"Əgər indi sussaq, uduzacağıq"

Lalə Abbasova: "Bilirik ki, Milliyyətçi Hərəkat Partiyası Ermənistanla sərhədlərin açılmasına qarşıdır"

Türkiyənin Ermənistanla sərhədlərini açacağı ilə bağlı son günlər yayılan məlumatlar artıq azərbaycanlı millət vəkillərini də hərəkətə gətirib. Milli Məclisin son iclasında spiker Oqtay Əsədov xanım deputatların türkiyəli həmkarlarının dəvəti ilə bu ölkəyə səfər edəcəklərini, bu məsələnin onlarla da müzakirə olunacağını bildirdi.

Qeyd olunan məsələ ilə bağlı suallarımızı isə Türkiyəyə gedəcək nümayəndə heyətinin üzvü, millət vəkili Lalə Abbasova cavablandırdı:

- Bizi Ankaraya Türkiyənin Milliyyətçi Hərəkat Partiyası dəvət edib. Əsas məqsəd qadın problemləri ilə bağlı qarşılıqlı fikir mübadiləsi aparmaqdır. Biz aprelin 14-dən 17-nə kimi Ankarada olacağıq. Ayın 15-də Atatürkün məzarını ziyarət edəcəyik, daha sonra isə bizim Türkiyə Böyük Millət Məclisinin rəhbərliyi tərəfindən qəbulumuz planlaşdırılır. Daha sonra isə Milliyyətçi Hərəkat Partiyasının qərargahında görüşümüz olacaq. Aprelin 16-da isə türkiyəli həmkarlarımızla müzakirələr apararaq mətbuat konfransı keçirəcəyik.

- Spiker bu səfər çərçivəsində Türkiyə - Ermənistan sərhədlərinin açılması ilə bağlı məsələnin də müzakirə olunacağını bildirib...

- Bəli, keçirəcəyimiz görüşlərdə bu məsələni də qaldıracağıq. Bilirik ki, Milliyyətçi Hərəkat Partiyası Ermənistanla sərhədlərin açılmasına qarşıdır. Bizim də məqsədimiz orada bu partiyaya sözügedən məsələ ilə bağlı dəstəyimizi göstərməkdir. Əgər bir millət - iki dövlətik deyiriksə, bir-birimizin mənafeyini qorumalıyıq. Müəyyən qrupların dövlətlərimiz arasında dostluq münasibətlərini korlamasına imkan verməməliyik. Biz siyasətin dərinliklərinə dalarkən Azərbaycanın mənafeyini qoruyan və bir millətin digər dövlətinə xələl gəlməsini istəməyən partiyanı dəstəkləyirik. Bununla bağlı mövqeyimizi ortaya qoyacağıq. Türkiyə hökuməti tərəfindən sərhədlərin açılması yanlış qərar olardı. Bu bizim münasibətlərimizə də mənfi təsir göstərə bilər. Sərhədlər açılsa, Ermənistanın iqtisadi vəziyyətinin düzəlməsinə güclü təsir göstərəcək, müəyyən əlaqələr qurulacaq. Lakin bu gün Ermənistan çox pis vəziyyətdədir. Hazırda bu gün onlara dəstək verən Rusiya da öz hayındadır. Sərhədlər açılsa, ermənilər bundan yaxşı istifadə edəcəklər. Qarabağ məsələsi isə olduğu kimi qalacaq və münaqişənin həlli uzanacaq. Hətta Azərbaycan və Ermənistan prezidentlərinin görüşləri də nəticəsiz qalacaq.

- Niyə qadın millət vəkillərimiz kişi həmkarlarından fərqli olaraq bu məsələylə bağlı ümumi bəyanat vermirlər, hansısa fikirlər səsləndirmirlər?

- Bu fikirlə razı deyiləm. Biz qadın millət vəkilləri olaraq Türkiyəyə gedib fikirlərimizi birbaşa çatdıracağıq. Həmçinin mətbuata açıqlamalarda da onlar bu məsələylə bağlı narahatlıqlarını dilə gətirirlər. Sərhədlərin açılması ehtimalı qadın millət vəkili kimi məni də çox narahat edir. Çünki türk dövlətləri kimi bir olmasaq, böyük dövlətlər bizi çox tez əzə bilərlər.

