Bakıda 20 Yanvar hazırlıqları yekunlaşır

Anım gününə bir neçə gün qalsa da, şəhidlərimizin uyuduğu xiyabana kütləvi ziyarət başlayıb

Qanlı 20 Yanvar faciəsindən 24 il ötür. Hər il olduğu kimi, bu il də canını vətənin azadlığı uğrunda qurban vermiş şəhidlərimizin anım günü ilə bağlı Şəhidlər Xiyabanında hazırlıq işləri aparılır.

“Həftə içi”nin əməkdaşı olaraq yolumuzu həmin ünvandan saldıq. Hər şeydən əvvəl anım gününə bir neçə gün qalmasına baxmayaraq, şəhidlərimizin uyuduğu xiyabana insan axını hər kəsin diqqətini çəkir. Ziyarətə gələnlərin əksəriyyəti isə paytaxtda fəaliyyət göstərən orta məktəblərin müəlim və şagirdləri, məktəbəqədər tərbiyə müəssisələrindən olan uşaqlar idi. Azyaşlı uşaqlar və məktəblilər öz müəllimlərilə birgə əllərində gül dəstəsi şəhidlərimizi yad edir, 20 Yanvar qurbanlarının məzarları önünə qərənfillər düzürdülər. Müəllimləri isə şagirdlərə 20 Yanvar şəhidləri barədə ətraflı məlumatlar verirdilər...

Bakı Şəhər İcra Hakimiyyətinin rəhbərliyi alıtında xiyabanda böyük hazırlıq, təmir və bərpa işləri gedir. Ziyarətə çevrilmiş məzarlığın giriş hissəsindəki Şəhidlər Xiyabanı lövhəsinin ətrafı çiçəklərlə bəzədilib. Lövhənin qarşı tərəfində isə çoxlu sayda qərənfillər gətirilib. Bir neçə fəhlə Bakı kəndlərindən gətirilmiş qərənfillərdən həmin lövhənin qarşı tərəfində yerə milli orlamentlərə uyğun xalı toxuyurdular. Kənardan baxanda bu hissə sanki zövqlü toxunmuş xalçanı xatırladırdı. Lövhənin sağ və sol tərəfindəki pilləkənlərin üstü də qərənfillərlə bəzədilmişdi. Bir-birindən gözəl görünən təbii ağ və qırmızı qərənfildən hörülmüş və xalça kimi toxunmuş şamlar, səkkizguşəli ulduzlar və şəhidlərin məzarları istiqamətində uzanan qərənfil-xalçalar, Şəhidlər Xiyabanına gələnlərin qəmli baxışları düz 24 il əvvəli – 1990-cı il yanvarın 20-ni xatırladır.

“Qara Yanvar”ın 24-cü ildönümünə hazırlıqlar təkcə bununla məhdudlaşmır. Şəhidlərimizun ruhuna hörmət əlaməti olaraq xiyaban boyunca yolların sağ və sol divarları ağ mərmərlə üzlənib, divarların üzəri ilə təxminən 5 metrdən bir qara parçaya bükülmüş qərənfil dibçəkləri qoyulub. Şəhidlər Xiyabanının “Əbədi Məşəl” abidəsi önünə məktəblilər və müxtəlif təşkilatlar adından qoyulan əklillər də diqqəti çəkir.

Xiyabanın Qarabağ şəhidləri uyuyan ərazisində də təmir və bərpa işləri davam edir. Ərazilərə şam ağacları əkilib, çərgəarası divarlar hörülür və hörülmüş divarlara isə mərmər üzlüklər çəkilirdi. Bir sözlə, xiyabanda aparılan hazırlıq işləri buraya gələn hər kəsin diqqətini çəkirdi. Burada çalışan fəhlələrin, hazırlıq işlərinə nəzarət edən Bakı Şəhər İcra Hakimiyyətinin nümayəndələrinin dediklərinə görə, Şəhidlər Xiyabanında bütün işlər sabah tam şəkildə başa çatdırılacaq.

Xiyabana ziyarətə gələn məktəblilərlə və sakinlərlə də görüşdük. Onlar xiyabanda aparılan hazırlıq işlərindən razı qaldıqlarını və şəhidlərimizin heç vaxt unudulmadıqlarını söylədilər. Ziyarətə gələnlərdən biri, 85 yaşlı Zibər nənə gənc nəsli imperiya ordusunun xalqımızın başına gətirdikləri faciəni, 20 Yanvar qırğınını unutmamağa çağırır: “Bizim azadlığımız 20 Yanvar şəhidlərindən keçir. “Qanlı Yanvar” gecəsində həlak olmuş şəhidlər Azərbaycanın ilk azadlq qaranquşlarıdır. Mən hər dəfə ziyarətə gələndə özümlə kiçik yaşlı nəvələrimi də gətirirəm və onlara bu haqda məlumat verirəm. Azadlığın nə olduğunu bizim kimi ahıl adamlar daha yaxşı bilir. Allah hər bir şəhidlərimizə rəhmət eləsin. O gün olsun ki, Qarabağ yağı düşmən tapdağından azad edilsin və qələbə bayramını doğma Qarabağda qeyd edək. Onda şəhidlərimizin də narahat ruhları şad olacaq”.

Qələndər Xaçınçaylı

Həftə içi.- 2014.- 17 yanvar.- S.7.