«Bir kərə yüksələn bayraq bir daha enməz»

Türk milləti Məhəmməd Əmin Rəsulzadəni böyük ehtiramla xatırlayır

Sabah Azərbaycan Demokratik Cümhuriyyətinin banisi Məhəmməd Əmin Rəsulzadənin anadan olmasının 130 ili tamam olacaq. Bu münasibətlə prezident İlham Əliyevin sərəncamı ilə Azərbaycanın hər yerində, eləcə də xarici ölkələrdə genişmiqyaslı anım tədbirləri düzənlənəcək.

Yeri gəlmişkən, bu məqsədlə yanvarın 31-də Azərbaycan Xalq Cümhuriyyətinin şərəfinə paytaxtın İstiqlaliyyət küçəsində ucaldılmış abidənin önündə mərasim təşkil olunacaq, sonra isə Akademik Milli Dram Teatrında Rəsulzadənin 130 illik yubileyinə həsr olunmuş təntənəli gecə keçiriləcək.

Mədəniyyət və Turizm Nazirliyinin xəbərinə görə, M.Ə.Rəsulzadənin məzarının ziyarəti və yubiley tədbirində iştirak məqsədilə mədəniyyət və turizm nazirinin birinci müavini Vaqif Əliyevin rəhbərliyi ilə nümayəndə heyəti Türkiyəyə səfər edib.

Yeri gəlmişkən, bəs mərhum siyasətçinin dəfn olunduğu qardaş Türkiyədə 130 illik anım tədbirlərinə necə hazırlaşıblar və ümumiyyətlə, qardaş türk xalqı bu şəxs barəsində nə bilirlər? Millətçi Hərəkat Partiyasının (MHP) Cankaya rayon şöbəsinin sədr müavini Şevki Günəş «Həftə içi»nə müsahibəsində bildirdi ki, onlar, xüsusilə də türk millətçilər Rəsulzadəni yaxşı tanıyırlar. O, hətta Rəsulzadənin kim olduğunu tarixi faktlarla xatırlatmağa başladı. Dedi ki, onlar Rəsulzadəni 1918-ci ildə Azərbaycanda ilk demokratik cümhuriyyətin qurucusu və bu ölkənin yaşaması, inkişafı uğrunda mübarizə aparmış siyasət adamı və yazıçı kimi qəbul edirlər: «Biz yaxşı bilirik ki, o, 1884-cü ildə Bakıda doğulub. 1903–1904-cü illərdə özünün qurduğu Azərbaycanlı Gənc İnqilabçılar Komitəsinin başında dayanıb, Rusiya-Yaponiya müharibəsindən sonra çar Rusiyasını zəiflədiyini görüb Azərbaycanda azadlıq mübarizəsini genişləndirib. O, ziyalıları, milli ruhlu şəxsləri bir araya gətirərək Azərbaycanın müstəqil dövlət olması fikrini formalaşdırdı…».

Maraqlıdır, türk millətçilər kimi ictimaiyyətin digər sahələrinin nümayəndələri də Rəsulzadə barəsində məlumatlıdırmı? Axı bu şəxsin məzarı məhz Türkiyənin paytaxtındadır. Müsahibimiz bildirdi ki, bəli, ölkəsində çoxları Azərbaycanda ilk demokratik cümhuriyyətin yaradıcısı olan Rəsulzadə Bakıda doğulsa da, Ankarada torpağa tapşırıldığını yaxşı bilir: «Rəsulzadənin qəbri Ankaradakı Cebəci məzarlığındadır. Türk millətçilər onu heç vaxt unutmayacaqlar. Bu gün Məhəmməd Əmin Türkiyədə «Bir kərə yüksələn bayraq bir daha enməz» şüarıyla çoxlarının hafizəsinə həkk olunub. Tarixlərə fikir verin: 1918-ci ildə Azərbaycanda Cumhuriyyət quran Rəsulzadə 1947-ci ildə Türkiyəyə gələrək 1949-cu ildə Azərbaycan Kültür Dərnəyini qurub. 1955-ci il martın 6-da isə Ankarada həyatla vidalaşır və elə burada da torpağa tapşırılır».

Azərbaycanın hər yerində uşaqdan böyüyə kimdən Mustafa Kamal Atatürkü soruşsalar, cavab veriləcək. Maraqlıdır, Rəsulzadə haqqında türk məktəblilər nə isə bilirlərmi? Ö.Günəş bütün türkiyəli millətçilər adından dedi ki, onlar Rəsulzadə haqqında məlumatların hətta türk məktəblərində şagirdlərə tədris olunmasını istərdilər. Amma təəssüf ki, millətçi ruhlu hökumət hakimiyyətə gəlmədiyindən bu gün həmin ideya reallaşmır. Buna baxmayaraq, o dedi ki, hazırda bir sıra məktəblər Rəsulzadənin adını daşıyır. Eləcə də tarixin ən məşhur türk siyasətçilərinin sırasında Məhəmməd Əmin Rəsulzadənin də adı var.

Müsahimiz Rəsulzadənin 130 illik anım günündə ölkəsində keçiriləcək tədbirlərə də toxundu. Dedi ki, Türkiyənin hər yerində bu müstəvidə təşkilatlar səviyyəsində tədbirlər təşkil olunacaq: «Mən və Ankara bələdiyyə sədrliyinə namizədimiz sabah hamı kimi Rəsulzadənin məzarını ziyarət edəcəyik, sonra da təşkil edilən toplantılara qatılacağıq. Xüsusilə də universitetlərdə elmi konfranslar keçiriləcək, məruzələr dinləniləcək. Bundan əlavə, sosial mediada da çıxışlar nəzərdə tutulur. Tarixdə ilk türk cümhuriyyətinin – Azərbaycan Demokratik Cümhuriyyətinin qurucususu və ilk rəhbəri olan Məhəmməd Əmin Rəsulzadə hər zaman ürəklərdə yaşayacaq».

İraq türkmənləri də bu görkəmli şəxsiyyətlə fəxr etməkdədir. Dünən qəzetimizə fikirlərini bölüşən Türkməneli Partiyasının sədri Riyaz Sarıkahya bildirdi ki, onlar türk millətçisi olaraq millətin dahi şəxsiyyətlərini həmişə ehtiramla anırlar: «Mən də bir türkçü olaraq rəhmətlik Rəsulzadə barəsində çox oxumuşam, onunla bağlı hər bir məlumatı öyrənməyə çalışıram. Rəsulzadə türkçülük uğrunda mübarizə aparıb, böyük işlər görüb. O, Azərbaycana müstəqilliyi və türklük ruhunu gətirib. Bütün türk dünyası onun bu əməyindən yararlanıb. Türk milləti olaraq böyük liderimiz rəsulzadəni rəhmətlə xatırlayırıq, onunla qürur duyuruq. Onun öz sözü ilə ehtiramımı bildirirəm: bir kərə yüksələn bayraq bir daha enməz».

Vüsal Tağıbəyli

Həftə içi.- 2014.- 31 yanvar.- S.2.