“Muğamların ritmik

gəzişmələri” çap olundu

 

Aydın Mehralıyev: “Bu gün sevgi-məhəbbətdən çox, vətənpərvərlik

mövzusunda mahnılara daha çox üstünlük vermək lazımdır”

 

Tanınmış tarzən, bəstəkar Aydın Mehralıyevin bu yaxınlarda yeni bir əsəri, “Muğamların ritmik gəzişmələri” kitabı işıq üzü görüb. Bu, onun ikinci məcmuəsidir. “Gənclik” nəşriyyatı tərəfindən nəfis üsulla çap olunmuş həmin məcmuəyə korifey sənətçilər, musiqiçi və bəstəkarlar münasibət bildiriblər.

Aydın Mehralıyev “Həftə içi”nə bildirib ki, bu kitabı ərsəyə gətirmək üçün uzun illərdir fikirləşib: “Axtarışlar edirdim, çoxdandır ki, xalq musiqiçiləri üçün muğamlar üzərində gəzişmələr, rənglər, rəqslər, mahnılar və pyeslər tədris xüsusiyyətli əsərlər nadir hallarda yazılıb. Bu məcmuəni yazmaqla mən, xalq musiqiçilərinə öz töhfəmi verə bildim”.

Müəllif deyir ki, “Gənclik” nəşriyyatının baş redaktoru Adil Abdullayevin redaktorluğu ilə yazdığı “Muğamların ritmik gəzişmələri” əsər 5 bölmədən ibarət olmaqla, dərslik kimi Milli Konsevatoriyanın, musiqi kolleclərinin, eləcə də musiqi məktəblərinin tələbələri üçün nəzərdə tutulub. Onun sözlərinə görə, 227 səhifəlik bu kitabda 5 muğam gəzişməsi, 25 muğam rəngi, 8 mahnı və digər musiqilər daxil edilib: “Hazırda isə 3-cü yeni bir kitab üzərində işləyirəm. İnşallah, təzə yazmağa başladığım kitab yüngül janrlara həsr edilən musiqilər toplumundan ibarət olacaq”.

Aydın Mehralıyev deyir ki, yazdığım mahnıları bu gün populyardır, tanınmış korifey sənətçilər, Xalq artistləri tərəfindən sevilə-sevilə ifa edilir. O, xüsusi olaraq vurğulayır ki, Heydər Əliyev Fondunun prezidenti, millət vəkili Mehriban Əliyeva milli musiqimizə, xalq mahnılarımıza və muğamlarımıza diqqət və qayğını artırıb: “Gün-gündən milli musiqimiz inkişaf edir, yeni-yeni istedadlılar üzə çıxarılır. Sevindirici haldır ki, Mehriban xanımın qayğısı ilə milli musiqimiz dünya ictimaiyyətinə daha yaxından tanıdılır. Yazdığım əsərlərin və mahnıların hamısı vətənlə bağlıdır. Bu gün sevgi-məhəbbətdən çox vətənpərvərlik mövzusunda mahnılara daha üstünlük vermək lazımdır. Ona görə ki, doğma Qarabağımız, müqəddəs ziyarətgahımız, musiqimizin, mədəniyyətimizin beşiyi olan Ağdam, Şuşa, Azərbaycanın dilbər guşəsi, öz mənzərəsi, təbii suları, saf havası ilə dünyanı heyran edən Kəlbəcər, Laçın işqal altındadır. Mən bu mahnıları ürəkağrısı ilə yazıram”.

 

Qələndər

 

Həftə içi.- 2014.- 17-19 may.- S.8.