“İş, karyera-bunlar müvəqqətidir”

Gülnarə Məmmədova: “Qadın üçün xoşbəxtliyin düsturu ailədən ibarətdir”

O, hələ bir vaxtlar “Sara TV”də efirə çıxanda həm yadda qalan xarici görünüşü, həm də ki dilli-dilavərliyi ilə tamaşaçının marağına səbəb oldu. Sonradan “Sara TV”nin gözəli “ANS”in sevilən simalarından birinə çevrilə bildi. Və nə az, nə çox düz 11 il dəqiq, qərəzsiz, vicdanla deyən kanalın efirini bəzədi...

Gülnarə Məmmədova son illərdəki susqunluğunun səbəblərini hafta-ichi.az-a danışır.

- Bir vaxtlar maraqlı layihələrin aparıcısı olan Gülnarə Məmmədova bu gün niyə susub?

- Susmağım hər kəsə maraqlıdır. Hamı soruşur, maraqlanır ki, efirə nə vaxt qayıdacam? Hətta efirə çıxmağımı tələb edən tamaşaçılarım da olur.

- Bəziləri düşünür ki, Gülnarə Məmmədovanın sükutunun arxasında depressiya dayanır. Yəni siz ailə həyatındakı uğursuzluq sonrası efirlə də vidalaşmaq qərarı vermisiniz.

- Bunun arxasında da depressiya dayanmır, yox (gülür).

Efirdən uzaqlaşmaq məqsədim olmayıb əslində. Neçə illər idi ki, fasiləsiz, istirahətsiz işləyirdim. Düşündüm ki, bir az dincələrəm, fikirlərimi toplayaram. Amma razıyam ki, bu fasilə çox uzandı. İşimdən soyudum.

- “ANS”dən ayrılmağınızın əsas səbəbi nə idi?

- Sadəcə, bezdim bu işdən. Həvəsdən düşdüm.

- Bəzi şayiələr gəzir ki, kanal rəhbərliyi ilə aranızda narazılıqlar yaranıb?

- Qətiyyən. Bu gün də salamımız var. Mən “ANS”dən çıxdıqdan sonra bir neçə dəfə dəvət etdilər. Hətta əvvəllər aparıcısı olduğum “Kamerton” verilişini də təklif etdilər yenidən mənə. İstəmədim. Serialla çatdırmazdım, çünki bir arada.

- Gülnarə, “ANS”dən sonra sizin böyük bir layihənin aparıcısı olacağınız danışıldı. Amma...

- Çox təkliflər aldım. Çalışdığım kanaldan da təkliflər gəldi, digər yerli kanallarımızdan da. Amma nədənsə start edə bilmədim. Böyük layihələr başlamalıydım, amma yarı yolda buraxdım...

- Yenə depressiya?

- Yox. Daha depressiya yoxdur.

- Efir üçün darıxmamısınız heç?

- Yox, (gülür). Efir üçün darıxmamışam. Amma tamaşaçılarım üçün çox darıxmışam. “Niyə efirdə yoxsuz, sizi görmək istəyirik yeni layihələrdə”, - deyən kimi kövrəlirəm ki, məni sevirlər, qayıdım efirə...

Məsələn, dostlarıma söz verdim ki, bu televiziya mövsümündə efirə qayıdacağam. Amma bir söz deyim sizə. Yenə də əmin deyiləm qayıdacağıma. Ola bilər yaxşı aparıcılardan olmuşam. Amma tamaşaçı sevgisindən başqa bir şey qazanmamışam.

- Yerli telekanallara baxırsız? Hansı aparıcıları bəyənirsiz? Kimləri izlədikdə “bunun yeri efir deyil deyirsiz?”.

- Nə gizlədim, yerli telekanalları izləmirəm. Ara-sıra baxanda əsəbiləşirəm. Deyim ki, sevdiyim aparıcı var, yalan olar. Amma güldüyüm aparıcılar var...

- Seriallarda özünüzü sınadınız... Aparıcılığı aktrisalığa dəyişdiniz demək olar?

- Aktrisalığa meyilim həmişə olub. Hətta bir əyləncə kimi baxırdım bu işə. Bir gün evdə idim, rejissor Samir Qulamov zəng vurdu və məni seriala dəvət etdi. Məndən gözlədiyindən də artığını ala bildi. Yəni rejissorum məndən razıdır (gülür). “Küləklər şəhəri”nin ardınca “Sonun başlanğıcı” gəldi. Varlı mafiya başçısının qızını canlandırırdım “Küləklər şəhərində”. “Sonun başlanğıcında isə bomj rolundayam. Və məhz bu roluma görə Yeni Azərbaycan Partiyasının “İlin ən yaxşı qadın aktrisası” mükafatı ilə təltif olundum.

Zövq alıram bu işdən. Və məhz bu sənəti də davam etdirmək istəyirəm.

- Aktrisalar qısqanmırlar ki, Gülnarəni?

- Bilmirəm ki, heç. Amma niyə də qısqansınlar ki, məncə yox, qısqanmazlar. Axı mən peşəkar aktrisa deyiləm, aparıcıyam. Onlar peşəkar aparıcı, mənsə peşəkar aktrisa ola bilmərəm. Amma onu da bilmək olmaz (Gülür ).

- Gülnarə depressiyaya son?

- Depressiya çox oldu. Artıq son. Sadəcə, mən çox tez-tez düşürəm bu depressiyalara. Bu da xasiyyətimdən irəli gəlir. Çox tez ruhdan düşürəm.

- İnsan ağır günlərində ətrafını tanıyır, çətin günlər əsl həyat məktəbidir deyirlər. Siz ələdinizmi dostlarınızı çətin günlərinizdə?

- Çətin günlərimdə yanımda elə dostlarım oldu ki, ələməyə ehtiyac qalmadı. Dostlarım elə dost olaraq qaldılar.

- Gülnarə Məmmədova nəyi anladı bu son illərdə?

- Sadəcə, həyat mənə bir şey öyrətdi. Mən anladım ki, insan ilk növbədə özünü sevməli və özünü düşünməlidir. Yəni məhz öz arzuların uğrunda istədiyin kimi yaşamağı bacarmalısan.

- Yenidən ailə qurmağı düşünürsüz? Bu ailə sevgi əsasındamı qurulacaq?

- Sevmədən ailə həyatı qurmaram. Qadın üçün ən önəmli olanı ailədir. İnanın ki, bu boğazdan yuxarı sözlər deyil. İş, karyera bunlar müvəqqətidir. Qadın üçün xoşbəxtliyin düsturu ailədən ibarətdir! Bir də mən tənhalıqdan çox qorxuram. Hər bir qadının həyatında qayğısına qalacaq, ona arxa olacaq bir çiyin dayanmalıdır.

- Səhhətinizdə problemlər yarandı bir ara.

- Problemlər var idi. Amma indi şükür Allaha hər şey yolundadır.

- Və son olaraq bir daha əvvələ qayıdacağam. Gülnarə Məmmədovanı yaxın vaxtlarda yenidən efirdə görəcəyik?

- (Gülür). Hələ qəti deyə bilmərəm. Serialda olacağam, bu dəqiqdir. Amma aparıcı qismində deyə bilmərəm. Bəlkə çox maraqlı bir təklif gəlsə. Amma yenə də tam əmin deyiləm.

Sevinc Məmmədli

Həftə içi.- 2013.- 18 aprel.- S.8.