“Ürəklərdə axtarın” kitabı

Atatürk Mərkəzində təqdim olundu

Nəriman Həsənzadə: «Biz yaxın gələcəyin şöhrətli ürək cərrahını itirdik”

Atatürk Mərkəzində Azərbaycanın ilk invaziv-kardioloqu doktor Cavid Həmişəyevin xatirəsinə həsr olunmuş yazıçı Səbinə Yusifin yazdığı “Ürəklərdə axtarın” kitabının təqdimat mərasimi keçirilib. Xatırladaq ki, tibb elmləri üzrə fəlsəfə doktoru Cavid Həmişəyev 1977-ci ildə Bakı şəhərində doğulub. 1983-cü ildə Nizami rayon 12 saylı tam orta məktəbin 1-ci sinfinə daxil olub.

8-ci sinfi adıçəkilən təhsil ocağında bitirdikdən sonra, təhsilini Bakı şəhər kimya-biologiya təmayüllü liseydə davam etdirib. 1993-cü ildə adıçəkilən liseyi əla qiymətlərlə bitirən Cavid Həmişəyev sonradan təhsilini Azərbaycan Tibb Universitetinin müalicə-profilaktika fakültəsində davvam etdirib. 1999-cu ildə sözügedən təhsil müəssisəsini fərqlənmə diplomu ilə bitirərək, təyinatla akademik M. A.Topçubaşov adına Elmi Tədqiqat Klinik Təbabət İnstitutunda həkim kimi fəaliyyətə başlayır. Sonra dünyaşöhrətli alim-həkim doktor Cavad Heyətin təkidi ilə İran İslam Respublikasının paytaxtı Tehran şəhərində fəaliyyət göstərən İmam Xomeyni adına Tibb Elmləri Universitetinin Xəstəxana Kompleksində həkim-rezident vəzifəsinə qəbul olunur. Bir müddət burada fəaliyyət göstərən Cavid Həmişəyev təhsilini Türkiyənin Samsun şəhərindəki “19 Mayis” Unversitetində Uzman kimi davam etdirir. 2008-ci ilin yanvarından Azərbaycan Respublikasının Prezidenti Yanında Xüsusi Tibb Xidmətinin Mərkəzi Klinik Xəstəxanasında həkim-kardioloq kimi fəaliyyət göstərir. 2011-ci ildə isə alim-kardioloq kimi, ATU-nun Tədris Terapevtik Klinikasında anjioqrafiya şöbəsinin müdiri təyin edilir. C. Həmişəyev Beynəlxalq Kardioloqlar Cəmiyyətinin və bir çox ölkələrin Kardiologiya cəmiyyətlərinin üzvü olmaqla, Azərbaycanda ilk invaziv-kardiolq kimi calışıb. O, 2012-ci ildə tibb üzrə fəlsəfə doktoru elmi dərəcəsi adını alıb. 25 may 2013-cü il tarixində gənc dünyaşöhrətli alim sifarişlə, vəhşicəsinə qətlə yetirilib.

Tədbiri giriş sözü ilə açan Atatürk Mərkəzinin rəhbəri, millət vəkili professor Nizami Cəfərov bildirdi ki, Cavid kimi bir oğul ürəyi dünya boyda geniş atasını - Zaməddin Ziyadoğlunu bu qədər naçar, sorğu-suallar qarşısında qoymamalı idi: «Zaməddin müəllim neçə aydır məndən xahiş edir ki, Cavid haqqında bir söz yazım. Mən də neçə aydır ki, “sabah yazacam” deyirəm. Gəlirəm, otururam stolun arxasında... Hamıdan, hər şeydən yazıram... bir Caviddən başqa... Deyək, yazdım ki, gözəl cərrah-ürək həkimi idi, tibb elmləri üzrə fəlsəfə doktorluğunu təzəcə müdafiə eləmişdi, böyük uğurları, ondan da böyük perspektivləri vardı... Deyək, yazdım ki, çox istiqanlı, təmkinli, təvazökar bir oğlan idi... Deyək yazdım... və yazıram... Ancaq bu yazı, yaxud yaza-yaza düşündüklərim Zaməddin müəllimə bir narahatlıq gətirəcəkmi?.. Övlad itkisi həmişə ağırdır. Cavid kimi bir oğlun itkisi isə daha ağırdır... Ona təkcə ürəyi ilhamla, yaradıcılıq eşqi ilə dolu, xəyalı göylərdə gəzən, övladının hər uğuruna romantik bir şair qəlbi ilə sevinən atanın yox, hər bir adi ürək xəstəsinin ehtiyacı vardı. Zaməddin müəllim! Cavidi ürəklərdə axtar”.

