Sığortaçılar böhran yaşamır...

Deyilənə görə, onlar sərfəli manevr edirlər

Qısamüddətli böhranlar şirkətlərə mənfi təsir göstərə bilməz. Çünki şirkətlər öz hesablarına yaşamaq iqtidarındadırlar. Öz işini normal quran şirkətin heç bir qorxusu yoxdur

Dünyada baş verən maliyyə böhranı ölkənin sığorta şirkətlərinə köklü şəkildə təsir göstərməsə də, bəzi şirkətlərə müəyyən mənada zərər vurub.

"MBASK"ın rəhbəri Cəmil Məlikovun verdiyi məlumata əsasən, şirkətin biznesinin böyük bir hissəsi bank sektoru ilə bağlı idi. Ona görə də maliyyə böhranı, müəyyən mənada da olsa, mənfi təsirini göstərməkdədir: "Ümumiyyətlə, bank sektoru ilə əlaqələri olan sığorta şirkətlərinin hamısı problemlər yaşayır. Ancaq bir sıra digər üsullardan istifadə etməklə zərərin qarşısını almışıq və bank sektoru ilə biznes əlaqələrinə son qoymuşuq. Qeyd edim ki, Azərbaycanda sığortanın əsas sektoru avtomobil, səhiyyə və daşınmaz əmlak hesab edilir. Bu gün daha çox sığortalanan isə avtomobillərdir. Lakin son vaxtlar avtomobillərin alınmasında kreditlərə üstünlük verildiyindən bu sığorta növündə banklar əsas rol oynayır. Maliyyə böhranı ilə əlaqədar avtomobillərə ayrılan kreditlər dayandırılıb və bütün bu amillər sığortalanmanın bu sahəsinə birbaşa təsir göstərib".

Mütəxəssis ölkədəki həyat sığortalanmasına da öz münasibətini bildirdi: "Ölkədə həyat sığortası cəmi 0,6 faiz təşkil edir. Yəni ümumilikdə sığorta biznesinə daxil olan 180 milyon manatın cəmi 1 milyonu bu sığortanın payına düşür. Ona görə də ölkədə bu sığortanın olmasından danışmaq hələ tezdir. Hesab edirəm bu sahənin inkişafı üçün ciddi tədbirlər görülməsinə ehtiyac var. Ümumiyyətlə, böhran dövründə hələ ki heç bir şirkət fəaliyyətini dayandırmayıb. Qeyd edim ki, qısamüddətli böhranlar şirkətlərə mənfi təsir göstərə bilməz. Çünki şirkətlər öz hesablarına yaşamaq iqtidarındadırlar. Öz işini normal quran şirkətin heç bir qorxusu yoxdur. Ancaq bizdə olan məlumata görə, bəzi şirkətlər işçilərini işdən çıxarıb və ya qeyri-müəyyən müddətlik istirahətə göndərib. Onu da deyim ki, maliyyə böhranı dövründə şirkətlər elə xidmətlər göstərməlidirlər ki, onlara olan maraq azalmasın. Biz də öz işimizi bu istiqamətdə davam etdiririk. Məsələn, elə sığorta paketləri hazırlanır ki, onlar əhalinin bütün təbəqələrinin marağına səbəb ola bilsin. Eyni zamanda onların qiyməti də əvvəlkilərlə müqayisədə xeyli aşağı olacaq".

C.Məlikov yeni sığorta paketi ilə bağlı da məlumat verdi: "MBASK" sığorta şirkəti "Sərfəli sığorta" proqramı çərçivəsində müştərilər üçün "Rahat" və "Dəyər" adlı təkliflər paketləri hazırlayıb. Bu xidmətlər Azərbaycan sığorta bazarında ilk dəfə tətbiq olunur. Həmin paketlər vasitəsilə müştərilər cəmi 50 manata və ya 150 manata avtomobil və mənzilini birlikdə sığortalaya bilərlər".

Mirvari

Həftə içi.- 2009.- 26 fevral.- S. 5.