Vətəndaşlara göstərilən səyyar xidmətlər

Azərbaycanda müxtəlif qurumların təşkil etdiyi

bu xidmətlər vətəndaşların işini xeyli asanlaşdırıb

Bu gün dünyada informasiya texnologiyalarının inkişaf etməsi bir sıra sahələrə yeniliklər gətirib. Məsələn, artıq insanlar yeni texnologiyalar hesabına dünyanın istənilən nöqtəsində yaşayan tanışları, qohumları ilə görüntülü danışıq qururlar, evdən çıxmadan alış-veriş edirlər, kommunal xidmət haqqı ödəyirlər, məmurların qəbuluna düşmək üçün növbəyə yazılırlar, hansısa sənədi imzalayırlar və s. Yəni, bu sahənin inkişafı texnoloji yeniliklərin miqyasını durmadan genişləndirir. Hətta indi mütəxəssislər insanları əvəz edə biləcək robortlar hazırlamağa cəhd göstərirlər.

Qeyd edək ki, bu gün Azərbaycanda da ən son texnoloji yeniliklərə yüksək maraq var. Artıq insanlar bu yeniliklər vasitəsilə öz vaxtlarına maksimum dərəcədə qənaət edirlər. Son illər bəzi dövlət qurumlarının yaratdığı mobil ofislər isə vətəndaşların işini xeyli asanlaşdırıb.

Məsələn, ötən il “İnformasiya-kommunikasiya texnologiyaları ili” çərçivəsində “Azərpoçt” MMC-nin təşəbbüsü ilə ölkə əhalisinə qısa vaxt çərçivəsində yüksək səviyyədə xidmət göstərmək üçün “Mobil Xidmət” xidmət növü fəaliyyətə başlayıb. Bunun üçün xüsusi modernləşdirilmiş avtonəqliyyat maşınları alınıb. Bu nəqliyyat vasitələri mobil, yəni səyyar poçt xidmətlərinin göstərilməsi üçün nəzərdə tutulur. “Mobil Xidmət” vasitəsilə artıq respublikanın poçt şöbəsi olmayan ərazilərində əhali poçt xidmətlərindən, eyni zamanda, maliyyə xidmətlərindən rahat istifadə etmək imkanına malikdirlər. Bu məqsədlə nəqliyyat vasitələrində POS-terminallar quraşdırılıb, kompüterlə təchiz edilib, sistem avadanlıqları şəbəkəyə qoşulub. Bir sözlə, poçt sistemində istifadə olunan istənilən texniki avadanlıqlar bu maşınlarda mövcuddur. Xüsusilə nəqliyyat vasitələrinin fövqəladə hallar zamanı, poçt xidmətlərinin istifadəsinin mümkün olmadığı şəraitdə fəaliyyəti nəzərdə tutulub.

