"Ermənistan heç tənqid də olunmadı"

Səməd Seyidov: "Biz məntiqə sığmayan münasibət və həqiqətləri görürük"

"Azərbaycan uzun illərdir Avropa Şurasında çox aktiv və konstruktiv fəaliyyət göstərir. Biz üzərimizə düşən öhdəlikləri vaxtında və dəqiq yerinə yetirməklə qurum qarşısında həmişə hesabat vermişik" - bu fikirləri dünən Azərbaycanın Avropa Şurası Parlament Assambleyasındakı (AŞ PA) nümayəndə heyətinin rəhbəri, millət vəkili Səməd Seyidov qurumun bir neçə gün əvvəl başa çatan qış sessiyasının yekunlarına münasibət bildirərkən səsləndirdi.

Onun sözlərinə görə, AŞ-də heç kim Azərbaycanın öhdəliklərini tam şəkildə yerinə yetirməməklə problemlər yaratdığını söyləyə bilməz. S.Seyidov vurğuladı ki, yerinə yetirilməyən öhdəlik alternativ xidmətin qəbuludur. Bu da Avropa Şurasının ekspertləri ilə birgə işlənilib. Lakin bunun yerinə yetirilməməsinə səbəb olan Azərbaycan Ermənistanla müharibə vəziyyətində yaşaması kimi mövcud reallıqlar var: "Lakin Azərbaycan Avropa Şurası ilə münasibətlərini yüksək səviyyədə təşkil etməklə, məsuliyyətini anlamaqla yanaşı, qarşı tərəfdən də bu cür münasibət gözləyir. Lakin biz tamamilə başqa, heç bir normal məntiqə sığmayan münasibət və həqiqətləri görürük". Onun sözlərinə görə, Azərbaycanda keçirilən son seçkilərin hamı tərəfindən demokratik və Avropa dəyərlərinə uyğun seçkilər kimi qiymətləndirilməsi heç kimə sirr deyil. Bu, Azərbaycan iqtidarının, vətəndaşlarının yox, Avropanı təmsil edən siyasətçilər və millət vəkillərinin sözləridir. Britaniyada hamı tərəfindən hörmət edilən lord Donelson da bu seçkilərin Avropada ən yaxşı təkil olunmuş seçkilər kimi qiymətləndirilməsinin vacibliyini vurğulayıb: "Nə üçün bu şəkildə qiymətləndirilən ölkə, niyə siyasi məhbuslar, insanları öldürmək, bütün mətbuatı, hətta interneti bağlamaq, QHT-lərin inkişafına şərait yaratmamaq, ölkədən kənara buraxmamaq kimi problemləri olan dövlətlərlə bir sıraya qoyulur? Bu, qeyri-obyektiv və dözülməz bir münasibətdir. AŞ-nin son iclasında Ermənistan məsələsi müzakirə olundu. Biz gözləyirdik Ermənistana dəstək göstəriləcəyi halda belə, ən azından onu tənqid etsinlər. Səsvermə hüququ alınmırsa, Ermənistanda gedən proseslərə göz yumulursa, yuxarı başa oturdulursa, ən azından görüntü üçün, hansısa prosesləri düzgün şəkildə şərh etmək imkanı qalsın deyə, İrəvan tənqid olunmalıydı. Lakin 100-dən çox insanın cəza çəkməsi, 12 nəfərin vəhşicəsinə öldürülməsi, QHT təmsilçilərinin Monitorinq Komitəsinin qapılarından qovulmasının heç biri deyilmədi. Ermənistanın səsvermə hüququnun əlindən alınmasına da güclərinin yetmədikləri etiraf edilmədi". S.Seyidov onu da bildirdi ki, Azərbaycanın uğurları ilə Ermənistanın mənfi cəhətlərini görmədən iki dövləti eyniləşdirmək ikili standartlardır. Onun sözlərinə görə, Avropa Şurası bununla da dayanmayıb. Ermənistanın başını sığallamaq, Azərbaycanın uğurlarını görməməklə yanaşı, burada problemlər axtarıb tapır və süni şəkildə hər iki ölkəni eyniləşdirmək siyasəti aparır: "Azərbaycanda yenidən siyasi məhbus məsələsini gündəmə gətirməyə çalışırlar. Ermənistanda isə bir dənə də olsun siyasi məhbus görmürlər. Bu ölkə ilə bağlı qəbul edilən sənədlərdə də siyasi məhbus yox, azadlıqdan məhrum edilmiş insanların problemi ifadələri əksini tapıb". Lakin nümayəndə heyəti dövlətin mövqeyini çatdıraraq vurğulayıb ki, əgər bu proses olsa, Azərbaycan bu təşkilatla münasibətini dəyişdirməlidir və dəyişdirəcək: "Azərbaycanın gördüyü işlər yalnız bir təşkilatın prezumpsiyasında ola bilməz. Hər hansı bir təşkilat dövlətdə gedən prosesləri obyektiv qiymətləndirməlidir". Nümayəndə heyətinin rəhbəri həmçinin dedi ki, bölgədəki problemlərlə bağlı Azərbaycanı süni şəkildə cəzalandırmaq, ona Ermənistan və Gürcüstanla birgə eyni baxışla baxmaq qeyri-obyektiv bir mövqedir. S.Seyidov AŞ PA-da bəzi deputatların mövqeləri Azərbaycandakı reallıqları görməməkdən ibarət olduğunu dedi. Onun sözlərinə görə, AŞ-dəki proseslər tək demokratik inkişafla bağlı deyil. Bu proseslər həm də Azərbaycana hansısa səviyyədə təzyiq göstərmək, onu tutduğu yoldan daşındırmaq fəlsəfəsini daşıyan siyasətdir. Ona görə də bu dərk olunmalıdır ki, Azərbaycan inkişaf etdikcə AŞ-dəki bəzi deputatlar tərəfindən tənqidlər səsləndiriləcək. S.Seyidov xarici radioların bağlanması və referendumla bağlı aparılan danışıqlara da toxundu. Dedi ki, bu addımların AŞ-nin ekspertləri ilə birgə hazırlanmış qanunlar əsasında həyata keçirildiyini onlara çatdırıblar. Belə şəraitdə AŞ-nin tənqidlərini eşitmək isə qəribədir: "Referendumla bağlı ənənəvi olaraq oraya qeyri-obyektiv məlumatlar gedib. AŞ Azərbaycanda bu prosesi izləyəcək. Lakin Azərbaycanda keçirilən referendum xalqa müraciətdir. Ən demokratik formadır. Heç kəs xalqla məsləhətləşmək məsələsini şübhə altında qoya bilməz". S.Seyidov AŞ ilə əməkdaşlığın davamlı olmasını da istədi.

Azad Əliyev

Həftə içi.- 2009.- 3 fevral.- S. 4.