Qara Qarayevin 100 illik yubileyi keçirilib

Beynəlxalq Muğam Mərkəzinin "Unudulmayanlar" adlı yeni, möhtəşəm layihəsinin ilk tədbiri keçirilib.Metbuat.az-ın məlumatına görə, Beynəlxalq Muğam Mərkəzinin təşkilatçılığı və "Mədəniyyət" kanalının dəstəyi ilə keçirilən “Unudulmayanlar” adlı möhtəşəm layihənin məqsədi Azərbaycan milli musiqisinin yaradılması tarixində əvəzolunmaz rol oynamış görkəmli bəstəkarların, klassik musiqi və muğam ifaçılarının həyat və yaradıcılıqlarına dair tədbirlərin təşkil olunmasıdır.

İlk tədbir martın 5-də dahi bəstəkar, məşhur alim-pedaqoq, ictimai xadim, SSRİ Xalq artisti, Sosialist Əməyi Qəhrəmanı, SSRİ və Azərbaycan dövlət mükafatları laureatı, akademik Qara Qarayevin 100 illik yubileyinə həsr olunub.

Qeyd edək ki, Qara Qarayevin anadan olmasının 100 illiyi haqqında Azərbaycan Respublikasının Prezidenti İlham Əliyevin 17 oktyabr 2017-ci il tarixli sərəncamına uyğun olaraq ölkəmizdə və onun hüdudlarından kənarda yubiley tədbirləri keçirilir.

Qara Qarayev 1918-ci il fevralın 5-də Bakı şəhərində məşhur həkim-pediatr Əbülfəz Qarayevin ailəsində anadan olmuşdur. Qara Qarayev nəslində özünü musiqi sənətinə həsr eləmiş ilk şəxsdir. 1926-cı ildə Azərbaycan Dövlət Konservatoriyası yanında musiqi məktəbinə qəbul edilmiş, 1930–cu ildən Azərbaycan Dövlət Konservatoriyası yanında musiqi texnikumunda professor Georgi Şaroyevin fortepiano sinfinin tələbəsi, 1935–ci ildən isə Azərbaycan Dövlət Konservatoriyasında bəstəkarlıq (Leopold Rudolf) və Azərbaycan xalq musiqisinin əsasları (Üzeyir Hacıbəyov) siniflərinin tələbəsi olmuşdur. 1938–ci ildən 1940-cı ilədək P.İ.Çaykovski adına Moskva Dövlət Konservatoriyasında bəstəkarlıqdan (A.N.Aleksandrovun sinfi) təhsil almışdır. Bakıya qayıtdıqdan bir müddət sonra 1946-cı ildən Moskva Dövlət Konservatoriyasında bəstəkarlıq sinfinin (Dmitri Şostakoviç) tələbəsi olmuşdur.

Tədbir Azərbaycan Televiziyasının Qara Qarayev haqqında çəkdiyi filmdən bir hissənin nümayişi ilə başladı. Böyük maraqla keçən gecədə Əməkdar incəsənət xadimi, Bakı Musiqi Akademiyasının professoru, Azərbaycan Bəstəkarlar İttifaqının katibi, Zenfira Qafarova və Bakı Musiqi Akademiyasının professoru, Xalq artisti Zəhra Quliyeva çıxış edərək, “Unudulmayanlar” layihəsi haqqında ,həmçinin Qara Qarayevin Azərbaycan və dünya musiqi tarixində unudulmaz bəstəkar kimi əvəzolunmaz yaradıcılığından söhbət açıblar .

Konsertdə Azərbaycan Dövlət Fortepiano Triosu , Əməkdar artistlər Nərgiz Kərimova və Aleksey Miltıx, məşhur ifaçılar Səidə Tağızadə, Ceyla Səyidova və Eldəniz Ələkbərzadə tərəfindən Q.Qarayevin əsərləri səslənib.

“Unudulmayanlar” layihəsinin növbəti tədbiri aprelin 6-da opera müğənnisi, xanəndə, Xalq artisti Həqiqət Rzayevanın həyat və yaradıcılığına həsr ediləcəkdir.

Həftə içi.- 2018.- 7 mart.- S.8.