Qaraçuxurda park və

xiyabanlar müasirləşir

İxtiyar Nəcəfov: “Qısa vaxtda bələdiyyənin vəsaiti hesabına

bir abidə və iki xiyabanda əsaslı təmir işləri aparmışıq”

Paytaxtın ən böyük yaşayış massivlərindən biri olan Qaraçuxur qəsəbəsində abadlıq, tikinti-bərpa işləri geniş vüsət alıb. Təkcə son iki ay ərzində qəsəbə ərazisində yerləşən “Şəhidlər unudulmur” abidə kompleksi, “Veteranlar xiyabanı” və “Vətən şəhidləri unudulmur” abidəsində böyük abadlıq və bərpa işləri aparılıb.

“Həftə içi”nin əməkdaşı olaraq bu yenidənqurma işləri ilə yaxından tanış olmaq məqsədilə həmin qəsəbəyə baş çəkdik. Əvvəlcə yolumuzu Cəlal Qurbanov küçəsindəki “Şəhidlər unudulmur” abidə kompleksindən saldıq. Sakinlərlə söhbətdən məlum olur ki, bu kompleks uzun illər baxımsız qalıb. Bu yaxınlarda isə yerli bələdiyyənin vəsaiti hesabına həmin kompleksdə əsaslı təmir və bərpa işləri aparılıb. Təmir-tikinti işləri zamanı burada çoxlu sayda bəzək ağacları, kol və güllər əkilib.

Növbəti ünvanımız isə uzunluğu 2 kilometrdən çox olan “Veteranlar xiyabanı”dır. Şəhidlər kompleksində olduğu kimi, burada da böyük işlər aparılıb və milli üslubda qurulub. Gözəlliyi ilə seçilən bir xiyaban artıq sakinlərin ixtiyarına verilib. Artıq səhər saatlarından gecəyə qədər çoxlu sayda sakin bu abad ərazidə gəzintiyə çıxıb dincəlir.

Təmizliyə nəzarət güclənib

Yaxınlıqdakı binada yaşayan Tahir Əhmədov adlı sakin bildirir ki, hər gün gəlib burada dincəlir, dostları ilə gəzib əylənirlər. Onun sözlərinə görə, xiyaban uzun müddət idi ki, baxımsız qaldığından sakinlərin üzünə bağlanmışdı: “Səkilləri və yolları sınıb dağılmışdı, yaşıllıqlar sulanılmadığından tələf olmuşdu. Küçə işıqları, yox idi. Su xətti olmadığından ağacları sulanılmırdı. Oturacaqlar sınıq-salxaq idi. Artıq xiyaban yeniləşib. Aparılan əsaslı təmir və bərpa işləri xiyabanı daha da gözəlləşdirib”.

Xatırladaq ki, buradakı piyada səkilərinin bütün daşları dəyişdirilərək aqlay üzlüklər vurulub. Xiyabanın daxili yollarına tamet daşlar döşənilib, küçə işıqları quraşdırılıb. Sınan oturacaqlar yenisi ilə əvəzlənib və bütün skamyalar rənglənib. Xiyabana gələn mərkəzi yol da asfaltlanıb. Burada həmçinin Avropa standartlarına uyğun “söhbətgah”lar quraşdırılıb, su xətləri çəkilib. Xiyabanda yaşıllıqlara qulluq göstərilməsi və təmizliyin qorunması üçün yeni işçilər, bağban işə götürülüb. Həmin işçilər Qaraçuxur bələdiyyənin vəsaiti hesabına əməkhaqqı alırlar. Bu səbəbdən də parkda səliqə-sahman özünü göstərir, lazım olan yerlərə zibil qutuları qoyulub.

Zibillik meydançası abad xiyabana necə çevrildi?

