Ağdam Dövlət Dram Teatrına

gənc aktyorlar cəlb edilib

Azərbaycan teatrının tarixi inkişafına nəzər salsaq, görərik ki, bu sahədə Ağdam Dövlət Dram Teatrının da xidmətləri az olmayıb. Vaxtilə adıçəkilən mədəniyyət müəssisəsində Fatma Mahmudova, Svetlana Hakimova, Tofiq Qarayev, Qurban Mirzəyev, Narınc Məlikova, Səyyaf Əlizadə, Siyavuş Soltanov kimi respublikanın məşhur artistləri, səhnə ulduzları çalışıblar. O aktyorlar ki, özünəməxsus rolları ilə dünya teatr səhnəsinə, eləcə də milyonlarla insan qəlbinə yol açıblar.

Xatırladaq ki, Sovetlər dövründə Ağdam Dövlət Dram Tatrı nəinki Qarabağda, Azərbaycanın bölgələrində, eləcə də respublika hüdudlarından kənara qastrollara gedib, maraqlı, yeni tamaşaları ilə çıxışlar edərdilər. Yadımdadır, uşaq idim, doğulduğum kənd klubunda sözügedən teatr Cəfər Cabbarlının “Solğun çiçəklər” tamaşasını səhnəyə qoymuşdu. Tamaşaçı əlindən tərpənmək olmurdu. Zal dolmuşdu, yer olmadığından, tamaşaçılar gəlib ayaqüstə tamaşaya baxardılar. Bəs görəsən, teatrın bugünkü durumu, mövcud vəziyyəti nə yerdədir?

Ağdam Dövlət Dram Teatrının direktoru Məhəməd Hüseynov “Həftə içi”nin sualına cavab verərək dedi:

- İki ildir teatra rəhbərlik edirəm. Bu müddət ərzində teatrın əməkdaşları arasında yüksək atmosfer yaradılıb, əməkdaşlıq bərpa edilib. Yeri gəlmişkən deyim ki, teatr üçün vacib məsələlərdən biri nizam-intizamın olmasıdır. Ciddi nizam-intizam, iş rejiminə keçmişik. Teatra istedadlı gənc aktyorları cəlb etmişik. Azərbaycan Dövlət İncəsənət Universtitetinin məzunları Elgiz Muradov, Hikmət Şirin, Fəridə Əhmədova əksər tamaşalarda baş rollarda iştirak edirlər. Artıq onlar yaşlı sənətçilərdən təcrübə əldə ediblər. Bugünün özündə Əməkdar artistlər Aidə Qasımova, Cəmilə Məmmədzadə, eləcə də Kərim Həsənli, Nizami Ələsgəroğlu kimi təcrübəli aktyorlar çalışırlar.

– Teatrda tamaşa hazırlığı barədə nə deyə bilərsiniz?

- Bu gün teatrın ən ağır yükü quruluşçu hissə müdiri Yaşar Abbasov, truppa müdiri Ədalət Rüstəmov, ədəbi hissə müdiri Zöhrab İmaməliyevin çiyinlərinə düşür.Teatrın baş rejissoru isə Əməkdar artist Sərvər Əliyevdir.

- Rəhbərlik etdiyiniz bu iki il ərzində neçə tamaşa səhnəyə qoyulub, həmin tamaşalar barədə nə deyə bilərsiniz? Qoyulan tamaşalar sizi bir mütəxəssis kimi qane edirmi?

- Əlbəttə. Ağdam Dövlət Dram Teatrı köçkünlük həyat tərzi yaşamasına baxmayaraq, öz varlığını, inkişaf səviyyəsini, yaxın keçmişini qoruyub-saxlayıb.Teatrımızda səhnə hazırlığı olduqca yüksəkdir. Bu iki il ərzində səhnəyə 8 tamaşa qoyulub. Serb yazıçısı M.Mitroviç “Gecə yarısı, soyğunçuluq”, A. Mədətov “Çarəsiz evlənmə”, Ə. Haqvediyev ”Kimdir müqəssir”, E. Hüseynbəyli “Qaçaq qocalar”, Ş. Perro ”Sehrbaz qadın”, S. Elsevər ”Ürəyində arzu tut”, N.B. Vəzirov “Ağa Kərim xan Ərdəbili” tamaşaları səhnəyə qoyulub. Yeri gəlmişkən qeyd edim ki, Ağdam Rayon İcra Hakimiyyətinin başçısı Raqub Məmmədov teatra çox böyük qayğı göstərir. Hər vaxt bizə dəstək olur və bütün tamaşaların premyerasında iştirak edərək, öz məsləhətlərini verir. Söz düşmüşkən deyim ki, Mədəniyyət Və Turizm nazirinin müavini Ədalər Vəliyev bu yaxınlarda Ağdama gəlib, teatrın mövcud durumu ilə maraqlandı, yaradıcı heyətlə görüşdü, onların qayğıları, həyat tərzi ilə tanış oldu. Aprel hadisələri zamanı və indinin özündə də Ədalət müəllim hər gün telefon edib bizimlə sıx əlaqə saxlayır, öz köməkliyini edir.

- Bəs indinin özündə hansı tamaşaya hazırlaşırsınız?

- Teatrın əməkdaşları yay tətilinə çıxıb. Diqqətinizə çatdırım ki, 23 ilyul 1993-cü ildə erməni işğalçı ordusu Ağdamı işğal edib. Məzuniyyət günü olmasına baxmayaraq, işğal gününə hazırlaşırıq. Artıq teatrın aktyoru Nizami Ələsgəroğlunun “O kənd bizim kəndimizdir” tamaşası üzərində iş aparılır. Və həmin gün bu tamaşa səhnəyə qoyulacaq. Onu da deyim ki, teatrın aktyorları vaxtaşırı cəbhə bölgəsinə, “N” saylı hərbi hissələrə gedib, əsgərlərimiz qarşısında tamaşalar verirlər. Hətta “N” saylı hərbi hissənin sosilal-siyasi işlər üzrə komandir müavini ilə razılaşma aparılıb, hər ay əsgərlər qarşısında tamaşa verəcəyik.

- Teatrın problemləri barədə nə deyərdiniz?

- Teatrın bir problemi var, o da tamaşaçı qıtlığıdır.

Qələndər Xaçınçaylı

Həftə içi.- 2016.- 15 iyul.- S.4.