr yaradılıb. Bir məqamı da vurğulayım ki, son dövrdə komitə sədri tərəfindən Gömrük Komitəsində İKT-nin tətbiqi ilə bağlı 50-dən çox əmr və göstəriş imzalanıb. Bunlardan xüsusilə "Gömrük orqanlarının korporativ informasiya sistemlərində elektron imzadan istifadə olunması haqqında", "Dövlət sərhədinin buraxılış məntəqələrindən keçirilən malların və nəqliyyat vasitələrinin yoxlanılmasında "Bir pəncərə" prinsipinin avtomatlaşdırılmış idarəetmə sisteminin tətbiqi haqqında", "Azərbaycan Respublikası Dövlət Gömrük Komitəsinin İnternet informasiya resurslarının yaradılması haqqında", "Azərbaycan Respublikası Dövlət Gömrük Komitəsinin yeni rəsmi internet saytının yaradılması və istismara verilməsi haqqında", "Dövlət Gömrük Komitəsində kargüzarlıq işinin avtomatlaşdırılması haqqında", "Malların gömrük rəsmiləşdirilməsi və nəzarəti üzrə avtomatlaşdırılmış idarəetmə sistemləri haqqında", "Hüquqpozmalar faktının qeydiyyatı haqqında", "BYD kitabçaları üzrə məlumatların birbaşa avtomatik ötürülməsi haqqında" və s. digər bu kimi əmr və göstərişləri misal göstərmək olar. Digər tərəfdən, komitənin informasiya resurslarının təhlükəsizliyini təmin etmək və məlumatların daxil edilməsinə və emalına hüquqi statusun verilməsi məqsədilə 2009-cu ildən Dövlət Gömrük Komitəsində "Elektron imza və informasiya sistemlərinin təhlükəsizliyi" sistemi tətbiq edilərək 2000 gömrük əməkdaşı "Elektron açar" ilə təmin edilib. Bundan başqa, komitə sədrinin müvafiq əmri ilə Dövlət Gömrük Komitəsində kargüzarlıq işinin daha da təkmilləşdirilməsi, onun müasir texnologiyalar əsasında avtomatlaşdırılmış vahid sistem və forma əsasında aparılması məqsədilə sənəd dövriyyəsinin avtomatlaşdırılmış idarəetmə sistemi bütün gömrük orqanlarında tətbiq edilir.

Gömrük sahəsində hüquqpozmalara qarşı mübarizə sahəsində də informasiya texnologiyaları geniş tətbiq edilir. Komitədə yaradılmış "Hədəf Mərkəzi"nə bütün məlumatlar bazası və yerli gömrük orqanlarının 800-ə yaxın kamerası birləşdirilərək, daxili və sərhəd keçid məntəqələrinin videomüşahidəsi real vaxt rejimində həyata keçirilir. Hədəf mərkəzində ölkə ərazisində gömrük nəzarəti altında hərəkət edən nəqliyyat vasitələrinin müəyyən edilmiş marşrutla gömrük təyinat məntəqəsinə çatmasına nəzarət etmək məqsədilə "İki gömrük orqanı arasında daşınan mallara nəzarət GPS naviqasiya sistemi" Dövlət Gömrük Komitəsində tətbiq edilir. Layihənin nəticəsi olaraq ölkə ərazisində gömrük nəzarəti altında hərəkət edən 500 ədəd nəqliyyat vasitəsinə, eyni zamanda, nəzarət etmək mümkündür.

Bundan başqa, yeni yaradılmış "Mobil qruplar"ın avtomobilləri kompyuter avadanlıqları, video kamera qurğuları və "Mobil VAİS" proqram təminatı ilə təchiz edilib.