Azərbaycanın «ASAN»ı

Amma vurğulamaq yerinə düşər ki, hazırda ölkəmizdə vətəndaşlara göstərdiyi səyyar xidmətin miqyasına və keyfiyyətinə görə dövlət qurumları arasında «ASAN xidmət» mərkəzi öndə dayanır. Belə ki, Azərbaycan brendi olan bu qurum ötən il demək olar ki, bütün bölgələrdə vətəndaşlara səyyar xidmət göstərib. Bu il isə səyyar avtobuslar yenidən bölgələri gəzməyə başlayıb. Hazırda «ASAN xidmət»in avtobusları Kürdəmir rayonundadır. Aprelin 29-dan mayın 8-dən bu rayonunun 105 000-dən çox sakini səyyar "ASAN xidmət"dən yararlana biləcəklər. Səyyar şəkildə göstərilən xidmətlər Azərbaycan Respublikasının Ədliyyə Nazirliyi, Daxili İşlər Nazirliyi, Dövlət Torpaq və Xəritəçəkmə Komitəsi, Dövlət Sosial Müdafiə Fondu və Əmlak Məsələləri Dövlət Komitəsi tərəfindən təqdim olunur. Bu xidmətlər notariat fəaliyyəti, şəxsiyyət vəsiqələrinin verilməsi və dəyişdirilməsi, ümumvətəndaş pasportlarının verilməsi və dəyişdirilməsi, sürücülük vəsiqələrinin dəyişdirilməsi,torpaq kadastrı məlumatları barədə arayışların verilməsi, əmək pensiyalarının təyin edilməsi, mənzillər üzərində mülkiyyət hüquqlarının ilkin və təkrar dövlət qeydiyyatına alınması barədə çıxarışların, texniki pasportların verilməsi, daşınmaz əmlakın təsvirinə, dövlət qeydiyyatına alınmış hüquqlara və onların məhdudlaşdırılmasına (yüklülüyünə) dair dövlət reyestrindən arayışların verilməsi, fərdi yaşayış evləri üzərində mülkiyyət hüquqlarının təkrar dövlət qeydiyyatına alınması barədə çıxarışların, texniki pasportların verilməsindən ibarətdir. 2014-cü dekabr ayına qədər isə səyyar "ASAN xidmət" vasitəsi ilə 35 məntəqədə 41 rayonun sakinlərinə müvafiq xidmətlərin həyata keçirilməsi nəzərdə tutulur.

Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin sektor müdiri Anar Hüseynov «Həftə içi»nə açıqlamasında deyib ki, «ASAN xidmət» mərkəzinin avtobusları hazırda səyyar şəkildə Azərbaycanın rayon və kəndlərində vətəndaşlara xidmətlər göstərir. Mərkəzin kompüterləri internet şəbəkəsi ilə təchiz edilib, vətəndaşların burada bütün növ elektron xidmətlərdən yararlanması üçün hər cür şərait yaradılıb: «Hazırda 2 avtobusumuz fəaliyyətdədir.Asan xidmət avtobusları əsasən İT infrastruktur cəhətdən diqqəti cəlb edir. Ultra şirkətinin texniki dəstəyi ilə təşkil olunmuş İT avadanlıq və bütün mobil vasitələr unikallığı, səmərəliyi ilə “Asan xidmətin” personalına və bu xidmətdən istifadə edəcək vətəndaşlara xususi imkanlar verir. Hərəkət edən ofislər başlıca olaraq maksimal mobilliyi ilə və rəddədavamlığa, gərginliyə dayanıqlılığına görə seçilir. IT infrastruktrun simsiz avadanlıqla təşkil olunması bu layihədə muhüm rol oynayıb. Sistemin fasiləsiz işini təşkil etmək məqsədilə qeyri-ənənəvi enerji mənbəyi olan və avtobusun üst hissəsində quraşdırılmış günəş batareyalarından istifadə olunub. Bundan başqa bütün periferiya qurguları mobil şərtlərdə işləməyə imkan verən və əməkdaşların rahatlığına uyğunlaşdırılıb».

Qurum rəsmisi həmçinin vurğulayıb ki, hər işçi stolu muasir daşınabilən noutbuk , HP Envy seriyalı çoxfunksiyalı mobil printer, Cisco İP telefonları, növbə sistemini və video nəzarət sistemini təşkil edən mobil komponentlər kimi müasir avadanlıqlarla təchiz edilib. Regional və mərkəzi ASAN ilə əlaqəni təmin etmək üçün avtobusda Cisco marşrutizatoru və komutatoru, HP ProLiant DL300 seriya server avadanlığı kimi müasir avadanlıqlar yerləşdirilib. Eyni zamanda avtobus fasiləsiz qeydiyyat aparmağa və məsafədən baxışa imkan yaradan yüksək keyfiyyətli CCTV kamera və mərkəzi video qeydiyyat sistemləri ilə təchiz olunub. Avtobusun yuxarı hissəsində xüsusi LED panel quraşdırılıb. O, məlumat displeyi kimi istifadə edilir və burada vətəndaşlar üçün dövlət rüsumları, asan xidmətləri, həmçinin növbə sistemi barədə lazımi məlumatlarəks olunub. Əlaqə xətlərinin keyfiyyətini nəzərə alaraq sputnik əlaqəsi, mobil 3G şəbəkə kimi müasir qabaqcıl simsiz texnologiyalardan istifadə edilib.

