Qafqaz Universitetində növbəti seminar

Dünən Qafqaz Universitetində "Azərbaycan - Koreya müasir münasibətləri və dünya maliyyə böhranı" mövzusunda seminar təşkil olunub.

Konfransda çıxış edən Koreyanın Azərbaycandakı fövqəladə və səlahiyyətli səfiri Lü Kvan Col deyib ki, hazırda dünyada baş verən iqtisadi böhran istisnasız olaraq hər bir dövlətə az və ya çox dərəcədə öz təsirini göstərir: "Bu böhran Koreyanın da iqtisadi inkişafına mənfi təsir göstərib. İstər ümumi daxili məhsul, istərsə də ümumi milli məhsulun istehsalında azalma gözlənilir. Koreya iqtisadiyyatı dünya maliyyə sisteminin tərkib hissəsidir. Son dövrlərdə aparılan islahatlar bu ölkənin iqtisadiyyatının dünya iqtisadiyyatına inteqrasiyasını təmin edib. Belə olduqda dünyada baş verən böhranın Koreyaya da təsir edəcəyi gözlənilir".

Səfirin sözlərinə görə, hazırda dünyanın bütün dövlətləri bu böhrandan qurtulmağın yollarını araşdırırlar. İstər "Böyük səkkizlik", istərsə də bu il Londonda keçirilən "Böyük iyirmilik" sammitində əsas müzakirə mövzusu dünya iqtisadi böhranı olub: "Koreya da "Böyük iyirmilik"ə daxil olan dövlətlərdən biridir və bu böhranın həll edilməsinə çalışılır. Böhranın dəqiq nə vaxt bitəcəyi bilinməsə də, mən əminəm böhrandan sonra dünya iqtisadiyyatı daha da inkişaf edəcək. Hesab edirəm ki, böhrandan sonra Koreya iqtisadiyyatında illik 4 faiz artım müşahidə ediləcək". Koreya - Azərbaycan münasibətlərinə də toxunan səfir qeyd edib ki, hər iki ölkə arasında təhsil, səhiyyə, mədəniyyət və digər sahələr üzrə əməkdaşlıq əlaqələri mövcuddur. Koreya Azərbaycanda qeyri-neft sektoru ilə yanaşı, enerji sektoruna da böyük maraq göstərir. Bu yaxınlarda Koreyanın şirkətlərindən biri "İnam" yatağında kəşfiyyat işləri aparıb, amma təəssüf ki, müvəffəqiyyət qazana bilməyib: "Amma biz ruhdan düşmürük. Azərbaycanla enerji sahəsində əməkdaşlıq etməkdə qərarlıyıq. Bundan başqa, qeyd etmək istəyirəm ki, Koreya heç bir karbohidrogen ehtiyatlarına sahib olmasa da, çox böyük neft anbarlarına malikdir. Azərbaycan istərsə, neft bu qədər ucuz olduğu vaxtda öz ehtiyatlarını bizim anbarlarda saxlaya bilər və daha sonra neftin qiyməti artdıqda bu ehtiyatları Asiya bazarına çıxarar". Tədbirin sonunda Qafqaz Universitetinin rektoru, professor Ahmet Saniç qonağa fəxri plaketini təqdim etdi.

Bəhruz

Həftə içi.- 25-27 aprel.- S. 5.