Qələbəyə iddialıyam

“İlin paltarı-2013” müsabiqəsinə çox az bir vaxt qalıb. Gərgin işlərin davam etdiyi bir vaxtda yarışmanın ən iddialı modelyerlərindən biri, “İlin paltarı-2012” müsabiqəsinin qalibi Ləman Məhəmmədzadə müsahibimizdir…

- Ləman, artıq “İlin paltarı-2013” müsabiqəsinə çox az bir vaxt qalıb. Sən də bu il müsabiqəyə qatılan modelyerlər sırasındasan...

- Bəli, artıq müsabiqəyə çox az qalıb. Həyəcan daha da artır. Keçən il olduğu kimi, bu il də müsabiqənin iştirakçılarındanam.

- Hazırlıq işləri nə yerdədir?

- Artıq neçə aydır ki, müsabiqəyə hazırlaşıram. Ötən illərdə olduğu kimi, bu il də müsabiqəyə 3 paltarla qatılıram. Hər bir paltara olduqca böyük önəm vermişəm, hər xırda detala qədər düşünmüşəm. Artıq paltarlarım demək olar ki, hazırdır. Nəticə mənim üçün də çox maraqlıdır. Amma qələbəyə iddialıyam.

- Həyəcan var?

- Mən düşünürəm ki, hər bir modelyer neçə dəfə müsabiqədə iştirak etməsindən asılı olmayaraq, hər dəfə həyəcan keçirir. Belə olmasa, qələbənin sevincini də dada bilməzsən.

- Rəqiblərin kimlərdir?

- Rəqiblərim öz işinin fanatı olan modelyerlərdir. Elə rəqiblərim güclü olduğu üçün yarışmağa da həvəs olur.

- Ötən il olduqca fərqli geyim təqdim etdin… Bu il tamaşaçıları nə gözləyir?

- Bu il tamaşaçıları bir çox şey baxımından təəccübləndirəcəyəm. Azərbaycanda bu günə qədər heç bir modelyerin etmədiyi bir iş göstərəcəyəm. İnanıram ki, hamı bəyənəcək.

- Sən ötən il keçirilən “İlin paltarı-2012” müsabiqəsinin qalibisən... Necə oldu bu il də müsabiqəyə qatıldın?

- Uzun müddət idi ki, ilin paltarı müsabiqəsini izləyirdim. 2012-ci ilə müsabiqəyə modelyerlərin ərizə qəbulu başlayan kimi dərhal müraciət etdim.

- Modelyerlər arasında rəqabət var idi?

- Ancaq sağlam rəqabət…

- Ötən ilin qalibiyyətini təkrarlayacağına inam var?

- Hər zaman hər əminlikdə bir tərəddüd, hər tərəddüddə bir əminlik var əslində…

- Ötən ilin qələbəsi sənə nə qazandırdı?

- Ötən ilin qalibiyyəti mənə çox şey qazandırdı. Modelyer kimi daha da inkişaf etdim. Bu sahədə olan bir çox yeni simaları tanıdım. Azərbaycan Moda Assosiasiyasının fəaliyyəti mənə həmişə çox maraqlı gəlirdi. Müsabiqədən sonra o fəaliyyətlə yaxından tanış oldum, hətta bir parçası oldum bu assosiasiyanın desəm daha doğru olar.

- Ləman xanım, Azərbaycanda gənc modelyerlər nə kimi problemlərlə üzləşirlər?

- Bu suala subyektiv cavab vermək istəyirəm. Düşünürəm ki, Azərbaycanda hələ də modelyer sənəti ilə dərziliyi və həmçinin stilistliyi qarışdırırlar. Bu modelyerlərin üzləşdiyi ən böyük problemdir. Həmçinin modelyerlərə olan inamsızlığı bizləri çox məyus edir.

- Azərbaycanda fabriklərin olmaması, yerli parçaların istehsal edilməməsi də yəqin ki, problemlər yaradır sizə?

- Təbii ki, çox istərdik ki, yerli parçalardan, Azərbaycanda istehsal olunan parçalardan istifadə edək. Artıq parça üçün ərəb ölkələrinə və ya xaricə üz tutmayaq.

Çünki sonuncu kolleksiyamdakı geyimlərin parçaları üçün mən Ərəb Əmirliklərinə səfər etməli oldum. Təbii ki, modelyer daim axtarışda olmalıdır. Ancaq ölkəmizin parça istehsalında inkişaf etdiyini görmək bütün modelyerlərin arzusudur. Çox istərdik ki, Şəkidəki İpək fabriki öz fəaliyyətini genişləndirsin və biz yerli parçalarımızla öz bacarığımızı göstərə bilək.

- Moda Assosiasiyasının prezidenti Zamir Hüseynov müsahibələrindən birində demişdi ki, bizdə modelyerlər pul udanda da xaricdə oxumağa deyil, ev, maşın almağa xərcləyirlər...

- Zamir bəylə təəssüf ki, mən də razıyam. Bir çox modelyerlər təcrübə qazanmaq əvəzinə müvəqqəti olacaq mükafatları üstün tuturlar. Halbuki o zaman təcrübəyə ayıracaqları kapital müvəqqəti mükafatları daimiyə çevirə bilərdi. Ancaq mən əminliklə söyləyə bilərəm ki, mən xarici ölkələrdə keçiriləcək təcrübə proqramını hər hansısa avtomobil və evdən üstün tuturam.

- Builki paltarından danışaq... Necə bir paltar olacaq? İp ucu verə bilərsən bizə?

- Bu il paltarları hazırlayarkən moda mərkəzi olan Fransa məni xüsusi təsir altına aldı. Yaratdığım obrazlar Fransız qadını obrazlarıdır. Təbii ki, Fransa dedikdə ağıla ilk gələn şlyapalardır. Hazırladığım geyimləri şlyapalarla tamamlamışam. Şlyapalarda istifadə olunan aksessuarlar üçün isə dəvəquşu fabrikinə və zooparka getməli olmuşam. Əminliklə deyə bilərəm ki, bu hazırlıq mərhələsini heç bir zaman unutmaram.

- Azərbaycan modelyerlərindən kimi peşəkar adlandırmaq olar? Kimi qəbul edirsən modelyer kimi?

- Hal-hazırda Azərbaycanda modelyerlərin sayı çoxalıb. Bu həm sevindirici haldır ki, bu sahəyə maraq artıb, həm də bir o qədər də xoş olmayan haldır. Çünki qeyri-peşəkarların da sayı artıb. Ancaq mən peşəkar modelyer kimi Gülnarə Xəlilovanın adını qeyd etmək istərdim. Hər zaman maraqlı işləri ilə diqqəti üzərinə cəlb edə bilib. Milli geyimlərimizdən ibarət kolleksiyalarını lap bəyənirəm. Düşünürəm ki, Azərbaycanda sırf milli geyimlər üzrə peşəkar modelyer Gülnarə Xəlilovadır.

- Builki qalibiyyətdən nə gözləyirsən?

- Əgər bir daha qalibiyyət nəsib olsa, təbii ki, çox şey gözləyirəm. Amma hələlik bu istəyim sirr olaraq qalsa daha yaxşı olar…

Sevinc Məmmədli

Həftə içi.- 2013.- 9 iyul.- S.8.