«AtaMatik" bankomat olmayan əraziləri gəzir

Azərbaycanda dövlət orqanları ilə yanaşı, özəl qurumlar da vətəndaşlara səyyar xidmət göstərməkdə maraqlıdırlar. Məsələn, ötən il "AtaBank" ASC ucqar bölgələrdəki vətəndaşlar üçün səyyar bankomat xidməti olan "AtaMatik"i istifadəyə verib. Bankın Marketinq Departamentinin direktoru Sənan Mahmudov qəzetimizə açıqlamasında deyib ki, artıq bütün bölgələrdə səyyar bankomat xidməti təqdim olunub. Onun sözlərinə görə, "AtaMatik"in imkanları bankomat xidməti ilə məhdudlaşmır: «İlk dəfə bu xidməti Şəmkir və Gədəbəy rayonları ərazisində istifadəyə verərək sosial işçilərə, müəllimlərə və dövlət qulluğundakı digər işçilərə, eləcə də sadə vətəndaşlara plastik kartlardan istifadədə rahatlıq təqdim etdik. Bundan sonra "AtaBank" ASC "AtaMatik"i müntəzəm cədvəllə işə salaraq bölgədəki sosial işçilərə daha yaxın olmağa başladı. Vətəndaşlar, "AtaMatik" avtomobilləri içərisinə quraşdırılan lazımi avadanlıqlar və təyin olunan əməkdaşlar vasitəsilə bütün bank işlərini rahatlıqla görə bilirlər. Təbii ki, layihənin əsas məqsədi də bank xidmətləri göstərilməyən, bankomatlar quraşdırılmayan ərazilərdə əhaliyə bu xidmətləri səyyar şəkildə göstərməkdir».

Qurum rəsmisi onu da deyib ki, səyyar bankomat xidmətinə vətəndaşlar arasında yüksək maraq olduğundan sözügedən qurğunun texniki imkanları daha da genişləndirilib: «Bu məqsədlə xüsusi, yüksək təhlükəsizlik qabiliyyətinə malik və daxilində bankomatlar quraşdırılmış 3 ədəd avtomobilimiz var. Avtomobillər fasiləsiz enerji təchizatı üçün generator, işıqlandırma və rahat istifadə üçün digər lazımi qurğularla təmin olunub. Eyni zamanda, bu qurğunun xidmətindən 24 saat istifadə etmək mümkündür".

Yeri gəlmişkən xatırladaq ki,ölkəmizdə ilk dəfə səyyar xidmət «Azercell» Telekom MMC tərəfindən təqdim olunub. Blə ki, 2009-cu ildə şirkət Mobil Diş Klinikasını yaradaraq səyyar şəkildə vətəndaşlara xidmət göstərib. 2011-ci ildə isə «Azercell» Telekom MMC növbəti faydalı və orijinal layihəyə imza ataraq Mobil Göz Klinikası istifadəyə verir. Səyyar klinika məxsusi olaraq bu layihənin icrası üçün alınmış avtobusda fəaliyyət göstərib. Həmin avtobus gözlərin müayinəsinin aparılması üçün zəruri olan modern tibbi avadanlıqla təchiz olunub. Layihənin məqsədi valideyn himayəsindən məhrum olan uşaqlarda göz xəstəliklərinin profilaktikasının aparılması, onların hərtərəfli müayinəsinin təşkilini təmin etmək olub.

Sevinc

Bu yazı Azərbaycan Respublikası Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun maliyyə dəstəyi əsasında hazırlanıb.

Həftə içi.- 2014.- 1 may.- S.6.