"Ümummilli lider Heydər Əliyevi düşünərkən"

Ulu öndərin anadan olmasının 86-cı ildönümünə həsr edilən inşa müsabiqəsinin yekun mərhələsi keçirilib

Akademik Zərifə Əliyeva adına məktəbdə ümummilli liderimiz Heydər Əliyevin anadan olmasının 86-cı ildönümünə həsr olunan "Ümummilli lider Heydər Əliyevi düşünərkən" adlı inşa müsabiqəsinin yekun mərhələsi keçirilib.

Yeni Azərbaycan Partiyası (YAP), Təhsil Nazirliyi və Azərbaycan Həmkarlar İttifaqları Konfederasiyasının birgə təşkilatçılığı ilə keçirilən tədbirdə çıxış edən təhsil naziri Misir Mərdanov deyib ki, şəhər, rayon mərhələsindən yekun tura hər rayondan 1 nəfər seçilib. Yekun mərhələsində 7 - 11-ci sinif şagirdlərindən ibarət 89 şagird iştirak edir. Bunlar bütün bölgələri, eyni zamanda, nazirliyin tabeliyindəki bütün ümumtəhsil məktəblərini əhatə edir. Yalnız Naxçıvan Muxtar Respublikası bu müsabiqəni ayrıca keçirir. Onlar da bu müsabiqənin qaliblərini eyni qayda ilə mükafatlandıracaqlar: "İştirakçılara mövzular veriləcək və o mövzu ətrafında inşalar yazılacaq. Bir neçə gün ərzində nazirlikdə yaranan ekspert qrupu onların yazılarını qiymətləndirəcək. Ən yaxşı yazılar mükafatlandırılacaq və ümummilli lider Heydər Əliyevin doğum gününə qədər mükafatlandırma tədbiri keçiriləcək. Bütün yazılar kitab şəklində hazırlanaraq qaliblərin hər birinə təqdim olunacaq".

Nazirin sözlərinə görə, şagirdlərin bu müsabiqəyə marağı və həvəsi ilbəil artır: "Tədbirin Zərifə Əliyevanın adını daşıyan məktəbdə keçirilməsi də rəmzi məna daşıyır. Çünki Heydər Əliyevin həyatında onun sadiq həyat yoldaşının böyük rolu olub. Builki müsabiqədə digər illərdən fərqli olaraq şagirdlər və tədbir iştirakçıları üçün xüsusi döş nişanları hazırlanıb. Qızlar və oğlanlar üçün dəftərlər xüsusi qaydada çap olunub". M.Mərdanov qeyd edib ki, bu tədbirlər hər il davamlı olaraq təşkil olunacaq.

YAP-ın icra katibi Əli Əhmədov isə bildirib ki, Heydər Əliyev müstəqil Azərbaycan dövlətinin qurulması üçün etibarlı bazanın yaradılması, dövlət müstəqilliyinin möhkəmləndirilməsi və qorunub-saxlanılması üçün ciddi işlər görüb. Heydər Əliyevin hakimiyyəti illərində digər sahələrlə yanaşı, təhsil sahəsi də sürətlə inkişaf etməyə başlayıb. Bu sahənin inkişafına xidmət edən proqramlar qəbul edilib, müəllim hazırlığının təkmilləşdirilməsi istiqamətində müəyyən işlər görülüb. Paytaxtda və bölgələrdə bir-birinin ardınca məktəblər, əlavə korpuslar tikilib, bəzi müəssisələrdə təmir-bərpa işləri aparılıb. Ə.Əhmədovun sözlərinə görə, Heydər Əliyevin təhsil sahəsinə göstərdiyi diqqət və qayğı sayəsində təhsilin ayrı-ayrı pillələrinin geniş şəbəkəsi yaradılıb, dövlət büdcəsindən təhsilə ayrılan vəsaitin məbləği artırılıb, müəllimlərin əməkhaqları yüksəldilib: "Heydər Əliyev ölkənin uğurlu gələcəyini təhsildə, müasir standartlara uyğun səviyyədə təhsil alan gənclərdə görürdü. O, daim gəncləri diqqət mərkəzində saxlayır və onların xarici ölkələrin nüfuzlu universitetlərində təhsil alması üçün dövlət tərəfindən vəsait ayırırdı. Heydər Əliyev hakimiyyətdə olduğu illərdə daim təhsil sahəsinə xüsusi diqqət yetirib. Onun tərəfindən təməli qoyulan ənənə bu gün də uğurla davam etdirilir".

Naibə

Həftə içi.- 2009.- 28 aprel.- S. 6.