Dünyanın ən varlı müsəlman ölkələri

Bu günlərdə «Yahoo Finance» dünyanın ən zəngin müsəlman ölkələrinin siyahısını hazırlayıb. Siyahıt hazırlanarkən həmin ölkələrdə adambaşına düşən ümumdaxili məhsulun (ÜDM) həcmi nəzərə alınıb. Həmin ölkələri maraqlı olar deyə oxucularımızın diqqətinə çatdırırıq:

Qətər: Fars körfəzi sahilində yerləşir, 1,7 milyon nəfər əhali ilə dünyanın ən zəngin ölkələri reytinqinə başçılıq edir. Qətərdə 2011-ci ildə adambaşına düşən orta ÜDM-in həcmi 88 min 919 dollar olub. Burada fəal inkişafın əsas mənbəyi təbii qaz, neft və neft məhsulları istehsalı, eləcə də ixracının durmadan artmasıdır. Bildirək ki, futbol üzrə 2022-ci ilin dünya çempionatının keçiriləcəyi Qətər, həmçinin 2020-ci ilin Olimpiya oyunlarının ev sahibliyinə namizədliyini irəli sürüb.

Küveyt: 3,5 milyon əhalisi olan bu ölkə siyahıda ikinci yeri tutur. 2011-ci il üçün adambaşına düşən ÜDM-in miqdarı 54 min 654 dollar olub. Küveyt dünyanın ən iri neft ölkələrindədir. 2020-ci ilədək ölkədə neft hasilatının 4 milyon barelə çatacağı gözlənilir. Digər mühüm iqtisadi sahələr gəmiçilik, tikinti və maliyyə xidmətidir.

Bruney: Dünyada üçüncü ən zəngin müsəlman ölkəsidir. Burada 2011-ci ildə adambaşına düşən ÜDM-in həcmi 50 min 506 dollar təşkil edib. Ölkənin zənginliyi nəhəng təbii qaz və neft yataqları sayəsindədir. Ölkə iqtisadiyyatı son 80 il ərzində neft və qaz sənayesi sayəsində daha da inkişaf edib.

Birləşmiş Ərəb Əmirlikləri (BƏƏ): Siyahıda dördüncü olan BƏƏ-nin gəlir mənbəyi ölkənin təbii sərvəti olan neft və qazdandır. Bu sahədən gələn gəlir ÜDM-in 25 faizini təşkil edir ki, bunun nəticəsində 2011-ci ildə adambaşına düşən ÜDM-in miqdarı 48 min 222 min olub. Ölkənin, xüsusilə də paytaxt Əbu-Dabinin iqtisadiyyatında neft və təbii qaz ixracatı mühüm rol oynayır.

Oman: Dünyanın ən zəngin beşinci ölkəsi. Burada 2011-ci ildə adambaşına düşən ÜDM-in miqdarı 28 min 880 dollar təşkil edib. Ölkənin neft ehtiyatlarının həcmi isə 5,5 milyard bareldir.

Səudiyyə Ərəbistanı: Siyahının altıncısıdır. 2011-ci ildə adambaşna düşən ÜDM miqdarı 24 min 434 dollar olub. Qeyd edək ki, Səudiyyə Ərəbistanı dünyada neft ehtiyatlarına görə ikinci yeri tutur. Belə ki, “qara qızıl” ölkə ixracatının 95 faizini, dövlət gəlirinin isə 70 faizini təşkil edir. Burada, həmçinin qaz ehtiyatları da var ki, bu sərvətinə görə Səudiyyə Ərəbistanı dünyada altıncı yerdədir.

Bəhreyn: Dünyanın ən zəngin yeddinci müsəlman ölkəsi. 2011-ci ildə adambaşına düşən ÜDM-in həcmi 23 min 690 dollar olub. Neft bu ölkənin ən çox ixrac etdiyi məhsuldur.

Türkiyə: Dünyanın ən zəngin müsəlman ölkələri siyahısında Türkiyə səkkizincidir. Burada 2011-ci ildə adambaşına düşən ÜDM-in həcmi 16 min 885 dollar təşkil edib. Ölkədə iqtisadiyyatın ən mühüm sahəsi turizm hesab olunur. Türkiyə iqtisadiyyatının digər aparıcı sahələri tikinti, neft emalı, neft kimyası və maşınqayırmadır. Türkiyə gəmiqayırma üzrə dünyanın lider ölkələrindəndir və sifariş verilən gəmilərin sayına görə Çin, Yaponiya və Cənubi Koreyadan sonra dördüncü yerdədir.

Liviya: Bu siyahının doqquzuncusudur. 2011-ci ildə adambaşına düşən ÜDM-in miqdarı 14 min 100 dollar olub. Dünya neft ehtiyatının 10 faizinə sahib olan ölkə dünyada neft istehsalı üzrə 17-ci yerdədir.

Malayziya: “Dünyanın 10 ən zəngin müsəlman ölkəsi” reytinq siyahısını Malayziya tamamlayır. Belə ki, burada 2011-ci ildə adambaşına düşən ÜDM miqdarı 15 min 589 dollar təşkil edib. Kənd təsərrüfatı məhsulları və neft üzrə əsas ixracatçı ölkə hesab olunan Malayziya, həmçinin ən böyük kauçuk və palma yağı istehsalçısıdır. Turizm ölkənin üçüncü ən böyük gəlir sahəsidir.

Vüsal Tağıbəyli

Həftə içi.- 2014.- 31 yanvar.- S.8.