Yay turizmi mövsümü başlayır

Bu yay Azərbaycana gələcək turistlərin sayının 10 faiz artacağı gözlənilir

Azərbaycanın turizm obyektlərində yay mövsümü hazırlıqlara start verilib. Həmçinin ölkəmizə gəlmək istəyən turistlərin işini asanlaşdırmaq üçün onlayn viza rejiminin tətbiqinə də başlanılıb. Artıq turizm müəssisələrinin və aidiyyəti qurumların qarşıdakı mövsüm üçün planları və hədəfləri də bəllidir.

Mədəniyyət və Turizm Nazirliyinin mətbuat katibi İntiqam Hümbətov "Həftə içi"nə bildirib ki, Azərbaycanda turizmin inkişafı sahəsində qarşıya qoyulan əsas məqsədlər sırasında turizm ehtiyatlarının öyrənilməsi və onların genişləndirilməsi, turistlərin istirahəti, onların tələbatının ödənilməsi üçün zəruri olan xidmətlərin çeşidinin genişləndirilməsidir. Yeni hədəflərə turizm marşrutlarının artırılması, mədəni turizm, o cümlədən milli adət-ənənələrimizi, Azərbaycan xalqının tarixi-mədəni irsini, ayrı-ayrı regionların və şəhərlərin tarixini əks etdirən materialların nəşr edilərək yayılması da daxildir. Onun sözlərinə görə, ölkəmizi dünyada tanıtmaq məqsədi ilə Azərbaycan brendlərinin reklam-təbliğat və məlumat-sorğu fəaliyyətinin canlandırılması, beynəlxalq proqramlar çərçivəsində regional mədəni turizm marşrutlarının yaradılması və inkişaf etdirilməsi, beynəlxalq əməkdaşlığın genişləndirilməsi prioritet istiqamətlərdəndir. Sözügedən istiqamətdə mütəmadi işlərin görüldüyünü deyən İntiqam Hümbətov bildirib ki, hazırda Mədəniyyət və Turizm Nazirliyinin mütəxəsisləri turizm bölgələrində montorinqlər aparırlar: "Bu il ötən illə müqayisədə Azərbaycana gələn turistlərin sayında artım olacaq. Bunun səbəbi də var. Belə ki, son vaxtlar istər xidmətin keyfiyyəti, istərsə də infrastrukturun yaxşılaşdırılması sahəsində mühüm irəliləyişlər var. Həmçinin turizm mərkəzlərində ötən il qiymətlərdə endirim oldu. Bu sahədə sağlam rəqabət getdikcə artır ki, bu da həm xidmətin keyfiyyətinin yüksəlməsinə, həm də qiymətlərin aşağı düşməsinə gətirib çıxarır".

Xatırladaq ki, 2012-ci ildə Azərbaycana gələn xarici turistlərin sayı 2 milyon nəfəri ötüb. Ümumilikdə, 2006-cı ildən Azərbaycana gələn əcnəbilərin sayı 60 faizədək artıb. Bundan başqa, Azərbaycanda fəaliyyət göstərən mehmanxana və mehmanxana tipli komplekslərin sayı 500-ü keçib. İntiqam Hümbətov deyib ki, bu il Azərbaycana gələcək turistlərin sayında təxminən 8-10 faiz artım gözlənilir. Onun fikrincə, turizm Azərbaycanda yeni bir sahədir və ona görə də birdən-birə bu sahədə ideal şərait yaratmaq mümkün deyil.

İstirahət mərkəzlərinin kadrlarla təminatında da irəliləyişlərin olduğunu vurğulayan nazirlik sözçüsü bildirib ki, dövlətin dəstəyilə bu problemlər getdikcə həll olunur. Onun sözlərinə görə, Turizm Peşə məktəbinin yaradılması, xidmət sahəsində çalışan insanların Rayon Mədəniyyət və Turizm şöbələrində ixtisasartırma kurslarına cəlb olunması bu sektorun inkişafı üçün əlavə imkanlar açır: "Bölgələrdə turizm mövsümü ilə əlaqədar marşrutlar hazırlanır. Gəncə, Quba, cənub və digər bölgələrdə nazirliyin Turizm-İnformasiya mərkəzləri fəaliyyət göstərir və bu mərkəzlər turistlərlə, bölgələrə turist gətirən şirkətlərlə əlaqələr qurur, onlara marşrutlar təqdim edir".

