“Atəşgah” qoruğunda sərgi keçirilib

Əbülfəs Qarayev: “Tarixi abidələrə, milli-mədəni dəyərlərə hörmət etmək hər kəsin vətəndaşlıq borcu olmalıdır”

Ölkəmizdə tarixi abidələrə dövlət qayğısı günbəgün artır. Elə bu diqqətin nəticəsidir ki, Suraxanı rayonundakı “Atəşgah” tarixi-memarlıq abidəsi də yenidən qurularaq turistlərin və xalqımızın ziyarətgahına çevrilib.

“Həftə içi”nin məlumatına görə, 18 aprel beynəlxalq tarixi abidələr və yerlər günü münasibətilə Mədəniyyət və Turizm Nazirliyinin təşkilatçılığı ilə “Atəşgah”da sərgilər təşkil edilib. Həmin sərgidə qədim xalçalar, mis məmulatları, gümüşü kəmərlər, yəhər, yüyən, qara çıraq, qayaüstü rəsmlər qədim ipəklər, qədimi xalça toxuyan xanalar və tarixi kitablar, rəssam Xəzər Nəbiyevin təmiz təbii neftlə çəkilmiş Bakı kompozisiyasından ibarət sənət əsərləri, eləcə də gənc rəssamların əl işləri nümayiş etdirilib. Yüzlərlə paytaxt sakinlərinin iştirak etdiyi sərgidə Milli Məclisin bir qrup deputatı da iştirak edib.

Mədəniyyət və turizm naziri Əbülfəs Qarayev, Suraxanı Rayon İcra Hakimiyyətinin başçısı İlqar Abbasov sərgilərdə nümayiş etdirilən qədimi əşyalarla, nadir incilərlə tanış olublar. Kitab sərgisində tariximizi əks etdirən tarixi kitabların içində tanınmış tədqiqatçı- tarixçi Şakir Qabıssanlının “İbrahim Peyğəmbər və xalq mahnıları”, “Muğamat və İbrahim Peyğəmbər”, eləcə də “Bəşəriyyət başlanğıcını haradan götürüb” kitabları sərgi iştirakçılarının diqqətini daha çox cəlb edib.

Sərgi ilə tanışlıqdan sonra mədəniyyət və turizm naziri Əbülfəs Qarayev çıxış edib. Nazir çıxışında bildirdi ki, beynəlxalq tarixi abidələr və yer günü Azərbaycanın müasir tarixinə bayram kimi daxil olacaq: “Artıq öz qədim tarixi, mədəniyyəti ilə seçilən Azərbaycan beynəlxalq konvensiyalara qoşulub. İlk dəfə olaraq, beynəlxalq tarixi abidələr gününü burada “Atəşgah” qoruğunda qeyd edirik. “Atəşgah” qoruğunun yenidən təmir və bərpa olunması prezident İlham Əliyevin təşəbbüsü ilə həyata keçirilib. Biz burada aparılmış yeni qazıntılara nəzarət edirdik. Vaxtaşırı “Atəşgah”a gəlib qoruqda aparılan tikinti və qazıntı işləri ilə maraqlanırdım. Bir metr yarım yerin dərinliyində qazıntı işləri aparıldı. Arxeoloqlarımız əsrlər boyu insanlar tərəfindən yaratdığı bu mədəni irsi nəinki qoruyub saxlayırlar, həm də onu aşkar edərək xalqımıza sübut edirlər. Bir sözlə, ölkəmizin tarixinə hörmətlə yanaşaraq, Azərbaycan tarixinə şərəf gətirən böyük addımlarını atırlar. Bunun da nəticəsində neçə qədim yeni qoruqlar təşkil olundu”.

Əbülfəs Qarayev mədəni irsimizin dünya ictimaiyyətində təbliği ilə məşğul olduqlarını da söyləyib. Onun sözlərinə görə, xalqımızın mədəni irsi ilə yanaşı, qeyri-mədəni irsi də bir nümunədən ölçülür: “Azərbaycan muğamı, aşıqları, Azərbaycan tarı, Novruz Bayramı da artıq dünyada təbliğ olunur. Heydər Əliyev Fondunun prezidenti, millət vəkili Mehriban Əliyeva bu sahəyə böyük diqqət göstərir. O, qədim incəsənət və xalq yaradıcılıq növlərini özümüzə qaytardı. Xalq bu incə qədim nümunələri yaradıbsa, deməli, bu xalq böyük hörmətə və diqqətə layiq bir xalqdır”.

Nazir yeni bərpa olunan Qarabağ muzeyinin Avropanın ən yaxşı müzeyləri sırasına daxil olduğunu da söyləyib. Onun sözlərinə görə, siyahıda olan 6308 tarixi abidə Azərbaycanın qədim nümunələrini əks etdirir: “Son dövrlərdə 1700 tarixi abidə aşkarlanıb və bununla bağlı tədqiqat işləri aparılır. Yeni arxeoloji qazıntılar nəticəsində yeni abidələr, tarixi faktlar aşkarlanır”.

Əbülfəs Qarayev bəzi hallarda mədəniyyət tariximizə, milli adət-ənənələrimizə qarşı laqeydsizlik və hörmətsizlik edildiyini də diqqətə çatdırıb. Xüsusilə də gəncləri bu məsələlərdə ehtiyatlı olmağa çağıran nazir deyib ki, tarixi abidələrə, milli-mədəni dəyərlərə hörmət etmək hər kəsin vətəndaşlıq borcu olmalıdır: “Biz doğma xalqımızın keçmişinə hörmətlə yanaşmalıyıq. Nazirlik kimi biz bu istiqamətdə öz işimizi görürük, keçmişdən qalan mədəni mirasları qoruyub və ictimaiyyətə təbliğ edirik və edəcəyik. Hələ bizi gələcəkdə yeni aşkar olunacaq tarixi abidələr gözləyir”.

Nazir çıxışını bitirdikdən sonra mədəni irsinin təbliğində xidmətləri olan bir qrup şəxsi mükafatlandırıb. Mərasim incəsənət ustalarının konserti ilə başa çatıb.

Qələndər Xaçınçaylı

Həftə içi.- 2013.- 20-22 aprel.- S.16.