İşsizliyin səviyyəsi aşağı düşüb

Elnur Kələntərov: "İqtisadi fəal əhalinin sayı 4321,2 min nəfərə çatıb"

Əmək və Əhalinin Sosial Müdafiəsi Nazirliyinin (ƏƏSMN) mətbuat xidmətinin rəhbəri Elnur Kələntərovdan aldığımız məlumata görə, 2009-cu ilin 1-ci rübü üzrə statistik rəqəmlər xeyli qənaətbəxşdir. Müsahibimiz bildirdi ki, sözügedən kvartalda respublikamızda iqtisadi fəal əhalinin sayı ötən ilin müvafiq dövrü ilə müqayisədə 0,6 faiz artaraq 4321,2 min nəfərə çatıb: "İqtisadi fəal əhalinin 4059,7 min nəfəri, yəni 93,9 faizi məşğul əhalidir. Cari ilin fevralın 1-nə olan məlumata əsasən, müəssisə və təşkilatlarda muzdla çalışan işçilərin sayı əvvəlki ilin müvafiq dövrünə nisbətən 2,2 faiz artaraq 1407,6 min nəfər, yəni məşğul əhalinin 34,7 faizini təşkil edib. İqtisadiyyatın müxtəlif sahələrində çalışanların orta aylıq əməkhaqqı cari ilin yanvar və fevral aylarında ötən ilin ilk 2 ayı ilə müqayisədə 26,4 faiz artaraq 292,9 manata çatıb".

Onun dediyinə görə, bütün dünya ölkələrində mövcud olan işsizlik probleminin aradan qaldırılması sahəsində Azərbaycanda ardıcıl və məqsədyönlü tədbirlər həyata keçirilir və bu tədbirlər cari ilin ilk rübündə də özünün müsbət nəticələrini verib: "Qeyd olunan müddətdə respublikamızda işsizliyin səviyyəsi ötən ilin ilk rübünə nisbətən 0,4 faiz azalaraq 6,1 faizə enib. Məlumat üçün bildirim ki, bu göstərici Avropa Birliyinin əhatə etdiyi 27 ölkə üzrə cari ilin yanvar ayında 7,9 faiz təşkil edib".

Həmsöhbətimiz ƏƏSMN-in yoxsulluq problemləri və ünvanlı sosial yardım şöbəsinin məlumatına əsasən vurğuladı ki, cari ilin əvvəlinə kimi respublikamızda 775.652 nəfər üzvü olan 169.664 ailə dövlətdən ünvanlı sosial yardım (ÜDSY) alır. Onlardan 30.361 nəfər üzvü olan 6812 ailəyə cari ilin yanvar-fevral aylarında yardım təyin olunub: "ÜDSY mexanizminin tətbiqi nəticəsində dövlətdən ilk dəfə yardım alan ailələrin sayı 131.660-dır. Bu isə sözügedən yardımı alanların 77,6 faizini təşkil edir. ÜDSY alan ailələrin 51.206-sı ilk dəfə belə yardım təyin olunandır. Yardım təyin edilən ailələrdə 18 yaşadək olanların sayı 369.212, 1 yaşadək olanların sayı 12.892, üzrlü səbəblərə görə işləməyən əmək qabiliyyətli ailə üzvlərinin sayı 76.496, işləyən ailə üzvlərinin sayı 68.298, əmək pensiyası alanların sayı 47.291, sağlamlıq imkanları məhdud 18 yaşadək olanların sayı 10.079 nəfərdir. ÜDSY təyin olunan ailələrin 70.050-si 3 və daha çox uşağı olan, 283-ü qəyyumluq təyin edilən, 982-si tərkibində müharibə əlili olan, 21.856-sı digər səbəblərdən əlil üzvü olan, 15.166-sı məcburi köçkün və 44-ü şəhid ailəsidir. Bir ailəyə ayda orta hesabla 99.87 manat, hər ailə üzvünə isə 21.85 manat ÜDSY verilir və həmin yardımı alan ailələrin 91 faizi bu yardımları plastik kartlar vasitəsilə alır".

ƏƏSMN sözçüsü onu da vurğuladı ki, Azərbaycanda ehtiyac meyarının tədricən yaşayış minimumuna yaxınlaşdırılması dövlətin sosial siyasətinin əsas məqsədlərindən biridir və bu istiqamətdə mühüm addımlar atılır: "Dövlət başçısının 25 noyabr 2008-ci il tarixli sərəncamına əsasən, respublikamızda ehtiyac meyarının məbləğinin cari ilin yanvar ayının 1-dən 60 manat məbləğində təsdiqlənməsi qeyd olunan sahədə növbəti irəliləyişdir. Bildirim ki, 2006-cı ildə ölkəmizdə sözügedən məbləğ 30 manat idi və bu məbləğ yaşayış minimumunun 51,7 faizini təşkil edirdi. Hazırda isə ehtiyac meyarının məbləği 60 manatdır və onun yaşayış minimumuna nisbəti 71,4 faizdir".

