Öz qanı ilə rəsm çəkən rəssam

«Qeyri-adi məşhurlar» rubrikasında budəfəki qonağımız fitri istedadı ilə hər kəsi heyran qoyan Vasif Səftərovdur. Bu dəfə həm rəssam, həm oymaçı, həm də heykəltəraş kimi tanınan Vasifin qeyri-adi xüsusiyyətindən danışacağıq.

Təkcə Azərbaycanda deyil, bir çox xarici dövlətlərdə də əl işləri ilə kifayət qədər populyarlaşmış qonağımız bu günədək həm respublikamızda, həm də xarici ölkələrdə keçirilən sərgilərə qatılıb. Onun əl işləri ən yüksək mükafatlara layiq görülüb. O, indiyədək əl işlərini təqdim etdiyi müsabiqə və sərgilərdən 40 mükafat alıb. Onlardan 18-i birinci, 1-i ikinci dərəcəli diplomlar, yerdə qalanları isə təşəkkürnamələrdir. Vasifin indiyədək yalnız 2011-ci ildə Adil İsgəndərov adına Mədəniyyət Sarayında fərdi sərgisini keçirib. Rəssamlığı dəlilik adlandıran Vasif Səftərov bu sənətin qurban tələb etdiyini deyir. O, özünü də bu qurbanlardan biri hesab edir: «Çünki mən bədənimin bəzi yerlərini cızıram və oradan çıxan qanla şəkil çəkirəm. Qanın rəngi daha şəffaf olur. Düzdür, qan çıxan yerlərdə ağrılar olur. Amma qanımla çəkərək ərsəyə gətirdiyim əl işləri mənim çox xoşuma gəlir».

Vasif həmçinin ayağı ilə rəsm çəkməyi çox xoşlayır. Bildirir ki, ayaqla rəsm çəkməyə uşaqlıqdan başlayıb: «Uşaqlıq illərimdə rəsmləri həm sol, həm də sağ əlimlə çəkməyi öyrənmişdim. Amma bir dəfə televiziya kanallarından birində istedadlarla bağlı yayımlanan verilişdə əlil rəssamın ayağı ilə şəkil çəkməsini gördüm və insanın nələrə qadir olacağını uşaqkən düşünərək ayağımla rəsm çəkməyi məşq elədim. Hazırda həm hər iki əlimlə, həm də hər iki ayağımla eyni vaxtda müxtəlif rəsmləri çəkirəm».

Vasif Natiq adlı bir tanışının rəsmini ayağı ilə çəkə biləcəyini deyib və onun mərcə girib. Rəsmi çəkdikdən sonra Natiq portretini bəyənib: «Əl işimi çox bəyəndi. Xahiş etdi ki, ayağımla və əlimlə ora imza qoyum. Mən də onun xahişini yerinə yetirdim və portreti Natiqə bağışladım».

Təbriz Vəfalı

Həftə içi.- 2014.- 26 fevral.- S.8.