Yeni Suraxanının sosial infrastrukturu yenilənir

Vahid Danıyev: “Qəsəbədə aparılan tikinti və abadlıq işlərinin hələ də davam etdirilməsi vacibdir”

2011-2013-cü illərdə Bakı şəhərinin və onun ətraf qəsəbələrinin sosial-iqtisadi inkişafına dair Dövlət Proqramı Suraxanı rayonunda uğurla həyata keçirilib. Belə ki, bu rayonun qəsəbələrində illərlə yığılıb qalmış problemlər artıq proqram çərçivəsində öz həllini tapıb. Bu sırada Yeni Suraxanı qəsəbəsində görülmüş işlər xüsusilə diqqəti çəkir. Həmin qəsəbənin ərazisində böyük abadlıq-quruculuq və təmir-tikinti işləri aparılıb. Bir sözlə, Yeni Suraxanı daha da yeniləşərək, paytaxtın abad qəsəbələrindən birinə çevrilib.

Qəsəbə icra nümayəndəsi Vahid Danıyev “Həftə içi”nin əməkdaşı ilə söhbətində bildirib ki, yerli icra orqanları öz fəaliyyətini prezidentin, Nazirlər Kabinetinin, Bakı Şəhər İcra Hakimiyyətinin və Suraxanı Rayon İcra Hakimiyyətinin fərman və sərəncamlarını rəhbər tutaraq qurur. Onun sözlərinə görə, Dövlət Proqramı və ali hakimiyyət strukturlarının müvafiq qərarları əsasında Yeni Suraxanıda aparılan tikinti-quruculuq işlərinin yeri və rolu rayonun sosial-iqtisadi həyatında çox qabarıq hiss olunur. O, buna misal olaraq Dövlət Proqramı çərçivəsində Yeni Suraxanı və Əmircan qəsəbələrini birləşdirən yola 30 min kvadrat metr həcmində asfalt örtüyün çəkilməsini, Yeni Suraxanı qəsəbəsi-Aeroport yolunun sol tərəfində daş hasarın suvanaraq rənglənməsini xüsusi qeyd edir: “Ötən il qəsəbə ərazisində böyük işlər görülüb. Rayon icra hakimiyyəti və qəsəbə nümayəndəliyi tərəfindən 5 hektara yaxın ərazisi zibilliklərdən, tikinti materiallarının tullantılarından təmizlənərək yerində abadlıq işləri aparılıb, çoxlu sayda ağac və kol bitkiləri əkilib”.

Su və kanalizasiya təchizatı yaxşılaşır

Vahid Danıyev Dövlət Proqramı çərçivəsində Bakı və ətraf qəsəbələrin su təchizatının yaxşılaşdırılması istiqamətində görülən işlərdən də danışıb. Onun dediyinə görə, artıq bu qəsəbənin də əhalisi fasiləsiz içməli su ilə təmin olunacaq. Artıq qəsəbənin su təchizatının yaxşılaşdırılması üçün “Texno Atinak MMC” tərəfindən ümumilikdə 13260 p/metr su xətti çəkilib, 51 ədəd hidrant quraşdırılıb, 840 mənzilə SMART tipli su sayğacı qoyulub: “Bununla da qəsəbədə 1200 ailənin su təchizatı yaxşılaşdırılıb. Bakı-Aeroport yolu sol tərəf yaşayış sahəsində isə yeni su şəbəkəsi quraşdırılmaqdadır. Hazırda 7360 p/m müxtəlif diametrli su xətti çəkilir. Yay mövsümündə qəsəbənin yuxarı hissəsində yaşayan əhalinin su təchizatında yaranan problemi həll etmək məqsədilə Bakı Sukanal İdarəsi və Suraxanı İcra Hakimiyyəti tərəfindən yaradılmış komissiya tərəfindən operativ addımlar atıldı. Belə ki, Yuxarı Mədən küçəsindəki 1000 kubmetr həcm olan su anbarından Hövsan xəttinə yardımçı xətt birləşdirilib. Bununla da 1000 ailəyə içməli su verilib”.

