Tural Bakuvinin həyatında

dərin iz buraxan hadisələr

Azərbaycanın gənc bəstəkarlarından olan Tural Bakuvi Hafta.az-a müsahibəsində həyat və yaradıcılığı haqqında danışıb.

- Tural Bakuvi kimdir?

- Həyatın əbədi olmadığı bir dünyada bəstələri, sənəti və melodiyaları ilə daim yaddaşlarda yaşamaq istəyən bəstəkardır.

- Bakuvi ləqəbi necə oldu yarandı?

- Tarixdə rast gəlmək olar ki, tanınmış alim, şair, din xadimi, mütəfəkkir və.s doğulduqları və yaxud yaşadıqları yerin adını özlərinə ləqəb kimi götürüblər. Mən də doğulduğum və yaşayıb-yaratdığım yerin adını özümə ləqəb kimi seçdim, lakin bir qədər klassik formada. Bakuvi ləqəbi də belə yaranıb. Bakuvilərə də Əbdül Rəşid Əl Bakuvi, Baba Kufi Bakuvini göstərmək olar. Onlardan ən dərin iz buraxanı Seyid Həhya Bakuvidir.

- Həyatında ən dərin iz buraxan hadisə hansı olub?

- Adətən insanın həyatında iz buraxan hadisə uşaqlıq dövrünə aid olur. Neqativlər isə daha dərin iz buraxır. Şübhəsiz bu hadisələr məndə də olub. Gəlin buna hadisə deməyək, dönəm olsun. Sovet dövründə atam Keşlə Maşınqayırma Zavodunun rəisi olub. Sovet İttifaqı dağılandan sonra zavod da fəaliyyətini dayandırdı. Bundan sonra bizim ailənin həyatında maddi cəhətdən çətin anlar başladı. Hətta həmin dövrdə yanacaqdoldurma məntəqəsində işləmişəm. Düşünürəm ki, çətinliklər məni ayaqda bu qədər möhkəm durmağı öyrədib. O hadisələr mənim indi qurmaqda olduğum həyatın bünövrəsini təşkil edib.

- Bəstəkarlıq sahəsinə maraq haradan əmələ gəldi?

- 14-15 yaşlarımda hiss etdim ki, musiqi yazmaq tələbatı yaranıb. Bundan sonra mahnılar yazmağa başladım. İndiki konteksdən baxanda onları mahnı adlandırmıram. Söz yığını və not ardıcıllığı (gülür).

- Ailədə səndən başqa bu sahəyə maraq göstərən varmı?

- Ailəmizdə musiqi duyumu hamıda var. Sadəcə, peşəkar deyil. Böyük qardaşım Vüsal jurnalistdir. “Lider” televiziyasında işləyir və həm də Azvision.az saytının baş redaktorudur. Babam da qarmon çalmağı və muğam oxumağı bacarıb.

- İlk bəstən yadındadır?

- Əlbəttə, yadımda qalıb. “Niyə sevdin məni” adlı mahnıydı. Qardaşım Ramal da oxumuşdu. O vaxt onun 10-11 yaşı var idi. Hətta gedib “Səbuhi” studiyasında mahnını yazmışdıq. Sonda qərar verdik ki, ehtiyac yoxdur. Baxmayaraq ki, həmin dövrdə o tip mahnılar dəbdə idi.

- İlham pərisinin gəldiyini necə bilirsən?

- Bilirsiz, bunu təfərrüatı ilə izah edə bilməyəcəm. Çünki bu fiziki hal deyil. Məsələn, gecə uzandığın zaman hiss edirsən ki, içində mənəvi bir proses gedir. Onu sən məntiqi bir yekuna çatdırmalısan. Şairsən şeir yazmalısan, rəssamsan rəsm çəkməlisən, bəstəkarsansa durub mahnı yazmalısan. Onu yazıb bitirməyənə kimi sənə yuxu haramdı. Bu təbii haldı. Bu zaman mahnılar da tez yazılır.

Elə mahnılar olur ki, bilirsən ki, bunu yazmalısan. Məsələn, Seyid Yəhya Bakuvi haqqında olan film. Bunun üçün köklənirəm həmin dövrə və özümü Şirvanşahlar sarayında mürid kimi hiss edirəm. Müasir sivilizasiyadan əlaqəmi kəsirəm. Buna daha çox vaxt lazım olur.

- Bu sahədə hansı mükafatların var?

- 2012-ci ildə Yeni Azərbaycan Partiyasının Xəzər rayon şöbəsi tərəfindən “İlin Bəstəkarı” adına layıq görülmüşəm. Ondan sonra rəsmi formada ciddi bir mükafat olmayıb.

- Televiziyaya baxırsan?

- Şübhəsiz ki, mən də bir ailə başçısı kimi gündəmi izləmək üçün baxıram. Amma çox da vaxtım olmur.

- Hansı verilişləri izləyirsən?

- Vaxt olanda adətən insanın dünya görünüşünü artıran Discovery, National Geographic kanalının verdiyi verilişlərə baxıram. Bir də idman verilişlərini izləyirəm. “Neftçi” klubuna azarkeşlik edirəm.

- Bəstəkar olmasaydın hansı sahədə çalışardın?

- Düşünürəm ki, yaxşı tarixçi olardım. Mənim ikili ixtisasım var. Musiqiçilik və tarix. Musiqi daha üstün gəldi deyə bəstəkar oldum.

- Siyasətçi ola bilərdin?

- Ola bilərdim. Amma düşünmürəm ki, uğur qazana bilərdim. Çünki o bir az insanlardan ikili standartlarla fəaliyyət göstərməyi tələb edir. Mən də onu çox da yaxşı bacarmıram.

- Səni ən çox nə əsəbiləşdirir?

- Məni ən çox əsəbiləşdirən “küstah” insanlardır. Haqqsız olduğu halda özlərini elə müdafiə edirlər ki, donub qalırsan. Bir də kiminsə kimdən sui-istifadə etməyini sevmirəm. Təbii ki, kimsə məndən istifadə etmək istəyəndə mən onu gözəl görürəm.

- Bəs səni nə sevindirir?

- Məni ən çox sevindirən qızlarımdır. Bir də yazdığım mahnım son nəticə etibarilə yaxşı oxunursa, hazırlanıbsa bu, məni sevindirir.

- İndiyə kimi hansı müğənnilərlə işləmək sənə xoş olub?

- Mən deyərdim ki, Nazpəri xanımla işləmək xoş olub. Flora xanımla indiyə kimi üç mahnı işləmişik. Hazırda daha üç mahnı üzərində çalışırıq. Flora xanımla işləmək məsuliyyət tələb edir. Günay İbrahimli, Ramal Rəsul, Rövşən Çibişov, Zaur Əmiraslanovla işləmək xoş olub. Hazırda Nurlan Əzizbəyli, Orxan Babazadə, Qismət qrupu ilə də işləyirik. Adları bir-bir sadalasam, uzun olacaq. Tanınanı da var, tanınmayanı da.

- Hazırda hansı iş üzərində çalışırsan?

- Son işimiz Adil Azayın “Seyid Yəhya Bakuvi” filmi üçün bəstədir. Bunu artıq bitirmişik. Daha iki film də var ki, yeni sezondan yayımlanacaq, onların üzərində çalışırıq.

Ruslan Bakiroğlu

Həftə içi.- 2014.- 5 iyun.- S.8.