- Türkiyə parlamentində sərhədlərin açılmasına etiraz edən siyasi qüvvələr arasında Cümhuriyyət Xalq Partiyası MHP-dən daha güclüdür. Səfəriniz zamanı bu partiyanın millət vəkilləri ilə də görüşəcəksiz?

- Nümayəndə heyətimizə neçə qadın millət vəkilinin daxil olduğu aydınlaşdıqdan sonra öz aramızda bu məsələ ilə bağlı müəyyən müzakirələr aparacağıq. Həmçinin səfər proqramından kənar kimlərlə görüşə biləcəyimizi də müəyyənləşdirəcəyik. Yəni biz Ankaraya müəyyən plan quraraq gedirik.

- Bu məsələni AKP hökuməti ortaya atıb. Niyə qadın millət vəkilləri sərhədlərin açılması yönündə danışmaq üçün bu partiyadan olan həmkarlarını Bakıya dəvət etmir?

- Bu da mümkündür. Səfər reallaşdıqdan sonra vəziyyət barədə tam təsəvvürümüz yaranacaq. Məhz nəticələr aydınlaşdıqdan sonra sonrakı addımlarımızın nədən ibarət olacağını müəyyənləşdirəcəyik. Hələliksə bu barədə danışmaq bir qədər tezdir.

- Necə fikirləşirsiniz, səfərinizin hansısa nəticəsi olacaq?

- Yəqin ki, hə. Ancaq bu, çox çətin olacaq. Əgər biz indi sussaq, uduzacağıq. Etiraz səsimizi qaldırsaq, daha ciddi mövqe ortaya qoysaq, müəyyən şeyləri həll edə bilərik. Əfsuslar olsun ki, bir qədər səhlənkar millətik. Yəni çox vaxt gec hərəkətə keçirik. Məsələn, martın 31-də soyqırımı qeyd etdik. Ancaq bu günü daha ciddi qeydə almalıyıq. Xalq özü buna etiraz səsini ucaltmalı, soyqırımla bağlı mitinqlər keçirməliydi.

- Sizcə, bu gün Türkiyədə Ermənistanla sərhədlərin açılmasına bu qədər meylin olması öz günahımız deyil?

- Məsələnin belə şəkil alması Azərbaycanın bəzi siyasətçilərinin səhlənkarlığıdır. Bu gün Türkiyədə yaşayan çox azsaylı, lakin millətçi ermənilər öz işlərini aparırlar. Biz isə bu gün duraraq öz sözümüzü deyirik. Sabah isə yaddan çıxarırıq. Lakin onlar heç bir şeyi unutmurlar. Ermənilərin qisas meylləri hər zaman beyinlərindədir. Düşünmək istəmirlər ki, heç bir valideynə görə uşaqları günahkar deyil. Artıq XXI əsrdir və insanlar daha qlobal səviyyədə düşünməlidir. Həmişə müsbət cəhətlərimizdən yararlanan digər millətlər istəyiblər bizi əzsinlər. Bu, dövlətlərarası münasibətlərə aiddir. Ermənilər çox iddialıdırlar. İddiaları tək bizə deyil, eyni zamanda Türkiyəyə və digər ölkələrədir. Əgər beynəlxalq birlik onları yerlərinə oturtmasa, başqa dövlətlər arasında da çox böyük faciələrə yol açıla bilər.

- Ermənistanla əlaqələrin yumşaldılması istiqamətində addımların atılması indiki türk hökumətinin qorxaqlığı kimi dəyərləndirilir. Siz necə fikirləşirsiz?

- Orada müəyyən qüvvələr bu istiqamətdə çox ciddi səy göstərirlər. Buna qorxaqlıq deməzdim, sadəcə, uzaqgörənlikləri yoxdur. Bu xalqda hardasa islam dövlətlərinə xas avamlıq və məsələyə dar çərçivədə baxmaq var.

Azad Əliyev

Həftə içi.- 2009.- 7 aprel.- S. 1-2.