“Azercell” illik hesabatını açıqladı

Şirkət ötən il sosial layihələrə 400 min manat vəsait xərcləyib

Fevralın 27-də «Azercell Telekom» MMC ölkədə “İKT ili” elan olunmuş 2013-cü ilin nəticələrinə həsr edilən ənənəvi mətbuat konfransını keçirdi. Şirkətin prezidenti Kirill Qaburiç bildirib ki, «Azercell»in 2013-cü il üçün əsas nailiyyəti kimi bu müddət ərzində müxtəlif xidmətlərə, xüsusilə də mobil internetə görünməmiş həcmdə artan tələbatın müqabilində, şəbəkəsinin 20 faizə gədər rekord səviyyədə gücləndirilməsi hesab edilir.

Bu baxımdan, 2013-cü il ərzində «Azercell Telekom» 1200-dən artıq yeni baza stansiyası quraşdırıb ki, bunlar da bütün ölkə boyu səs xidmətləri və internet-rabitənin yüksək keyfiyyətini təmin etməkdədir. Beləliklə, 2013-cü ilin sonuna «Azercell Telekom» MMC-nin şəbəkəsi 5500 baza stansiyadan ibarət olub ki, onların da 260-dan çoxu məhz Bakı və Abşeron yarımadasını əhatə edən LTE (4G) şəbəkəsinə xidmət göstərir. Özü də yüksək internet sürəti ilə bərabər, CSFB sistemi üzərindən səsli rabitəni dəstəkləyir. 2013-cü ildə «Ookla Net İndex» tərəfindən aparılan araşdırmaların nəticələrinə əsasən, Azərbaycanda ən yüksək mobil internet sürətini məhz «Azercell» təmin edir. Bundan əlavə, hər ikinci abunəçinin fəal mobil internet istifadəçisi olduğu halda, «Azercell» abunəçiləri arasında mobil internetdən istifadənin artım göstəricisi 120 faizdən artıq olub.

Ötən il ərzində şəbəkənin genişləndirilməsinə yönələn səyləri və sərmayələri şirkət həm mövcud, həm də bu yaxınlarda qüvvəyə minən Mobil Nömrə Daşınması xidmətinin nəticəsində 4,5 milyon abunəçi ailəsinə qoşulan yeni müştərilərəgöstərilən xidmət səviyyəsinin qorunmasına və keyfiyyətinin artırılmasına olan daimi ehtiyacla əsaslandırır.

2013-cü il «Azercell» üçün, həmçinin, bir sıra digər yeniliklərlə də yadda qalıb. Onların arasında ölkəmizin telekommunikasiya bazarında mobil telefon vasitəsilə sənədləri imzalamağa və müxtəlif əməliyyatlar həyata keçirməyə imkan verən ASAN-İmza platformasının mobil cihazlarla inteqrasiyası kimi əhəmiyyətli hadisəni qeyd etmək olar. Bundan əlavə, keçən ilki Bakutel sərgisində «Azercell» evdəki bütün məişət proseslərini məsafədən, mobil telefon vasitəsilə idarə edilməsini mümkün edən və M2M texnologiyası əsasında fəaliyyət göstərən “Ağıllı Ev” adlı unikal bir yeniliyi nümayiş etdirmişdir. Ötən il ərzində şirkət 3G və 4G üzrə yeni və daha sərfəli paketlərlə bərabər, region üçün kampaniyalar, daimi, sərfəli regional tarif planı, müxtəlif endirim kampaniyaları və rominq endirimləri kimi bir sıra digər maraqlı təklifləri abunəçilərinə təqdim edib. Xüsusi olaraq bu faktı qeyd etmək lazımdır ki, yalnız 2013-cü il ərzində Azercell dünyanın 100-dən artıq operatoru ilə rominq tariflərini endirib.

