"Azercell" qeyri-neft sektorunun ən böyük vergi ödəyicisidir

Ali Ağan: "Dünyadakı böhran və Azərbaycanda güclənən rəqabət fonunda biz uğurlu performans göstərdik"

Azərbaycanın aparıcı mobil rabitə operatoru olan "Azercell Telekom" MMC 2008-ci ildəki fəaliyyətinin nəticələrini açıqladı.

İlin yekunlarına dair mətbuat konfransı "Park İNN" mehmanxanasında, bu ilin başlangıcında "Azercell Telekom" MMC-nin prezidenti təyin olunmuş Əli Ağanın iştirakı ilə keçirildi.

İş dünyası tarixinin ən çətin illərindən biri olan 2008-ci ilin performansından çox məmnun olduğunu bildirən Əli Ağan çıxışı zamanı "Azercell"in 2008-ci ildə gördüyü işlər, bazara təqdim etdiyi məhsul və xidmətlər, əldə etdiyi nailiyyətlər barədə ətraflı məlumat verdi.

2008-ci il ərzində Azərbaycanda telekommunikasiyanın inkişafına təqribən 72,1 milyon dollar sərmayə yatırdıqlarını deyən "Azercell" rəhbəri ölkəmizdəki 13 illik fəaliyyəti ərzində isə ümumi yatırımlarının həcminin 1 milyard dollara yaxın olduğunu qeyd etdi: "Azercell" ölkənin qeyri-neft sektorunun ən böyük investoru olaraq qalır. Biz eyni zamanda qeyri-neft sektorunun ən böyük vergi ödəyicisiyik. 2008-ci ildə ödədiyimiz vergilər qeyri-neft sektorunun ödədiyi vergilərin 10%-ni təşkil edir. Ümumilikdə isə bizim vergilər Azərbaycan büdcəsinin 2%-nə bərabərdir".

2008-ci ildə "Azercell Telekom" MMC dövlət büdcəsinə təqribən 163 milyon, 13 il ərzində isə təqribən 603 milyon ABŞ dolları həcmində vəsait ödəyib. Azərbaycanın mobil rabitə bazarının 60%-nin "Azercell"ə məxsus olduğunu da həmçinin yurnalistlərin nəzərinə çatdıran Əli Ağan bildirdi ki, rəhbərlik etdiyi şirkətin şəbəkəsi ölkə ərazisinin 80%-ni əhatə edir ki, bu da Azərbaycan əhalisinin 99,6%-nin "Azercell" xidmətlərindən istifadə edə bilməsi deməkdir.

İnsan qaynaqları aspektinə toxunan "Azercell" prezidenti işçilərinin əhəmiyyətini xüsusi olaraq önə çəkdi: "Bizim Azərbaycana yatıra biləcəyimiz ən yaxşı sərmayə insan qaynaqlarına yatırdığımız sərmayədir. Mən həmişə bildirmişəm ki, bizim uğurumuzun əsas səbəblərindən biri əməkdaşlarımızdır və onlar "Azercell"in əsas kapitalıdır. Buna görə də 2008-ci ildə "Azercell" olaraq biz öz işçilərimizin inkişafına təxminən 2,3 milyon ABŞ dolları həcmində sərmayə yatırmışıq, onları xaricdə müxtəlif treninqlərə göndərmişik. Məhz bunun nəticəsidir ki, karyerasını "Azercell"də başlayan bir çox menecerlərimiz İsveçdən tutmuş Özbəkistana qədər bir çox ölkələrin mobil rabitə şirkətlərində yüksək vəzifələrdə çalışırlar".

Şirkət rəhbəri "Azercell" şəbəkəsinin genişlənməsi barədə məlumat verərək şirkətin eyni zamanda yüksək texnoloyi telekommunikasiya infrastrukturuna malik olduğunu vurğuladı: "Ümumən Azərbaycan mobil rabitə bazarının inkişaf templərinin azaldığı bir dövrdə bizim satışlarımızın həcmi artdı. Hazırda bizim abonentlərimizin sayı 3 milyon 600 min nəfərdən çoxdur. Biz ciddi rəqabət ortamında durmadan böyüyürük və abonentlərimizin sayı bu inkişafın bariz nümunəsidir. Əminəm ki, abonentlərimizin sayı bundan sonra da artacaq. Çünki məhz "Azercell" ölkədə ən keyfiyyətli rabitəni təqdim edir", - deyə Əli Ağan qeyd etdi. O, "Azercell"in sosial fəaliyyətinə dair məlumat verərək ötən il şirkətin Azərbaycanda sosial layihələrin həyata keçirilməsi üçün 2,5 milyon ABŞ dolları, 10 il ərzində isə 11,5 milyon ABŞ dolları həcmində vəsait sərf edib. Şirkət eyni zamanda Azərbaycanda peşəkar yurnalistikanın inkişafına yönəlmiş inkişafı paylaşmaq platforması çərçivəsində bir çox layihələr həyata keçirib.

Sevda Babayeva

Həftə içi.- 2009.- 28 aprel.- S. 6.