"İrandan inciməyə haqqımız yoxdur"

"Güclü ordu yaradıb işğal altındakı torpaqlarımızı azad edəriksə, bizimlə hesablaşarlar"

Bəzi qüvvələr İran - Ermənistan dəmir yolu xəttinin çəkilməsi məsələsinin rəsmi Tehranın Bakıya siyasətinin sərtləşdirilməsi kimi qəbul edirlər. Onların fikrincə, İran bu dəfə də Ermənistana açıq şəkildə dəstəyini büruzə verib. İslam Partiyası Ağsaqqallar Şurasının üzvü Hacıağa Nuri isə çoxlarından fərqli düşünür. Onun fikrincə, İran həmişə arzu edib ki, qonşuları, o cümlədən Ermənistanla sülh şəraitində yaşasın. Ona görə də İran - Ermənistan dəmir yolunun çəkilməsi rəsmi Bakının maraqlarına qarşı çıxmaq kimi başa düşülməməlidir. "İran həmişə Dağlıq Qarabağ məsələsində Azərbaycanın ərazi bütövlüyünü dəstəklədiyini bəyan edib" deyən H.Nuri İranın Ermənistanla mövcud isti münasibətlərinə də aydınlıq gətirib. Onun sözlərinə görə, müstəqil dövlət olan İranın hansı dövlətlə və necə əlaqələr yaratmasına maneə törətmək mümkünsüzdür: "Azərbaycan heç vaxt başqa ölkənin daxili işinə qarışmamalıdır. Eyni zamanda da digər dövlətlərin Azərbaycanın daxili işlərinə qarışmaq haqqı yoxdur. Necə ki son aylar Türkiyənin yürütdüyü məlum siyasətə mane olmuruq. Azərbaycanın İsraillə isti münasibətlərini də İran qəbul etmir. Ona görə də biz heç vaxt hansısa dövləti qınaq obyektinə çevirə bilmərik. Hərəsinin öz maraqları var. Amma rəsmi Tehran həmişə bəyanlayıb ki, Dağlıq Qarabağ məsələsində vasitəçiliyə hazırdır, biz isə ondan imtina etmişik". H.Nuri 1992-ci ildə İranın problemin həllində vasitəçilik etmək istədiyi bir vaxtda Şuşanın əldən getməsinin əsas səbəbini ABŞ və Rusiyada gördüyünü deyib. Onun sözlərinə görə, həmin vaxt bu dövlətlər bölgədə İranın sülhpərvər siyasət yürütməsinə mane oldular: "Biz heç vaxt heç kimdən inciməməliyik. Əgər güclü ordumuzu yaradıb işğal altındakı torpaqlarımızı azad edəriksə, onda bizimlə hesablaşarlar. Artıq vaxt yetişib, rəsmi Bakı öz mövqeyini və gücünü göstərməlidir. Sakitcə oturub problemi ATƏT-in Minsk Qrupunun nə vaxtsa həll edəcəyini gözləməklə heç nəyə nail ola bilməyəcəyik. Açığını desək, şəxsən mənə ağır gəlir ki, Ermənistan kimi bir dövlət ABŞ, Rusiya və İran kimi nəhəngləri öz tərəfinə çəkə bilib. Bizə təcili hansısa yolu seçmək lazımdır ki, vəziyyəti dəyişə bilək".

H.Nurinin fikrincə, Azərbaycanın beynəlxalq səviyyədə yürütdüyü siyasət, nüfuzu və çəkisi Ermənistandan qat-qat yüksəkdir. Rəsmi Bakının bölgədə tutduğu mövqeyi, müəllifi olduğu beynəlxalq əhəmiyyətli layihələr əsas verir ki, özünə güclü tərəfdaş tapsın: "Güclü tərəfdaş və güclü ordu olmadan bu problemi çözmək mümkünsüzdür. Mənə elə gəlir Azərbaycandakı bəzi qüvvələr qonşu dövlətlərlə münasibətlərində ehtiyatlı olmalıdırlar. Rəsmi Bakı öz siyasətini yaxşı bilir. Lakin elə qüvvələr mövcuddur ki, Azərbaycanı qonşuları ilə düşmən salmaq niyyətindədir və bu istiqamətdə fəaliyyət göstərirlər. Qonşularımızla yüksək səviyyədə, sülh şəraitində davranmaq lazımdır. Bu ancaq işin xeyrinə olar".

Elnur

Həftə içi.- 2009.- 7 aprel.- S. 3.