Vahid Danıyev Dövlət Proqramı çərçivəsində Yeni Suraxanı qəsəbəsinin elektrik enerjisi və təbii qazla təchizatında da ciddi irəliləyişlərə nail olunduğunu deyib. Belə ki, son 3 ildə qəsəbəyə 51955 p/m yeni qaz xətti çəkilib, 3 ədəd şkaf və 50-ə yaxın siyirtmə quraşdırılıb. Hazırda isə bu istiqamətdə işlər davam edir. Onun sözlərinə görə, elektrik enerjisi təchizatının yaxşılaşdırılması məqsədilə qəsəbə ərazisində uzun müddət istismarda olan və yararsız vəziyyətə düşmüş transformator kompleksi əsaslı təmir edilərək müasir standartlara cavab verən avadanlıqlarla təmin olunub. Eləcə də istismara yararsız paylayıcı şəbəkələr daha müasir avadanlıqlarla əvəzlənib. Məhz bu tədbirlərin nəticəsində qəsəbə sakinləri daimi və fasiləsiz elektrik enerjisi ilə təchiz olunub.

Həllini gözləyən problemlər var

İcra nümayəndəsi onu da deyib ki, Dövlət Proqramı çərçivəsində qəsəbədə yerləşən 2 saylı Bərpa Müalicə Xəstəxanasının binası sökülərək müasir standartlara uyğun şəkildə yenidən qurulur. Hazırda isə həmin tibb müəssisəsində tikinti işləri davam edir. Bununla yanaşı Səhiyyə Nazirliyi tərəfindən 12 saylı Bakı Şəhər Xəstəxanasında əsaslı təmir və tikinti işləri aparılıb. Yeni avadanlıqlarla təchiz olunmuş xəstəxana artıq sakinlərin istifadəsinə verilib. Onun sözlərinə görə, qəsəbədə təhsil ocaqlarının da yerləşdiyi binalarda əsaslı yenidənqurma işləri aparılıb və hazırda bu proses davam edir: “Yeni Suraxanıda fəaliyyət göstərən 85 və 95 saylı orta məktəb binaları əsaslı təmir olunub. 101 saylı məktəb üçün 20 əlavə sinif otağının tikintisi də artıq başa çatıb. Qəsəbədəki Mədəniyyət Evində isə təmir işlərinə start verilib. 323 saylı uşaq bağçasının binası əsaslı təmir olunaraq sakinlərin ixtiyarına verilib. Həmçinin “Göyərçin” körpələr evinin də təmir olunması nəzərdə tutulub”.

Vahid Danıyev 2011-2013-cü illəri əhatə edən Dövlət Proqramı çərçivəsində Yeni Suraxanıda çoxlu işlərin görüldüyünü desə də, hələ qəsəbədə bir sıra problemlərin mövcud olduğunu söyləyir. Onun sözlərinə görə, qəsəbədaxili yolların asfaltlanması və işıqlandırma sisteminin qurulması, qəsəbənin su və kanalizasiya olmayan küçələrinə yeni xətlər çəkilməsi, “Müstəqilliyin 20 illiyi” küçəsində istirahət parkının salınması, çoxmənzilli binalarda istilik sisteminin olmaması kimi məsələlər hələ öz həllini tapmayıb: “Qəsəbədə aparılan tikinti-abadlıq işlərinin də davam etdirilməsi vacibdir. Çünki qəsəbədə öz həllini gözləyən problemlər çoxdur. Belə problemlərin həlli yolları axtarılmalı və aidiyyəti üzrə müəyyən olunmuş təşkilatlarla həll olunmalıdır”.

Qələndər Xaçınçaylı

Həftə içi.- 2014.- 15 yanvar.- S.7.