"Kabab turizmi"ndən mədəni turizmə

Çimərlik turizminin inkişafına gəlincə, İntiqam Hümbətov qeyd edib ki, Azərbaycanda dəniz turizmi var, amma onun genişləndirilməsi məsələsindən məlumatsızdır. Onun sözlərinə görə, Azərbaycanda turizm sektorunun gənc olmasına baxmayaraq, bu sahədə irəliləyişlər var. Gələcəkdə isə bu sektor daha da inkişaf etdiriləcək: "Əsas hədəfimiz daxili və xarici turistlərin keçirdiyi vaxtın səmərəli təşkil olunmasına maksimum şərait yaratmaq, onların xidmətdən razı qalmasını təmin etməkdir. Biz təkcə "kabab turizmi" deyil, digər mədəni turizm xidmətləri göstəririk. İstəyirik ki, turistlər Azərbaycanın tarixi, milli-mədəni dəyərləri, abidələri, elmi barədə məlumatlı olsunlar. Yəni maksimum çalışırıq ki, nəinki turist, eləcə də Azərbaycana ezamiyyətə gələnlərə ölkəmiz barədə geniş məlumat verək. Elə şərait yaratmağa səy göstəririk ki, turistlər Azərbaycandan zəngin təəssüratla ayrılsınlar".

Nazirlik rəsmisi deyir ki, təmsil etdiyi qurum il ərzində 20-30 beynəlxalq sərgiyə qatılmaqla Azərbaycan haqqında müxtəlif dillərdə çap məhsulları yayır. Onun sözlərinə görə, həmin nəşrlərdə Azərbaycanın tanıtımı ilə bağlı zəngin məlumatlar olur: "Bəzən Azərbaycanda turizm sektorunun zəif inkişaf etdiyini deyirlər, bizi Türkliyə və digər ölkələrlə müqayisə edirlər. Ancaq nəzərə almaq lazımdır ki, belə dövlətlərin çoxillik təcrübəsi var. Bizdə isə turizm yeni sahədir. Düzdür, kadr təminatı və digər problemlər var. Ancaq inanırıq ki, onlar da getdikcə öz həllini tapacaq".

İntiqam Hümbətov elektron viza sisteminin tam formalaşdığını da diqqətə çatdırıb. Onun fikrincə, bu sistem ölkəmizə gələn turistlərin sayının artmasına səbəb olacaq.

Kadr problemi hələ də qalmaqdadır

Azərbaycan Turizm İnstitunun Turizm biznesinin təşkili və texnologiyası kafedrasının müdiri Bahadur Bilalov isə "Həftə içi"nə açıqlamasında bildirib ki, son illər Azərbaycanda turizmin genişləndiyini və inkişaf etdiyini deyir. Onun sözlərinə görə, xidmət sahələrində ildən-ilə qiymətlərin aşağı düşməsi də Azərbaycana gələn turistlərin sayının artmasına müsbət təsir göstərir: "Əvvəllər mehmanxana və mehmanxana tipli komplekslərin sayı az idi. Ancaq son dövrlər bu sahədə genişlənmə müşahidə edilir. Belə olan təqdirdə rəqabət mühiti yaranır ki, bu da bir tərəfdən xidmətin yüksəlməsinə, digər tərəfdən isə qiymətlərin aşağı düşməsinə gətirib çıxarır".

Bahadur Bilalov Azərbaycanda istirahət mərkəzlərinin çox olmasına baxmayaq, digər ölkələrə üz tutanların da sayında artım olduğunu söyləyib və bu tendensiyanı insanların maddi durumu ilə əlaqələndirib. Onun sözlərinə görə, turizm mərkəzlərində hələ də kadr problemi var və indi bu sahədə də təkmilləşmə işi aparılır.

Kadr probleminin əsasən mövsümi, yəni çimərlik turizmi mərkəzlərində hiss olunduğunu diqqətə çatdıran Bahadur Bilalov bildirib ki, belə yerlərdə daha çox püxtələşməmiş insanlar işə götürülür. Nəticədə də xidmətin keyfiyyəti standartlara cavab vermir: "Düşünürəm ki, bu problemlərin yaranmasının səbəbkarı istirahət mərkəzlərinin sahibləridir. Çünki xidmətin keyfiyyətinə onlar cavabdehdir. Əslində, onlar maraqlı olmalıdır ki, sahibi olduqları mərkəzlərə gələnlərin sayı daha da artsın. Eyni zamanda, sahibkarlar elə etməlidirlər ki, həmin istirahət mərkəzləri il boyu işləsin və oradakı kadrlar da peşəkar olsun".

Turistlərin gediş-gəlişi sistemin sadələşdirildiyini xatırladan kafedra müdiri düşünür ki, bu addım ölkəyə gələn turistlərin sayını artıracaq: "Bu sistemə turizm şirkətləri də qoşulub. Turizm şirkətləri turistlərə elektron şəkildə viza verməklə olnların gəlişini asanlaşdırır. Yəni Azərbaycanın səfirliyi olmayan ölkələrin vətəndaşlarına da elektron viza verilir və beləliklə, onların digər ölkələrdəki səfirliyimizə getməsinə ehtiyac qalmır".

Atif Sarıxanlı

Həftə içi.- 2013.- 7 may.- S.5.