Bir sözlə, hazırda ölkə prezidentinin 16 fevral 2011-ci il tarixli fərmanı ilə təsdiq edilmiş "Dövlət və yerli özünüidarə orqanlarının aktlarının elektron informasiya sistemləri vasitəsilə açıqlanması Qaydası"ndan, o cümlədən 23 may 2011-ci il tarixli "Dövlət orqanlarının elektron xidmətlər göstərməsinin təşkili sahəsində bəzi tədbirlər haqqında" fərmanından irəli gələn vəzifələr uğurla yerinə yetirilir. Bununla əlaqədar komitə sədrinin 25 may 2011-ci il tarixli əmrinə əsasən, Dövlət Gömrük Komitəsi sistemində gömrük prosedurları və xidmətlərinin təkmilləşdirilməsi, kağız sənədlərdən istifadənin məhdudlaşdırılaraq elektron formada həyata keçirilməsi və biznes proseslərin kağızsız texnologiya əsasında qurulması, hazırlanmış hüquqi aktların layihələrinin müvafiq dövlət orqanlarına razılaşdırmaya göndərilməzdən əvvəl DGK-nın internet saytında yerləşdirilməsi, eləcə də elektron gömrük xidmətləri sahəsinin daha da genişləndirilməsi və s. tədbirlər həyata keçirilir.

- İqbal müəllim, komitə bu sahədə əldə etdiyi uğurları beynəlxalq tərəfdaşları ilə bölüşürmü?

- Qeyd edim ki, Azərbaycan gömrük xidmətinin bu sahədə əldə etdiyi uğurlar müxtəlif beynəlxalq tədbirlərin müzakirə mövzusuna çevrilib. Bunun nəticəsidir ki, Dövlət Gömrük Komitəsində elektron gömrük xidmətləri üzrə həyata keçirilən layihələrlə və DGK-nın İKT strategiyası ilə tanış olmaq məqsədi ilə Özbəkistan, Rusiya Federasiyası, Makedoniya və Argentina gömrük xidmətlərinin nümayəndələri Azərbaycana səfər ediblər.

Bundan başqa, gömrük işində informasiya sistemləri və informasiya texnologiyalarının tətbiqi təcrübəsinin öyrənilməsi və gömrük xidmətində informasiya texnologiyalarının gələcək inkişaf istiqamətlərinin müəyyən edilməsi məqsədilə Dövlət Gömrük Komitəsi artıq üçüncü ildir gömrük işində İKT üzrə beynəlxalq elmi-praktik konfrans keçirir. Keçirilmiş konfranslarda gömrük xidmətində informasiya-kommunikasiya texnologiyaları və "e-Gömrük" xidmətləri, gömrük-biznes əməkdaşlığında İKT-nın rolu və dövlət orqanlarında elektron xidmətlər göstərilməsinin təşkili məsələləri müzakirə olunub. Məsələn, ötən il sentyabrın 12-13 tarixlərində Bakıda - "Elektron gömrük xidmətləri: gələcəyə baxış" mövzusunda III beynəlxalq elmi-praktik konfrans keçirildi. Konfransda 25 ölkənin nümayəndəsi daxil olmaqla, dövlət və qeyri-dövlət təşkilatlarından 300-dən çox nümayəndə iştirak etdi. Dövlət Gömrük Komitəsi, eyni zamanda, gömrük sistemində İKT-nin tətbiqi və "e-Gömrük" layihələri ilə bağlı Azərbaycan Respublikası Rabitə və İnformasiya Texnologiyaları Nazirliyi, Milli Elmlər Akademiyasının Kibernetika İnstitutu və Milli Elmlər Akademiyasının İnformasiya Texnologiyaları İnstitutu ilə sıx əməkdaşlıq edir. Bütün bunlar göstərir ki, komitə bu sahədə əldə etdiyi uğurlarla kifayətlənmir və gələcəkdə də uğurlarının davamlı olması üçün mövcud İKT strategiyasını ilbəil təkmilləşdirir.

Sevinc Osmanova

P.S. Gömrük Xidmətinin 20 illik yubileyi ərəfəsində Azərbaycan Prezidenti İlham Əliyev bir qrup gömrük əməkdaşını xüsusi rütbələrlə mükafatlandırıb. Xüsusi rütbə alanlar sırasında Gömrük Komitəsinin Statistika və İnformasiya Texnologiyaları Baş İdarəsinin rəisi İqbal Babayev də var və ona gömrük xidməti general-mayoru rütbəsi verilib. Bu münasibətlə "Həftə içi" qəzetinin kollektivi İqbal Babayevi təbrik edir və ona işlərində yeni-yeni uğurlar arzulayır.

İqbal Babayev

Həftə içi.- 2012.- 27 yanvar.- S.1;3.