Müştəriyə göstərilən xidmətin səviyyəsini daim təkmilləşdirən «Azercell», 2013-cü ildə də paytaxtda və regionlarda öz xidmət mərkəzləri şəbəkəsinin genişləndiriməsini davam etdirib. Hazırda müştəriyə abunə xidmətlərinin bütün çeşidini təqdim etməyə hazır olan 560-dan çoxmüxtəlif xidmət məntəqəsi fəaliyyət göstərir. Bü gün şirkətin mobil rabitə şəbəkəsi ölkə əhalisinin 99,8 faiz əhatə edir, abunəçilərin sayı isə 4,5 miyon nəfərə çatıb.

2013-cü ildə «Azercell» dövlət büdcəsinə təqribən 111 milyon manat, ölkədə fəaliyyət göstərdiyi 17 il ərzində isə 1 milyard manat vəsait ödəyib. Ötən il ərzində Azərbaycanda telekommunikasiyanın inkişafına təqribən 84,5 milyon manat, 17 il ərzində isə 1 milyard manat sərmayə yatırıb. Ötən illər ərzində olduğu kimi, «Azercell» bu gün də ölkənin qeyri-neft sektorunun ən böyük sərmayədarıdır. 2013-cü il ərzində şirkət öz əməkdaşlarının peşəkar inkişafına 1 milyon manat sərmayə yatırıb. «Azercell», həmçinin, sosial layihələrin də həyata keçirilməsinə xüsusi diqqət ayırıb və bu istiqamətə 400 min manat vəsait xərcləyib. Digər təşəbbüslərlə bərabər, şirkət ölkənin internatməktəbləri üçün mahiyyətçə yeni bir layihə həyata keçirib. Gənc nəslə dəstək çərçivəsində «Azercell»in Barama İnnovasiya Mərkəzi gənc sahibkarlar üçün iki irimiqyaslı beynəlxalq Start-up müsabiqələri reallaşdırıb.

Müştərilərə göstərilən on-line xidmətlər üzrə ən yüksək göstəricilərlə bərabər, «Azercell» 2013-cü ildə də sosial şəbəkələrdə ölkənin ən populyar brendi adını (“Socialbakers” şirkətinin reytinqinə əsasən) qoruyub saxlaya bilib. «Azercell Telekom» MMC Mobil Nömrənin Daşınması xidmətinin tətbiqinin başlanması ilə mövcud və yeni abunəçilərin faydasına istiqamətlənmiş müxtəlif endirimli kampaniyalar, eləcə əd tariflər təqdim etməklə, 2014-cü ildə öz fəaliyyətini uğurla davam etdirir.

1996-cı ildə təsis edilən «Azercell Telekom» MMC fəaliyyətinin ilk illərindən bazarda lider mövqeyini saxlayır. Bir sıra innovativ texnologiya və konsepsiyaları ilk dəfə Azərbaycana «Azercell» gətirib: GSM texnologiyası, öncədən ödəmə mobil xidmətləri, GPRS/EDGE (mobil internet), 24/7 Telefon Mərkəzi, tam xidmət göstərən «Azercell Ekspres» ofisləri, mobil elektron xidməti “ASAN İmza” və s. Azərbaycanın mobil rabitə bazarındakı payı 53 faiz olan «Azercell»in şəbəkəsi ölkə əhalisinin 99,8 faizini əhatə edir. 2012-ci ilin sonuna Azercell abunəçilərinin sayı 4,5 milyon nəfər təşkil edib. 2011-ci ildə «Azercell» 3G, 2012-ci ildə isə 4-cü nəsl şəbəkəsi olan LTE xidməti göstərməyə başlayıb. «Azercell» Azərbaycanın mobil rabitə sənayesinin lideri və qeyri-neft sektorunun ən böyük sərmayədarıdır. «Azercell» dünyanın 20 ölkəsində fəaliyyət göstərən, ümumilikdə 186 milyon abunəçiyə xidmət edən və 27 min əməkdaşı olan TeliaSonera şirkətlər qrupunun bir hissəsidir.

Vüsal Tağıbəyli

Həftə içi.- 2014.- 28 fevral.- S.8.