"Azərbaycanla Ermənistan münaqişədə olmağa layiq deyillər"

Armen Cigərxanyan: "Bu gün Arbatda yaşadığım mənzili Heydər Əliyevin köməkliyi ilə almışam"

"Elə başa düşürəm ki, heç kimi, özünü və başqalarını aldatmaq lazım deyil. Xalqlarımız arasında yaranmış münaqişəyə gəlincə isə bu, məsuliyyətsiz insanların işidir. Çox təəssüflər olsun ki, dünyada "nə qədər pisdirsə, o qədər yaxşıdır" prinsipi ilə yaşayanlar çoxdur.

Bu insanların öz maraqları mövcuddur və biz onları başa düşməyə çalışırıq. Amma bu maraqlar qonşulara və taleyə sirayət olunarsa, deyə bilərəm ki, Azərbaycanla Ermənistan münaqişədə olmağa layiq deyillər. Çoxlu azərbaycanlı dostlarım var. Amma çox gözəl xatırlayıram ki, Rus teatrında işlədiyim vaxtlarda bizim Bakıya qastrol səfərlərimiz olurdu. Bu bizim üçün bayram idi. Nəzərimcə Bakı - dünyanın teatr şəhərlərindən biridir. Bu ölkədə böyük ziyalılar var, bu, güclü dövlətin güclü mədəniyyəti deməkdir. Bu vaxta qədər yadımdadır ki, Zeynəb Xanlarova bizim stadionda necə konsert proqramı ilə çıxış edib". Bunu "1news.az"a müsahibəsində SSRİ xalq artisti, ermənilərin dünyada tanınmış ziyalılarından biri Armen Cigərxanyan bildirib. Onun sözlərinə görə, iki xalq arasında münaqişənin yaranmasına heç bir əsas olmayıb. O, xalqlar arasında qohumluq əlaqələrinin mövcudluğunu xatırladaraq həyat yoldaşının rus olmasını sitat gətirib: "Bu ona əsas vermir ki, aramızda münaqişə yaransın".

A.Cigərxanyan milliyyətinə görə özünə dost seçmədiyini də deyib. Onu da qeyd edib ki, yaradıcılığı, işi dostlar arasında seçim etməyə imkan vermir. O, Tahir Salahovla möhkəm dost olduğunu deyib: "10 il öncə Azərbaycanın səfiri mənə zəng vurdu ki, gəl görüşək, birlikdə çay içək. Mən razılıq verdim, çünki şirin çay içməyi çox xoşlayıram. Hazırlaşırdım getməyə, yenidən zəng etdi ki, bəs başqa tədbirə çağırılıb, görüşümüzü təxirə salmaq məcburiyyətində qaldıq".

Erməni ziyalısı ümummilli lider Heydər Əliyevlə də yaxşı münasibətdə olduğunu söyləyib: "Sovetlərin vaxtında bir dəfə Bakıda idim. Heydər Əliyevlə görüşümdə o mənə "bu insana hörmət edirəm" deyib. Bunun üstündən çox vaxt keçdi. Mənzil almaq məsələsində problemlərlə üzləşdim. Mənə məsləhət verdilər ki, Siyasi Büronun üzvlərindən biri razılıq verərsə, sən mənzillə təmin olunacaqsan. Mən onda Siyasi Büronun üzvlərindən yalnız Əliyevi tanıdığımdan ona müraciət etdim. Mənə dedi məktub yaz və Qızıl Meydandakı poçt qutusuna at. Belə də etdim. Amma illərlə gözləməli olacağımı da düşündüm. Bir gün Mayakovski teatrında məşq zamanı teatrın direktoru mənə dedi ki, sizi telefona çağırırlar. Sən demə, mənzil məsələmə görə zəng vurublar. Bunları mənim üçün Heydər Əliyev etmişdi. Bundan sonra bir daha onu görmədim. Bu gün Arbatda yaşadığım mənzili Heydər Əliyevin köməkliyi ilə almışam". A.Cigərxanyan Bakıya son dəfə "Dulsineya Tobosskaya" şəkillərinin çəkilişi zamanı dəvət olunduğunu deyib. Bu faktın münaqişədən sonra olduğunu söyləyən erməni ziyalısı "aeroportda məni müşayiət etmək təklifini verdilər. Dedim məni orada gözləyən olacaq, ehtiyac yoxdur. Sakitliklə Bakıya gəldim. Hətta mənə deyirdilər ki, ehtiyatlı olum. Amma nədən, bilmirdim". A.Cigərxanyan ermənilərlə azərbaycanlılar arasında yaranmış münaqişənin həlli üçün möhkəm və mükəmməl qanunun qəbul edilməsinin zəruriliyini bildirib. Onun fikrincə, elə bir qanun qəbul olunmalıdır ki, bu münaqişədə maraqlı olan qüvvələri öz yerlərində oturtsun.

Elnur

Həftə içi.- 2009.- 2 aprel.- S. 3.