Fərdi uçot sistemində 6943 əcnəbi uçota alınıb

Onların arasında Türkiyə vətəndaşları çoxluq təşkil edir

Dövlət Sosial Müdafiə Fondunda (DSMF) fərdi uçot sistemində uçota alınan əcnəbilərin sayı 6943 nəfərə çatıb. DSMF-dən "Həftə içi"nə verilən məlumata görə, hazırda fərdi uçot sistemində 82 ölkədən 6943 nəfər xarici vətəndaş uçotdadır.

Onların arasında Türkiyə vətəndaşları çoxluq təşkil edir - 3953 nəfər. Növbəti yerdə isə Gürcüstan vətəndaşları gəlir və fərdi uçot sistemində uçota alınan qonşu dövlətin vətəndaşlarının sayı 1085 nəfərdən ibarətdir. Azərbaycanın fərdi uçot sistemində uçota alınan vətəndaşların sayına görə üçüncü yerdə 496 nəfərlə Rusiya Federasiyası qərarlaşıb. Sonrakı yerlərdə İran İslam Respublikası (215 nəfər), Hindistan (172), Çin Xalq Respublikası (80), Ukrayna (68), Pakistan İslam Respublikası (64), Malayziya (63), Böyük Britaniya və Şimali İrlandiya Krallığı (63) və sair ölkələr gəlir.

Fonddan bildirilib ki, ölkəmizdə məcburi dövlət sosial sığortası sahəsində fərdi uçotun tətbiqi Azərbaycan vətəndaşları ilə yanaşı, ölkənin mənbələrindən əmək ödənişi və məcburi dövlət sosial sığorta haqqına cəlb olunan digər gəlirləri əldə edən əcnəbilərin də məcburi dövlət sosial sığortasına cəlbi zərurətini ortaya qoyub. Bu zərurət beynəlxalq təcrübədən irəli gəlir.

Xatırladaq ki, hələ 2005-ci ilin 7 - 9 sentyabr tarixlərində Beynəlxalq Sosial Təminat Assosiasiyasının, Beynəlxalq Pensiya və Sosial Fondları Assosiasiyasının və digər beynəlxalq təşkilatların təşkilatçılığı ilə Bakı şəhərində "Qloballaşma və əmək miqrantlarının sosial müdafiəsi" mövzusunda keçirilən beynəlxalq konfransda bütün bunlar müzakirə obyekti kimi seçilib. Konfransın yekun sənədi kimi qəbul olunmuş Bakı bəyannaməsində əcnəbilərin məcburi dövlət sosial sığortasına cəlbi ilə bağlı birmənalı tövsiyələr öz əksini tapmışdı. Bütün bunlar nəzərə alınaraq "Sosial sığorta haqqında" qanuna müvafiq dəyişikliklər edilib və 2006-cı il yanvarın 1-dən Azərbaycan Respublikası mənbələrindən əmək ödənişi və məcburi dövlət sosial sığorta haqqına cəlb olunan digər gəlirləri əldə edən əcnəbilərin məcburi dövlət sosial sığortası ilə əhatələnməsinə başlanılıb.

Naibə

Həftə içi.- 2009.- 21 aprel.- S. 5.