Almaniya təcrübəsi öyrənilir

Dövlət müəssisələrinin restrukturizasiyası ilə bağlı

Dünən bu məqsədlə Bakıda Almaniya Texniki Əməkdaşlıq Cəmiyyətinin (GTZ) dəstəyi ilə dövlət müəssisələrinin restrukturizasiyasında Almaniya təcrübəsi mövzusunda seminar keçirilib. Seminarda komitənin mərkəzi aparatının və ərazi şöbələrinin işçiləri, eləcə də almaniyalı ekspertlər iştirak ediblər. Tədbir çərçivəsində iqtisadiyyatın müxtəlif sahələrinə aid müəssisələrin restrukturizasiyası mexanizmləri və istiqamətləri, bu sahədə görülən tədbirlərlə bağlı Almaniya təcrübəsi öyrənilib.

Seminarda çıxış edən Dövlət Əmlakının İdarə Edilməsi üzrə Dövlət Komitəsi (DƏİEDK) sədrinin müavini Rüstəm Şahbazov bildirib ki, komitə tərəfindən dövlət müəssisələrinin özəlləşdirməqabağı restrukturizasiyası və sağlamlaşdırılması, habelə özəlləşdirilən müəssisələrin dəstəklənməsi tədbirlərinin daha da təkmilləşdirilməsi məqsədilə inkişaf etmiş ölkələrin təcrübələrinin öyrənilməsi, bu sahədə təcrübə mübadiləsinin aparılması və beynəlxalq qurumlarla əməkdaşlıq sahəsində həyata keçirilən işlər davam etdirilir. Qurumda dövlət müəssisələrinin və infrastruktur sahələrinin restrukturizasiyasında beynəlxalq təcrübənin öyrənilməsinə xüsusi önəm verilir. Bu məqsədlə komitə tərəfindən ötən il ərzində bir çox Avropa ölkələrinin dövlət müəssisələrinin restrukturizasiya təcrübəsinin mənimsənilməsi ilə bağlı müvafiq tədbirlər keçirilib. Həmin sahədə praktik biliklərə yiyələnmək və təcrübə mübadiləsinin həyata keçirilməsi məqsədilə bir sıra xarici dövlətlərə səfərlər də təşkil edilib. Bildirilib ki, GTZ-nin dəstəyi ilə ötən il ərzində qiymətləndirmə, özəlləşdirmənin metod və alətləri, keçid iqtisadiyyatı dövlətlərində özəlləşdirmə, inkişaf etmiş ölkələrin özəlləşdirmə təcrübəsi, müəssisələrin restrukturizasiyası sahəsində beynəlxalq təcrübə mövzularında Bakı şəhərində və digər regionlarda seminar və treninqlər keçirilib. Bu il də dövlət müəssisələrinin idarə edilməsi, restrukturizasiyası və sağlamlaşdırılması sahəsində beynəlxalq praktikanın öyrənilməsi və tətbiqi ilə bağlı bir sıra müxtəlif tədbirlərin görülməsi nəzərdə tutulub. Restrukturizasiya və sağlamlaşdırma tədbirlərinin həyata keçirilməsində əsas məqsəd dövlət müəssisələrinin özəlləşdirilməyə hazırlanması, onların investorlar üçün cəlbediciliyinin artırılması, istehsal olunan məhsulların rəqabət qabiliyyətinin yüksəldilməsindən ibarətdir. DƏİEDK tərəfindən müəssisələrin restrukturizasiyası və sağlamlaşdırılması tədbirlərinin hazırlanması, həyata keçirilməsinə metodik və məsləhət yönümlü kömək göstərilir. 2008-ci ildə qurum tərəfindən özəlləşdirməyə açılmış bir sıra müəssisələrə özəlləşdirməqabağı restrukturizasiya və sağlamlaşdırma proqramlarının hazırlanması ilə bağlı informasiya və məsləhət yönümlü tədbirlər həyata keçirilib. Seminarda GTZ-nin layihə rəhbəri Vulf Şmider və ekspert Verner Şeyntse Almaniyanın dövlət müəssisələrində, o cümlədən infrastruktur sahələrdə həyata keçirilən restrukturizasiya və sağlamlaşdırma tədbirləri, müəssisələrin müasir bazar iqtisadiyyatı prinsipləri və tələblərinə uyğunlaşdırılması, eləcə də digər məsələlərlə bağlı iştirakçılara məlumat veriblər. Qeyd edilib ki, Almaniyanın bu sahədə əldə etdiyi təcrübə müəssisələrin fəaliyyətinin dirçəldilməsi, ölkənin sənaye potensialının artırılması, məşğulluğun təmin edilməsi və digər sosial yönümlü məsələlərin həllinə təkan baxımından əhəmiyyətli rol oynayır. Tədbirin sonunda seminar iştirakçılarına sertifikatlar verilib.

Sevil

Həftə içi.- 2009.- 24 aprel.- S. 5.