"Azərbaycanda böyük irəliləyişlər gördük"

Sultan Səid Əlmənsuri: "Əsas məqsədimiz iqtisadi münasibətlərimizi daha da genişləndirməkdir"

Azərbaycanda səfərdə olan Birləşmiş Ərəb Əmirliklərinin (BƏƏ) iqtisadiyyat və nəqliyyat naziri Sultan Səid Əlmənsuri dünən ulu öndər Heydər Əliyevin Fəxri xiyabanda məzarını ziyarət etdikdən sonra səfərinin mahiyyəti ilə bağlı jurnalistlərin suallarını cavablandırdı. Nazir ilk olaraq səfərləri çərçivəsində onlara ölkə prezidenti İlham Əliyev tərəfindən göstərilən böyük qonaqpərvərliyə görə təşəkkür etdi: "Biz Bakıda gördüklərimizdən çox razıyıq. Azərbaycanla Birləşmiş Ərəb Əmirlikləri arasındakı münasibətlərin həddən artıq yüksək səviyyədə olduğunu da qeyd etməliyəm. Bizim əsas məqsədimiz mövcud olan iqtisadi münasibətlərimizi fərqli, daha da geniş bir müstəvidə genişləndirməkdir".

Onun sözlərinə görə, ölkə başçısı ilə görüşdə də əməkdaşlıq sahələrini müzakirə ediblər və əsasən sərmayə qoyulacaq sahələr haqqında fikir mübadiləsi aparılıb: "Xüsusilə bu əməkdaşlıq sahələrinə neft-qaz, turizm, aviasiya, eyni zamanda nəqliyyat və avtomagistral yolları daxildir. Ən mühüm məsələlərdən biri də əsas məqsəd və hədəflərə, nəticələrə istiqamətlənən birgə əməkdaşlıq sahələrimizin fəallaşdırılmasıdır". Sonra S.S.Əlmənsuri vurğuladı ki, iki ölkə arasında fiziki məsafə təyyarə ilə cəmi 2 saat yarımdır: "Və biz Azərbaycanla qəlbən, ruhən yaxınıq. Bu yaxınlığımızı nəzərə alaraq iki ölkə arasında mövcud olan əməkdaşlığımızı daha da genişləndirməli və gücləndirməliyik. Əmin etmək istəyirəm ki, bundan sonra birgə əməkdaşlıq komitəsi çərçivəsində iki ölkə arasındakı iqtisadi əlaqələr tam fərqli bir müstəvidə cərəyan edəcək".

Azərbaycan nəqliyyat nazirinin müavini Musa Pənahov isə səfər çərçivəsində BƏƏ ilə Azərbaycanın Nəqliyyat Nazirliyi arasında birgə bu və ya digər sənədlərin imzalanıb-imzalanmayacağına toxundu. M.Pənahovun sözlərinə görə, qonaq nazirlə nəqliyyat sahəsində əməkdaşlığın istiqamətlərini müzakirə edəcəklər: "Əsasən bu müzakirələr nəqliyyatın bütün sahələrini əhatələyəcək. BƏƏ ilə həm yeni avtomobil yollarının qurulmasını, eyni zamanda investisiya imkanlarını müzakirə edəcəyik. Bundan başqa, avtomobil, dəniz və hava nəqliyyatı sahəsində də müzakirələr aparılacaq. Əsas məqsəd də burda iki ölkə arasında əməkdaşlığı genişləndirmək və bu istiqamətdə səyləri birləşdirərək iki ölkənin iqtisadiyyatını irəli aparmaqdır". M.Pənahov BƏƏ ilə bu səfər çərçivəsində konkret layihənin icrası ilə bağlı hər hansı ilkin protokolun imzalanmayacağını da qeyd etdi. Onun sözlərinə görə, bir sıra istiqamətlərdə hələlik ekspertlər çərçivəsində araşdırmalar aparılır.

Nahid Canbaxışlı

Həftə içi.- 2009.- 23 aprel.- S. 5.