Xalq şairi Nəriman Həsənzadə də Cavidlə bağlı xatirələrindən söz açdı: “Nəvəmin ad günündə sonuncu dəfə görüşdük. Qucaqlayıb üzündən öpdüm. Səmimi, mehriban, istiqanlı bir gənc, ziyalı idi Cavid. Dostum, eloğlum daşsalahlılı Bəkir Əyyubovun ürəyində uğurlu cərrahiyyə əməliyyatı aparmışdı. Mənim ürəyimi də müalicə edirdi Cavid. Xəstəxanada yatanda Cavid otağa daxil olub mənim əhvalımı soruşanda deyərdim: “Cavid, inanın ki, ürəyim sənin səsini eşidən kimi, 15 yaşında cavan ürəyi kimi gəncləşir, ağrıları gedir”.

Yaxın gələcəyin şöhrətli ürək cərrahını itirdik. Yüksək ailə tərbiyəsi, ali məktəb təhsili görmüş bir gənc alimə, xarici ölkələrə cərrahiyyə əməliyyatı üçün dəfələrlə dəvət alan yeniyetmə azərbaycanlı oğluna qəsd etdilər!”.

Millət vəkili YAP Qaradağ Təşkilatının sədri Aydın Hüseynov anasının ürək ağrılarından tez-tez şikayətləndiyini və onun müayinə olunması üçün Mərkəzi Klinik Xəstəxanaya müraciət etdiyini, orada onları Cavid adlı həkimə yönəltdiklərini söylədi: “Bizi mehriban qarşılayan həkim anamla səmimi söhbət etdi. Anamın ləhcəsindən nə hiss etmişdisə, həkim də anamla elə bu ləhcə ilə danışmağa başladı və ürək ağrıları ilə bağlı sorğu-sual etdi. Uzun söhbətdən sonra, nəhayət, anam ürəyindən əməliyyat olunmasına razılıq verdi. Halbuki əvvəllər əməliyyat olunmağına anam qəti şəkildə etiraz edirdi. Həkim anamı necə razı saldı, bu mənə də çox qəribə gəldi. Anamın ürəyində aparılan əməliyyat çox uğurlu alındı. Cavid kardiologiya sahəsində ən peşəkar həkim idi. Baxmayaraq, cavan idi, amma o, tibb sahəsinə çox böyük yeniliklər gətirdi”.

Qohumlar adından Tofiq Mansurov, proffessor Valeh Nəsibli, filoloq-alim Yusif Afşar, “İTV”nin əməkdaşı Akif Cabbarlı və həkim dostları çıxış edərək, kitab haqqında öz ürək sözlərini bildirdilər.

Sonra Cavid Həmişəyevin atası, şair Zaməddin Ziyadoğlu tədbir iştirakçılarına və kitabda xatirələrlə çıxış etmiş hər bir şəxsə, ziyalıya, eləcə də əziyyət çəkib bu kitabın ərsəyə gəlməsində əməyi olan yazıçı Səbinə Yusifə öz minnətdarlığını bildirdi...

Qələndər Xaçınçaylı

Həftə içi.- 2017.- 14 mart.- S.4.