Elektron ticarətdə yeni qayda

Artıq 1 ay ərzində ümumi dəyəri 1000 dollar miqdarında

bağlama ölkəyə gömrük ödənişləri olmadan buraxılacaq

Azərbaycanda elektron ticarət yolu ilə mal və əşyaların gətirilməsi artıq yeni qaydalarla tənzimlənir. Bununla bağlı Nazirlər Kabineti tərəfindən 2013-cü il 14 oktyabr tarixində “Fiziki şəxslər tərəfindən istehsal, yaxud kommersiya məqsədləri üçün nəzərdə tutulmayan malların gömrük sərhədindən keçirilməsinin güzəştli və sadələşdirilmiş Qaydaları” təsdiq edilib.

Bəs, görəsən, yeni qaydalarda nələr nəzərdə tutulub? Bu qaydalar internet vasitəsilə alış-veriş edənlər üçün hansısa problem yarada bilərmi?

Məsələni «Həftə içi»nə şərh edən Rabitə və İnformasiya Texnologiyaları Nazirliyinin poçt sektorunun rəhbəri Novruz Məmmədov deyib ki, əslində hökumətin təsdiq etdiyi yeni qaydalar vətəndaşların rahatlığının təmin olunmasına xidmət edir. Onun sözlərinə görə, bu qaydaların təbiqi həm də əhalinin maddi marağının qorunmasına şərait yaradacaq: «Son vaxtlar ölkə əhalisinin internet üzərindən alış-verişə olan marağının xeyli dərəcədə yüksəlməsi elektron ticarət əsasında ölkəyə daxil olan beynəlxalq poçt göndərişlərinin həcminin artması ilə nəticələnib.

Sözügedən həcmin artım tendensiyası, e-ticarətə müraciət edənlərin sayının surətlə çoxalması ölkə rəhbərliyinin diqqətini cəlb edib və bu sahədə vətəndaşlarımızın rahatlığının təmin edilməsi və maddi maraqlarının qorunması istiqamətində Azərbaycan Hökuməti tərəfindən mühüm addım atılıb. Yeni Qaydalara görə, beynəlxalq poçt göndərişləri vasitəsilə eyni fiziki şəxsin adına 30 gün müddətində ümumi gömrük dəyəri 1000 dollar ekvivalenti məbləğindən artıq olmayan gömrük ərazisinə gətirilən qeyri-kommersiya yaxud qeyri-istehsal xarakterli mallar güzəştli qaydada gömrük sərhədindən keçirilməklə poçt vasitəsilə gətirilə bilər. Yəni, 1 ay ərzində ümumi dəyəri 1000 dollar miqdarında olan bağlama ölkəyə gömrük ödənişləri ödəmədən daxil olacaq. Müqayisə üçün deyim ki, əvvəllər bu güzəştin məbləği 200 dollar ekvivalenti təşkil edib».

Sektor müdirinin sözlərinə görə, digər bir yenilik ondan ibarətdir ki, əgər gətirilən malın dəyəri təyin olunmuş həddi, yəni 1000 dolları aşarsa, gömrük rüsumu yalnız həmin həddən artıq olan məbləğə tətbiq ediləcək: «Bundan əvvəlki qaydalara görə isə, gömrük rüsumu dəyəri 200 dollardan yuxarı olan malın tam dəyərinə tətbiq edilirdi. Bu baxımdan düşünürük ki, sözügedən dəyişikliklər vətəndaşlara daha böyük imkanlar yaratmaqla onların vəsaitlərinə qənaət etməsinə gətirib çıxardıb».

Novruz Məmmədov öz açıqlamasında qərarın ötən ilin noyabrın 27-dən qüvvəyə mindiyini də bildirib: “Hesab edirik ki, vətəndaşların hökumətin onlar üçün yaratdığı bu imkanlar barəsində məlumatlarının artması, alış-veriş zamanı elektron ticarətə üstünlük verəcək, bu da öz növbəsində poçt göndərişlərinin həcminin daha da artmasına təsir edəcək. Bununla yanaşı, yeni qaydalar vətəndaşlara şəxsi istifadəsi üçün daha geniş çeşidli və dəyəri nisbətən yüksək olan mal və əşyaların beynəlxalq poçt göndərişləri vasitəsilə gətirilməsinə şərait yaradacaq”.

Qurum rəsmisi eyni zamanda, “Azərpoçt” MMC-nin internet sifarişi əsasında ölkəyə daxil olan poçt göndərişlərinin çatdırılma keyfiyyətini yüksəltmək məqsədilə yeni “SMS-bildiriş” xidmətinin tətbiqinə başladığını da söyləyib: «Bu xidmətə əsasən, poçt müəssisələrinə daxil olan beynəlxalq göndərişin üzərində alıcının telefon nömrəsi olduqda, həmin nömrəyə operativ olaraq “SMS-bildiriş” göndərilir və bildirişdə vətəndaşın adına poçt göndərişinin daxil olması və göndərişi almaq üçün xidmət göstərən poçt şöbəsinə müraciət etməyin zəruriliyi barədə məlumat verilir. Onu da deyim ki, yeni xidmətin tətbiqi artıq ilk müsbət nəticələrini verib və beynəlxalq kiçik paket və bağlamaların çatdırılmasını xeyli dərəcədə sürətləndirib”.

Yeri gəlmişkən, ötən il Azərbaycanda elektron pərakəndə ticarət dövriyyəsinin həcmi 1,6 dəfə artıb. Belə ki, ölkədə 2013-cü ildə elektron pərakəndə ticarət dövriyyəsinin həcmi 2012-ci ilə nisbətən 1,6 dəfə artaraq 2,6 milyon manat təşkil edib. Azərbaycan Dövlət Statistika Komitəsindən verilən məlumata görə, əhali onlayn rejimi vasitəsilə sifariş verdikləri istehlak mallarının 82,6 faizini hüquqi, 17,4 faizini fiziki şəxslərin ticarət şəbəkələrindən alıb. Elektron ticarət dövriyyəsinin 89,7 faizini qeyri-ərzaq malları təşkil edib.

Sevinc

Həftə içi.- 2014.- 14 yanvar.- S.8.