"İslam mədəniyyəti kitab səhifələrində"

"Bakı - İslam mədəniyyətinin paytaxtı - 2009" tədbirləri çərçivəsində İqtisadi Əməkdaşlıq Təşkilatına (EKO) üzv ölkələrin milli kitabxanalarının direktorlar şurasının II konfransı dünən öz işinə başladı. Mədəniyyət və Turizm Nazirliyi və M.F.Axundov adına Azərbaycan Milli Kitabxanası tərəfindən təşkil olunmuş konfrans Türkiyə, İran, Pakistan, Türkmənistan, Tacikistan, Özbəkistan, Qırğızıstan və Qazaxıstanın milli kitabxana direktorlarının və EKO-nun Mədəniyyət İnstitutunun nümayəndələrinin iştirakı ilə keçirilir. Konfrans öz işinə başlamazdan öncə kitabxananın salonlarından birində "İslam mədəniyyəti kitab səhifələrində" adlı beynəlxalq sərginin açılış mərasimi keçirildi. Sərginin ekspozisiyasında hər bir ölkənin milli kitabxana fondundan 40-50 ədəd kitab görmək mümkündür. Bu nəşrlərin əksəriyyəti sərgi başa çatandan sonra Azərbaycan Milli Kitabxanasına hədiyyə olunacaq. Konfransın açılışında çıxış edən mədəniyyət və turizm naziri Əbülfəz Qarayev bildirdi ki, Bakının İslam mədəniyyətinin paytaxtı elan edilməsi ilə əlaqədar keçirilən növbəti tədbirin kitabla bağlı olması islam aləmində elmin daşıyıcısı olan kitablara nə qədər böyük əhəmiyyət verildiyinin göstəricisidir.

Bu gün konfrans öz işini davam etdirərək EKO-ya üzv ölkələrin milli kitabxanalarının Direktorlar Şurasının vahid portalının yaradılması, türk xalqlarının görkəmli şəxsiyyətlərinin yubileylərinin islam dünyasında qeyd olunması və s. məsələləri müzakirəyə çıxaracaq.

Samirə

Həftə içi.- 2009.- 21 aprel.- S.- 5.