“Qarabağ bülbülləri“nin Novruz konserti

Murad Rzayev: "Məktəblərdə bayram konsertləri verməklə yanaşı, oradakı istedadlı uşaqları da ansambla cəlb edirik"

Dünyaşöhrətli "Qarabağ bülbülləri" ansamblın kollektivi Novruz Bayramı ərəfəsində məcburi köçkün məktəblərində ənənəvi konsert proqramlarını davam etdirir. Tanınmış musiqiçi, "Maarif xadimi" Murad Rzayevin rəhbərliyi ansamblı növbəti belə tədbirini Ağdam rayon 71 saylı köçkün tam orta məktəbində keçirib.

"Həftə içi"nin məlumatına görə, "Qarabağ bülbülləri" bayram münasibətilə orta məktəbin müəllim, şagird və valideynlərini təbrik edərək onların qarşısında geniş konsert proqramı ilə çıxış ediblər. Konsertdə ansamblın solistlərindən Təranə Hüseynova "Bayram gəlir", Zülfiyyə Cəbrayılzadə "Yaşa Azərbaycan", Dürdanə Sərdarqızı "Bayram axşamlarında", Pərviz Ağazadə "Min yaşasın", Elnur Əliyev "Qarabağ" mahnılarını ifa edib. Ansamblın ən kiçik solisti Məsud Eyvazlı isə "Qarabağ şikəstəsi" ilə iştirakçıları sanki düşmən tapdağı altında olan doğma torpaqlara aparıb.

Məktəbin direktoru Nailə Rüstəmova tədbirdəki çıxışında konsertin təşkilinə görə ansamblın bədii rəhbəri Murad Rzayevə və onun kollektivinə öz təşəkkürünü bildirib. O qeyd edib ki, milli bayramımız olan Novruzla bağlı məktəbin yaradıcı heyəti də yüksək səviyyədə hazırlaşıb: "Tədbirimizə şagirdlərimizin qabiliyyətlərini yoxlamaq üçün Murad müəllimi bir musiqiçi, sənətçi kimi məktəbimizə dəvət etmək qərarına gəldik. Amma Murad müəllim də sağ olsun, elə bil ürəyimizi oxuyubmuş, o bizi qabaqlayıb telefon edib dedi ki, "Qarabağ bülbülləri" ansamblının kollektivi məktəbimizdə bayram konserti keçirəcək. Biz çox şad olduq, onlar bayram ərəfəsində bizi xeyli ruhlandırdılar”.

Tədbirdə "Qarabağ bülbülləri"nin yaradıcısı və bədii rəhbəri Murad Rzayev də çıxış edib. O, ölkəmizin bütün bölgələrinə tez-tez belə konsertlər təşkil etdiklərini xatırladaraq gəncləri vətənpərvər olmağa, torpağı sevməyə çağırıb. Murad Rzayev daha çox məcburi köçkün məktəbliləri qarşısında çıxış etmələrini də bununla əlaqələndirib: "Xüsusilə də Ağdam köçkün orta məktəbləri ilə sıx əlaqə saxlayırıq. Biz təkcə bayram konsertləri vermirik, axtarışa çıxırıq, məktəblərdə təhsil alan istedadlı uşaqları tapıb ansambla cəlb edirik və onlara musiqinin, eləcə də muğamların sirlərini öyrədirik".

Qələndər Xaçınçaylı

Həftə içi.- 2013.- 19-27 mart.- S.8.