Fidan Hacıyeva Londonda solo konsert verdi

“Yazın səsi” konsert proqramının iştirakçısı olaraq yaz ətirli ifaları dinləmək hər kəsə nəsib olan xoşbəxtlik deyil. Onun könülləri oxşayan, bənzərsiz və məlahətli səsinin sorağı bu dəfə uzaq Londondan gəldi. Həmişə olduğu kimi, yenə də onu dinləməyə gələnlərin sayı nəzərdə tutulduğundan qat-qat çox idi. Hamı səbirsizliklə ecazkar səsə malik bu vokalçının səhnəyə çıxacağı anı gözləyirdi...

Xəbər verdiyimiz kimi, Novruz bayramı ərəfəsində Mədəniyyət və Turizm Nazirliyinin və Azərbaycanın Böyük Britaniyadakı səfirliyinin birgə dəstəyi ilə Londondakı “King`s Place” incəsənət mərkəzində Azərbaycan Dövlət Akademik Opera və Balet Teatrının solisti, Əməkdar Artist Fidan Hacıyevanın “Yazın səsi” adlı ilk solo konserti təşkil olunmuşdur.

Böyük Britaniyanın paytaxtındakı 400 nəfərlik zalda geniş konsert proqramı ilə çıxış edən Fidan Hacıyeva ifası ilə könülləri fəth etmişdir.

Konsertdə Fidan Hacıyevanı pianoçu Zülfiyyə Sadıqova müşayiət etmişdir.

Həmişəki kimi, o, bu dəfə də səhnəyə böyük ürəklə çıxdı. Elə ilk ifadan tamaşaçı sevgisinin tükənməzliyini ona ünvanlanan alqışlardan duyub hiss etdi. Bu dəfə də F.Hacıyeva ifaları ilə əsl vətənpərvər Azərbaycan qızı olmasını bir daha nümayiş etdirməyi bacardı.

Yüksək səviyyədə təşkil edilmiş konsertə təşrif buyurmuş insanların çoxu klassik musiqi vurğunları olan ingilislər idi. İki saatlıq konsert proqramında Fidan Hacıyeva böyük bəstəkarlarımız Müslüm Maqomayevin ”Azərbaycan”, Rauf Hacıyevin “Sevgilim”, Üzeyir Hacıbəylinin “Arşın mal alan” operettasından hissələri üç dildə - Azərbaycan, rus və ingilis dillərində ifa etdi. Bununla yanaşı, onun ifasında Üzeyir Hacıbəyli, Cövdət Hacıyev, Tomas Arne, Friderik Şopen kimi dünya şöhrətli bəstəkarların repertuarından musiqilər səsləndirildi.

Azərbaycan klassik musiqisini müxtəlif dillərdə, yüksək peşəkarlıq və ustalıqla ifa edən müğənni izləyicilər tərəfindən dəfələrlə ayaq üstə alqışlandı. O, bununla bir daha musiqimizi təntənəli formada təqdim və təbliğ etməyi bacardı.

Fidan oxuyanda sanki göylər oxuyur, səma musiqisi səslənir, insan qəlbinin telləri onun səsi ilə həmahəng titrəməyə başlayır. Çünki Fidan bütün qəlbi, varlığı ilə oxuyur, səs çalarlarının özəlliyini, tələffüz etdiyi hər bir sözün mənasını, hər bir ahəngi dinləyiciyə çatdırmağa çalışır.

Məsuliyyətli olduğu qədər də çətin bir işin öhdəsindən uğurla, yorulmadan gəlməyi bacaran Azərbaycanın vokal ifaçısını ayaq üstə qarşılayan tamaşaçılar yenidən onu səhnəyə dəvət etdilər. İkihissəli gərgin konsert proqramından sonra, səsində zərrə qədər də olsun yorğunluq hiss olunmayan Fidan Hacıyeva yenidən onu sevənlər üçün oxudu.

Yuxularından birinin də gerçəkləşdiyini söyləyən Fidan Hacıyeva deyir: “Bu, təkcə mənim deyil, bütünlükdə Azərbaycanın uğurudur. Bu gün dünyanın hansı səhnəsində çıxış edirəmsə, ilk olaraq Vətənimi düşünür və onun musiqisini təbliğ etməyimlə qürur duyuram. Əgər az da olsa mənsub olduğum xalqı tanıda bilirəmsə, bu mənim üçün böyük fəxrdir”.

Konsertdə iştirak edən Azərbaycanın Böyük Britaniyadakı səfiri Fəxrəddin Qurbanov ölkəmizin musiqi mədəniyyətinin dərin tarixi köklərindən, yüksək peşəkarlığı ilə həmişə dinləyici qəlbinə yol tapan, istedadlı vokalist Fidan Hacıyevanın yaradıcılıq uğurlarından geniş söz açmışdır.

