“Haqqın sevdası” kitabı təqdim edilib

“Azərkitab” Kitab Təbliğat Mərkəzində şair Minarə Sığnaqın təzəzə işıq üzü görmüş “Haqqın sevdası” kitabının təqdimatı keçirilib. Tədbiri “Ulduz” jurnalının əməkdaşı şair Fərqanə Mehdiyeva açaraq bildirdi ki, bu gün biz Minarə xanımın işığına yığışmışıq.

Çox istedadlı yazar, gözəl şairlərimizdən biridir: “Vətən, yurd sevgisi, ata-ana istəyi, bir də sevdalı bir qəlbin titrək pıçıltıları var onun şeirlərində. İtirilən torpaqlarımızın ağrısını ürəkdən, candan yaşayan bu xanlm şəhidlərimizə, Vətənimizin bütövlüyü uğrunda çarpışan igid oğullarımıza da şeirlər həsr edib, müstəqil ölkəmizin ildən-ilə artan şöhrəti, bayrağımızın ucalığı, möhtəşəmliyi bu şairə xanım üçün əsl ilham mənbəyidir”.

Kitabın redaktoru və “Ön söz” müəllifi şair Musa Ələkbərli Minarə xanımın yaradıcılığı barədə ətraflı məlumat verdi. Bildirdi ki, Minarə Sığnaq Tovuz rayonunun ən uca bir dağ kəndində doğulub. Slğnaq dağının köksünə sığınan bu kənd respublikamızda sayılıb-seçilən yüzlərlə şəxsiyyətr yetirib: “Xatırladım ki, Minarə xanım ağır məhrumiyyətlərlə üz-üzə qalıb, dünyalar qədər sevdiyi ömür-gün yoldaşını çox erkən itirib, sonra tale onun sinəsinə bala dağı da çəkib. Ömür yollarında tək-tənha qalan bu xanım yeganə qız balasına həm ata olub, həm də ana... Böyüdüb, alitəhsilli həkim eləyib. Qayğı və nəvazişini ondan əsirgəməyib. Sizlərə dediyim bu kəlmələri mən Minarə xanımın özündən yox, şeirlərindən, təkrarsız duyğularından “soruşub” öyrənmişəm. Sözügedən bu kitab – “Haqqın sevdası” bir qadın qəlbinin ağrılı-köynəkli, bəzən də sevincli, şən pıçıltılarıdır. Qarabağ itkisinə dözə bilmir, ölməz şəhidlərimizin qəbri üstündə göz yaşı tökə-tökə “Alın Şuşamızı”, – deyə xalqımızı döyüşə səsləyir, haray qoparır.

Onun şeirləri qafiyəsi, təqti, bölgüsü, nizamı ilə də özünəməxsusdur, bəzən də heç bir qayda-qanun gözləmir, ürəyi necə deyirsə, elə də yazır. O, azadlığa şeir, şeirə isə azadlıq kimi baxır. Bu ilk kitabınız – azadlığınız mübarək, Minarə xanım! Haqqın sevdası ürəyinizdən heç zaman əskik olmasın”.

Şairlərdən Qələndər Xaçınçaylı, Qərib Nəsirov, Ziyafət Tovuzlu, Elmira Aslanlı, nasir Zərifə Sufi, rəssam-qəzəlxan Bəxtiyar Məmmədov və başqaları çıxış edərək şairin özünəməxsus yaradıcılığından danışdılar.

Qələndər Xaçınçaylı

Həftə içi.- 2019.- 16 aprel.- S.7.