707 mənzil tikiləcək

Həmsöhbətimiz xatırlatdı ki, ötən il ƏƏSMN-in sifarişi ilə 396 mənzil inşa etdirilərək Azərbaycanın ərazi bütövlüyü və konstitutsiya quruluşu uğrunda savaşlarda fiziki sağlamlığını itimiş vətəndaşların və şəhid ailələrinin istifadəsinə verilib. Bu da 2007-ci illə müqayisədə təxminən 2,3 dəfə çoxdur: "31 dekabr 2008-ci il tarixinə olan məlumata əsasən, bu vaxta qədər nazirliyimizin sifarişi əsasında respublikamızın ayrı-ayrı şəhər və rayonlarında 53 çoxmənzilli, 247 fərdi yaşayış evi, ümumilikdə 1689 mənzil tikilərək əlil və şəhid ailələrinə verilib. Ötən il Bakının Binəqədi rayonunda, həmçinin Sumqayıt, Zaqatala, Tovuz, Mingəçevir, İsmayıllı şəhər və rayonlarında 36 mənzilli, Qəbələ, Goranboy, Tərtər, Ağcabədi, Oğuz, Şəmkir, Qazax və Tovuz rayonlarında 16 mənzilli yaşayış binaları həmin təbəqədən olan ailələrin istifadəsinə verilib. Hazırda ölkənin müxtəlif bölgələrində 3 ədəd 16 mənzilli və 40 ədəd fərdi yaşayış evinin inşası yekunlaşmaq üzrədir və yaxın vaxtlarda həmin binalar əlil və şəhid ailələrinin istifadəsinə veriləcək".

Bu il 500 "Oka" paylanacaq

Nazirlik təmsilçisi qeyd etdi ki, sözügedən sahədə işlər ilbəil güclənməkdədir və cari il 707 mənzil inşa etdirilərək Qarabağ müharibəsi və şəhid ailələrinə veriləcək. Yeni tikilən binaların müasir tələblərə uyğun inşasına nazirlik tərəfindən daim xüsusi diqqət yetirilir və həmin evlər özlərinin rahat məişət şəraiti ilə öz sahiblərində razılıq hissi doğurur: "Onu da diqqətinizə çatdırım ki, dövlət tərəfindən minik avtomobili ilə təmin edlmək imtiyazı olan əlillərə və o cümlədən Böyük Vətən müharibəsi əlillərinə ümumilikdə 576 ədəd "Oka" markalı minik avtomobili paylanılıb. 2009-cu ildə daha 500 minik avtomobili növbəlilik prinsipi əsasında əlillərə təqdimlənəcək. Qeyd edim ki, 1998-ci ildən 2008-ci ilədək respublikamıza əlillər üçün 2085 ədəd "Oka" markalı avtomaşınlar alınaraq gətirilib və növbədə dayanmış Qarabağ müharibəsi, "20 Yanvar" əlilləri, Respublika Veteranlar Şurasının təklifi də nəzərə alınmaqla dövlət quruculuğunda, eləcə də gənc nəslin təlim-tərbiyəsində xüsusi xidmətləri olmuş Böyük Vətən müharibəsi əlillərinə verilib".

Nazir mayda Türkiyəyə gedəcək

E.Kələntərov onu da bildirdi ki, cari ilin may ayının ortalarında əmək və əhalinin sosial müdafiəsi naziri Füzuli Ələkbərov türkiyəli həmkarı F.Çelikin dəvəti ilə qardaş ölkəyə səfər edəcək. Səfərin məqsədi iki ölkənin müvafiq nazirliklərinin 6-cı birgə iclasında iştirak etməkdir: "Tədbirin Ankara şəhərində keçirilməsi planlaşdırılır. İclasda Türkiyə və Azərbaycan arasında sosial müdafiə sahəsi üzrə əməkdaşlıq, o cümlədən əmək bazarı münasibətləri üzrə təcrübə mübadiləsi, Dövlət Əmək Müfəttişliyinin potensialının gücləndirilməsi kimi məsələlər müzakirə ediləcək".

Təbriz Vəfalı

Həftə içi.- 2009.- 17 aprel.- S. 5.