"Uçqun" festivaldan qayıdıb

Xəbər verdiyimiz kimi, Akademik Milli Dram Teatrı 14 - 24 aprel tarixlərində Türkiyə Respublikasının Konya şəhərində keçirilən nüfuzlu "Min nəfəs - bir səs" II Beynəlxalq Türkdilli Teatrların Festivalına dəvət almışdı. 2009-cu il aprelin 23-də türk dramaturqu Tuncer Cücenoğlunun "Uçqun" əsəri əsasında quruluşçu rejissor Bəhram Osmanov tərəfindən hazırlanmış tamaşa teatrımız tərəfindən böyük uğurla nümayiş etdirilib. "Festivalın yaraşığı" kimi dəyərləndirilən bu tamaşa həm türk teatrsevərləri, həm də festivalın çoxsaylı xarici iştirakçıları tərəfindən yüksək qiymətləndirilib. Tamaşadan sonra çıxış edən Konya Dövlət Teatrının bədii rəhbəri Tomris Çetinel, "TÜRKSOY" beynəlxalq təşkilatının Azərbaycan üzrə təmsilçisi Elçin Qafarlı və "Azdrama"nın direktoru Maqbet Bünyadov festival və tamaşa haqqında təəssüratlarını bildiriblər. Türkiyə Dövlət Teatrı üzrə baş müdir Lemi Bilgin teatrımızı xüsusi diplomla təltif edib, 2010-cu ildə keçiriləcək "Min nəfəs - bir səs" III Beynəlxalq Türkdilli Teatrların Festivalına rəsmi surətdə dəvət edib. Teatrın mətbuat xidmətindən aldığımız məlumata görə, truppanın festivalda iştirak etdiyi müddətdə bir sıra faydalı və perspektivli görüşlər keçirilib. Teatrın direktoru Maqbet Bünyadov Konya Dövlət Dram Teatrı ilə teatrımız arasında qarşılıqlı yaradıcılıq işləri, Şimali Kipr Dövlət Dram Teatrının baş müdiri Derman Anık ilə qarşılıqlı dostluq əlaqələrinin qurulması barədə razılıq əldə edib və teatrımız 2009-cu ilin sentyabr ayında Şimali Kipr Teatr Festivalına dəvət olunub.

Samirə

Mədəniyyət.- 2009.- 30 aprel.- S. 7.