Doğum günündə torpağa tapşırılan, cüdoçu şəhidimiz Yusif Nəcəfov

Havası vətən eşqi ilə qoxan Azərbaycanımızın hər qarış torpağında ya şəhid qanı var ya da məzarı... Bu torpaqlar yüzillərdən bəri uğrunda can alıb can verənlərin sayəsində Vətən olub. Dünən qəhrəmanlıq hekayələri ilə yuxuya dalan körpələr, bu gün Qarabağda dastan yazdılar. Belə igidimizdən biri də Böyük Vətən müharibəsinin 19 yaşlı şəhidi Yusif Nəcəfovdur.

O, 2001-ci ilin 13 oktyabr tarixində Yasamal rayonunda anadan olub. Burada 52 nömrəli tam orta məktəbdə təhsil alıb. Ailənin ortancıl övladı idi, böyük qardaşı hazırda əsgərdir, bacısının isə 12 yaşı var.

Şəhidimiz 5-6 il cüdo idman növü ilə məşğul olub. Bu müddətdə İran, Türkiyə Gürcüstan və Azərbaycan Respublikalarının şəhərlərində keçirilən çoxsaylı idman yarışlarının iştirakçısı olub, yüksək nailiyyətlər əldə edib. Bayrağımızı dəfələrlə xarici arenalarda dalğalandırıb.

Yusif tam orta məktəbi bitirdikdən sonra hərbi xidmətə yollanır. 2020-ci il oktyabr ayı, əsgər Nəcəfov xidmətinin 1 ilini tamamlamışdı, gəlməyinə isə hələ 6 ay var idi. Lakin, o, oktyabrın 13-ü, Böyük Vətən müharibəsinin 16-cı günündə qəhrəmancasına şəhid olur. Ayın 14-ü, özünün 19-cu doğum günündə isə, torpağa tapşırılır.

Yusifin hərbi xidmətdə vəzifəsi ilk olaraq manqa komandiri, daha sonra sanitar təlimatçı və top komandiri olub. Hərbi xidmət dövründə əsgər yoldaşları və rəislərinin hörmət, sevgisini qazanmışdır. Müharibəyə qədərki dövrdə həmişə bir çox əsgərlərdən təlim, tərbiyəsinə görə seçilmişdir.

Hafta.az şəhidin anası Flora Nəcəfova ilə həmsöhbət oldu, o öz xatirələrini bizimlə bölüşdü.

Ana deyir ki, sonuncu dəfə övladını 8 ay öncə, yanvar ayında görüb. Pandemiya ilə əlaqədar görüşməyə imkan yox idi. Bu müddətdə tez-tez telefonla danışıblar.

Sentyabr ayının 27-si cəbhədə şiddətli döyüşlər başlayanda ailə narahat olur. Yusif valideynlərinə ön xəttə olduğunu desəydi onların necə nigaran qala biləcəyini yaxşı bilirdi. Buna görə də hər dəfə, yaxşı olduğunu, hələ döyüşə aparılmadıqlarını söyləyirdi.

"Oğlum oktyabrın 1-i, cəbhədə yaralanıb daha sonra 12 gün müalicə alıb, ardınca 13-cü gün təkrar döyüşə qayıdıb elə həmin gün də, cəbhənin Kəlbəcər rayonu istiqamətində şəhidliyə ucalıb. Döyüşə aparıldığını belə bizdən gizlətmişdi, elə hey deyirdi ki, hələ arxadayıq, məndən nigaran qalmayın. Hətta, yaralandığını da bizə bildirmədi. Bircə xalasına deyib, ona da and içdirib ki, evdəkilərdən heç kəsə bununla bağlı bir söz deməsin. Boynundan və ayağından yaralanmışdı. Atası şəkər xəstəsi idi, onu qorxutmaq istəməyib. Mən iki gün sonra bildim ki, balam xəstəxanadadır. Bu günlərdə də bizimlə danışırdı, amma, heç nə hiss etdirmirdi".

-Məni Allah öldürsün, burda isti evimdə oturmuşam, siz isə soyuq torpağın üstündə yorğan-döşəksiz yatırsız, bizim üçün döyüşürsüz.

-Ay ana, niyə elə deyirsən? Dua et sağ-salamat torpaqlarımızı düşməndən azad edək.

Bu da şəhidin anası ilə son danışığındandır.

"Qonşuluqda yasin oxuyan seyid qadın var idi. Yusif şəhid olmamışdan bir gün öncə mənə dedi ki, ana, Hökümə xalaya deyərsən, Əbəlfəz ağa ilə şəhidlərimizə yasin oxusun. Dinə çox bağlı uşaq idi. Namaz qılır, mütəmadi olaraq məscidə gedib ibadət edirdi. Elə onun səhəri gün şəhid xəbəri gəldi".

Flora xanım oğlunun necə istiqanlı və sevgi dolu gənc olduğunu da vurğuladı:

"Burda bizi tanıyan kim varsa, Yusifin gedişi ilə sarsıldı. 19 illik ömründə bir dənə də olsun qəlb qırmayıb, hər kəsin xətrini əziz tutardı".

Qeyd edək ki, hazırda ailənin böyük övladı da əsgərdir. O qardaşının şəhid xəbərini eşidəndən sonra, psixoloji sarsıntı keçirib, hospitalda müalicəsi davam edir. Vəziyyəti ilə maraqlandıq, ana yaxşı olduğunu bildirdi.

İndi ailənin bir istəyi, övladının məzarının köçürülməsi. Ana deyir ki, Yusiflə birlikdə 17 şəhid məzarı var ki, valideynlər ora getməyə çətinlik çəkirlər:

"Düzüdür, biz onların ailəsiyik, nə qədər ki sağıq, gedib ziyarət edəcəyik. Qorxuram ki, bizdən sonra, həmin məzarlar unudulsun. Ora elə bir yerdir ki, taksilər belə çətin tapır. İndi bununla bağlı bir neçə yerə müraciət etmişik, məsələyə baxılacağına söz veriblər".

Biz də ümid edirik ki, aidiyyəti orqanlar məsələ ilə bağlı lazımi tədbirlər görəcək. Şəhid ailələrinin problemi tezliklə öz həllini tapacaq.

Vətən sevgisi vətənə xidmətlə olur deyirlər. Onlar Vətən üçün yaşayıb, Vətən üçün ölənlər, torpağa deyil, milyonların qəlbinə gömülənlərdir. Gedərkən isə, bizə bir gələcək buraxıblar. Mərdliklə yazılı tarixin gələcəyi... Məkanın cənnət olsun şəhid Yusif Nəcəfov.

Banu

Həftə içi.- 2020.- 24 dekabr.- S.10.