Azərbaycan musiqisinin hazırda bütün dünyada özünəməxsusluğu ilə seçildiyini söyləyən diplomat Şərqdə ilk operanı məhz azərbaycanlı sənətkarın yazdığını xüsusi vurğulamışdır.

Konsertlə bağlı təəssüratlarını bölüşən “Azərbaycan Evi”nin nümayəndəsi Fəridə Pənahova bu konsertə ötən ilin sentyabrından hazırlıq işləri görüldüyünü bildirmişdir. Onun sözlərinə görə, konsertin əsas məqsədi Azərbaycan musiqisini və musiqiçilərimizi ingilis auditoriyasına tanıtmaqdır. F.Pənahova demişdir: “Düşünürəm ki, biz məqsədimizə çox yüksək səviyyədə nail olduq. Konsertdə sənətsevərlərlə yanaşı, çoxsaylı səfirliklərdən nümayəndələr də iştirak etmişlər. Eyni zamanda, konsertə xüsusi olaraq musiqi tənqidçiləri də dəvət edilmişlər. Müvəffəqiyyətlə baş tutan konsertdə iştirak edən hər bir tamaşaçı bu gecədən çox razı qaldı. Tamaşaçılar hətta Fidan xanımın bir də nə zaman İngiltərədə konsert verəcəyini xəbər alırdılar. Həqiqətən də həmin gün Londonda Azərbaycan klassik musiqisinin təntənəsi yaşandı və bu, hər bir azərbaycanlının ürəyindən xəbər verirdi. Qonaqlar Fidan Hacıyevanı “qızıl səsli” sənətkar adlandırdılar. Azərbaycanlı pianoçu Zülfiyyə Sadıqova haqqında isə dedilər ki, onun əlləri sanki dəniz dalğasıdır.”

Səfər müddətində Fidan Hacıyeva ingilislər tərəfindən eyni proqramla 2014-cü ilin iyununda “Royal Opera House”da çıxış etmək təklifi almışdır. Eyni zamanda, bir sıra təkliflər alan azərbaycanlı ifaçı vaxtı gəldikcə bu təklifləri dəyərləndirəcəkdir.

Qeyd edək ki, Fidan Hacıyeva opera teatrının solisti olanda cəmi 19 yaşı vardı. O vaxt o, Jorj Bizenin eyniadlı operasında Karmenin rəfiqəsi Mersedesin partiyasını ifa etmişdir. Cəmi iki il sonra isə ona artıq Karmenin çox mürəkkəb partiyasını etibar etdilər və Fidan Hacıyeva bu rolun ən gənc ifaçısı oldu. Karmen rolu gənc müğənni üçün bir növ vizit vərəqəsinə çevrilmişdir. Məsələn, Türkiyənin Mersin Opera və Balet Teatrının dəvəti ilə o, Mersində, həmçinin İstanbul, İzmir, Ankara teatrlarının səhnələrində Karmen rolunu ifa etmişdir.

Onun ən yaddaqalan çıxışı isə Türkiyədəki “Aspendos” antik teatrının səhnəsində, açıq səma altında, opera sənətinin biliciləri və həvəskarları olan ən incə zövqlü 15 min tamaşaçının toplaşdığı günlə bağlıdır.

O, Azərbaycan opera səhnəsində “Aida”da Amneris, “Trubadur”da Azuçena, “Riqoletto”da Maddalena, Cüzeppe Verdinin “Traviata”sında Flora, Cakomo Rossininin “Seviliya bərbəri”ndə Rozina, Maskanyinin “Kənd namusu” əsərində Santuttsi, Üzeyir Hacıbəylinin “Arşın mal alan” operettasında Asya, Fikrət Əmirovun “Sevil” operasında Gülüş obrazlarını yaratmışdır.

Azərbaycan musiqisinin təbliğini özünün ömür kredosuna çevirən Fidan Hacıyeva hər bir çıxışı ilə tarix yazır. O, bu tarixi ürəklə, sevgi ilə, Tanrının ona bəxş etdiyi istedadın bütün çılpaqlığını göstərməklə yazır. Məhz bu səbəbdən də harada çıxış etməsindən asılı olmayaraq, onun ifası sonsuz sevgi ilə qarşılanır. İnanırıq ki, Londonda olduğu kimi, digər şəhərlərdə də Fidan Hacıyevanın bənzərsiz ifalarını dinləyib, bu qeyri-adi istedadı ayaq üstə alqışlayanların sayı yetərincə olacaqdır.

Bir sözlə, Əməkdar Artist Fidan Hacıyeva hələ neçə-neçə yaz ətirli, bahar müjdəli uğurları ilə xalqımızı sevindirəcəkdir.

Həftə içi.- 2014.- 15-17 mart.- S.8.