Müşfiqabaddakı köçkün şəhərciyi genişlənir

Hazırda burada inşası davam edən edən daha 2 ədəd beşmçərtəbəli bina Yeni il ərəfəsində istifadəyə veriləcək

Qaradağ rayonunun Müşfiqabad qəsəbəsində məcburi köçkünlər üçün daha 2 ədəd beşmərtəbəli bina inşa edilir. Bu ilin mayında istifadəyə verilmiş şəhərcikdə inşa olunan təzə salınıb istifadəyə verilmiş köçkün şəhərciyinin ərazisində inşa olunan yeni binalarda inşaat işləri artıq 3-cü mərtəbədə davam edir.

"Həftə içi"nin əməkdaşı tikinti işləri ilə yaxından tanış olmaq məqsədilə həmin əraziyə baş çəkib. Burada iş icraçıları ilə söhbətdən məlum olub ki, hazırda tikintisi sürətlə davam etdirilən hər iki binanın ilin sonunadək istifadəyə verilməsi planlaşdırılır. Qaçqın və Məcburi Köçkünlərin İşləri üzrə Dövlət Komitəsinin Mənzil İstismarı Departamentinin Qaradağ rayon Mənzil-Kommunal İstismar Sahəsinin rəisi Daşqın Şamıyev əməkdaşımızı tikinti işləri ilə tanış edərək bildirib ki, iki ədəd beçmərtəbəli binanın inşasına bu ilin avqust ayından başlanıb. Onun sözlərinə görə, işlər olduqca sürətlə və keyfiyyətli şəkildə aparılır: "Bu binaların tikintisi 160 ailə üçün nəzərdə tutulub. 2013-cü ilin sonuna kimi binaların tikinti işləri başa çatdırılacaq və Yeni il ərəfəsində məcburi köçkün ailələrinə paylanılacaq. Yəni 160 köçkün ailəsi Yeni ili tikilən bu yaraşıqlı mənzillərdə keçirəcəklər".

Daşqın Şamıyev qış hazırlığı ilə bağlı görülən işlərdən də danışıb. Onun sözlərinə görə, Qaradağ rayonunun Müşfiqabad qəsəbəsindəki məcburi köçkün şəhərciyi 20 ədəd beşmərtəbəli binadan ibarətdir. Qaçqın və Məcburi Köçkünlərin İşləri üzrə Dövlət Komitəsinin Qaradağ rayon Mənzil-Kommunal İstismar Sahəsi burada 8 min köçkünə xidmət göstərir: "Ərazi böyükdür, bizim əsas işimiz həm də şəhərciyin ərazisində təmizliyə nəzarət etməkdir. Eləcə də yaşıllıqların qorunub-saxlaması və yeni ağac, kol və gül bitkilərin əkilməsi ilə də məşğul oluruq. Yay mövsümü ilə əlaqədar olaraq yaşıllıqların vaxtlı-vaxrında sulanmasına və onlara qulluq edilməsi sahəsində nəzarəti gücləndirmişik. Ərazilərə su xətləri çəkilib".

Payız mövsümünün başlanması ilə əlaqədar işlərinin bir qədər də çoxaldığını deyən Daşqın Şamıyev bildirir ki, oktyabr ayından şəhərciyin ərazisində ağacların əkininə başlanacaq. Onun sözlərinə görə, payız mövsümünün sonunadək burda təxminən 20 minə yaxın ağac və kolların əkilməsi nəzərdə tutulub: "Çalışacağıq ki, qəsəbənin yaşıllıq zolağı daha da böyük olsun. Bu, həm sağlamlıq, həm də qəsəbəni daha da gözəlləşdirilməsi deməkdir. Şəhərcikdə təmir və bərpa işlərinə də fikir veririk. Belə ki, sınan səkiləri, məhlədaxili yolun dağılan yerlərini cari təmir edirik. Artıq şəhərcik qış mövsümünə hazırdır. Şəhərciyin istilik təchizatı çox yüksəs səviyyədədir. Burada müasir tipli qazanxanalar quraşdırılıb. Artıq qazanxanalardan binalara gedən istilik xətlərinə baxış keçiririk, yoxlamalar aparırıq, ortalığa çıxan qüsurları aradan qaldırırıq. Yəni şəhərciyin istilik sistemində olan bütün nasazlıqlar tamamilə aradan götürülüb. Bir sözlə qazanxanalar, istilik sistemi saz vəziyyətdədir".

Həmsöhbətimiz onu da bildirir ki, hazırda gün ərzində mənzillərə fasiləsiz olaraq isti və soyuq su verilir. Daşqın Şamıyev məişət tullantılarının vaxtlı-vaxtında daşındığını da vurğulayır. Onun sözlərinə görə, ərazidə 100-dən çox yaxın müasir tipli zibil qutuları qoyulub: "Şəhərcikdə məcburi köçkünlərin yaşayışı üçün hər cür şərait yaradılıb. Məhəllədaxili mini-parklar salınıb. Uşaqların istirahəti üçün oyuncaqlar, yelləncəklər quraşdırılıb, oturacaqlar qoyulub. Sakinlər asudə vaxtlarını gəlib həyətlərindəki parkda səmərəli keçirirlər".

Xatırladaq ki, Qaradağ rayonunun Müşfiqabad qəsəbəsində məcburi köçkünlər üçün salınmış şəhərcikdə sosial xidmət müəssisələri də fəaliyyət göstərir. Belə ki, burada 1200 yerlik məktəb, 160 yerlik uşaq bağçası, mədəniyyət evi, poliklinika və yanğınsöndürmə məntəqəsi yaradılıb. Bu sosial xidmət müəssisələrinin hər biri kommunal xidmətlərlə təchiz olunub.

Bu ilin oktyabrında ölkədə keçiriləcək prezident seçkilərinə hazırlıqlardan danışan Daşqın Şamıyev bildirib ki, hazırda Qaradağ rayonunun Müşfiqabad qəsəbəsində məcburi köçkünlər üçün salınmış şəhərcikdə Ağdam, Füzuli və Cəbrayıl rayonlarının seçki məntəqələri də fəaliyət göstərir. Onun sözlərinə görə, həmin rayonların seçki məntəqələri tam şəkildə hazırdır. Belə ki, məntəqələrdə səsvermənin təşkili üçün hər cür şərait yaradılıb: "Məcburi köçkünlər seçkilərə daha fəal hazırlaşıblar. İnanırıq ki, onlar yekdilliklə seçkilərdə iştirak edib və istədikləri namizədlərinə səs verəcəklər. Qaçqın və Məcburi Köçkünlərin İşləri üzrə Dövlət Komitəsinin sədri cənab Əli Həsənov, sədr müavini Gəray Fərhadov və Mənzil-Kommunal İstismar Departamentinin sədri Pənah Əliyev vaxtaşırı şəhərciyə gəlir, tikinti işləri ilə maraqlanır, köçkünlərlə görüşlər keçirir, onların problemləri ilə maraqlanır və yerindəcə həll edrlər".

Həmsönbət olduğumuz məcburi köçkünlər isə onlara yüksək səviyədə göstərilən xidmət və qayğıya görə ölkə başçısına öz təşəkkürlərini bildirdilər.

Qələndər Xaçınçaylı

Həftə içi.- 2013.- 20 sentyabr.- S.7.