Xiyabanda istirahət edən bir qrup sakin belə bir şəraitin yaradılmasına görə Suraxanı Rayon İcra Hakimiyyətinin başçısı İlqar Abbasova və Qaraçuxur bələdiyyəsinin rəhbərliyinə minnətdarlıq edir, bu qurumların ərazilərin abadlaşdırılması istiqamətindəki fəaliyyətindən razılıqlarını ifadə edirlər. Sakinlərdən biri, 80 yaşlı Gülməmməd Qurbanov indi abad xiyabana çevrilən bu parkın uzun müddət zibillik və məişət tullantıları meydançasına çevrildiyini xatırladır: “Vaxtilə burada üfunət və natəmizlikdən oturmaq olmurdu. İstirahət guşəsi tamamilə dağılaraq sıradan çıxmışdı. Artıq bələdiyyənin vəsaiti hesabına iki aydan çoxdur ki, burada təmir və bərpa işləri aparılıb. Xiyaban yenidən qurularaq sakinlərin ixtiyarına verilib. Camaatın istirahəti üçün hər cür şərait yaradılıb. Ən başlıcası odur ki, istirahət guşəsi daim nəzarət altında saxlanılır”.

Əhməd Mehbalıyev küçəsindəki Böyük Vətən Müharibəsində həlak olanların xatirəsinə ucaldılmış və sonradan bütün şəhidlərin adını daşıyan “Vətən şəhidləri unudulmur” abidəsinə də baş çəkdik. Həqiqətən də abidə yerləşən parkda böyük abalıq və quruculuq işləri aparılıb. Yaşıl çəmənliklər və əkilən bəzək ağacları parkı daha da gözəl, füsünkar edib. “Söhbətgah”lar tamamilə təmir edilib, oturacaqlar rənglənib. Daxili yollara mərmər daşlar döşənilib, səkilər dəyişdirilərək aqlay üzlüklər vurulub, küçə işıqları quraşdırılıb, su xətləri çəkilib, abidənin önündəki çarhovuzun uçub-dağılan üzlükləri tamamilə dəyişdirilib.

Hər şey Vətən üçün...

Böyük Vətən müharibəsi iştirakçısı, Bakıdan Berlinədək döyüş yolu keçmiş 85 yaşlı Müseyib Bağırov adlı sakin bu parkın yenidən qurulmasına, abidənin əsaslı şəkildə təmir olunmasına görə sevindiyini söyləyir. Onun sözlərinə görə, Qaraçuxurda yaşayan Böyük Vətən müharibəsi veteranları hər gün bura toplaşıb birlikdə istirahət edir, müharibə xatirələrindən, qayğılarından danışırlar: “Parkda hər cür şərait yaradılıb. Suraxanı Rayon İcra Hakimiyyətinin başçısı İlqar Abbasov 10 gündən bir bu parka gəlib biz veteranlarla görüşür, problemlərimizlə maraqlanır. Başçı şəxsən özü qəsəbəni gəzir mövcud vəziyyətlə tanış olur”.

Qaraçuxur bələdiyyəsinin sədr müavini İxtiyar Nəcəfovla elə ərazidə iş başında görüşdük. Bələdiyyə sədrinin müavini Qaraçuxur qəsəbəsində görülən işlər barədə “Həftə içi”nin suallarını da cavablandırıb. O qeyd edir ki, qəsəbə ərazisində aparılan bütün abadlıq və tikinti işləri rayon icra hakimiyyətinin başçısı İlqar Abbasovun tapşırıq və göstərişləri əsasında baş tutub: “Qısa vaxtda bələdiyyənin vəsaiti hesabına bir abidə və iki xiyabanda əsaslı təmir işləri aparmışıq. Bu ərazilərin hər birində köhnə komplekslər sökülərək yerində müasir tələblərə cavab verən yeni komplekslər qurulub. Qaraçuxur qəsəbəsindəki Hacıniski-102 ünvanda yerləşən məcburi köçkünlər yaşayan 9 mərtəbəli binaların həyətində tikilmiş “Mərasim evi”nin təmir işlərini də bələdiyyənin vəsaiti hesabına başa çardırmışıq. Yaxın zamanda isə Yeni Günəşli qəsəbəsində “Depark” adlanan istirahət guşəsində təmir və bərpa işlərinə başlayacağıq”.

Qələndər Xaçınçaylı

Həftə içi.- 2014.- 7 may.- S.8.