"Əsas məqsədimiz milliyə oyunçu hazırlamaqdır!"

FUTBOL üzrə milli komandanın baş məşqçisi Berti Foqtsun üç klubun çalışdırıcısı - Qurban Qurbanov ("Qarabağ"), Valentin Xodukin ("İnter") və Cokiça Hacıyevski ("Bakı") ilə görüş keçirməsi barədə xəbərdən sonra ölkə mətbuatında belə bir informasiya çıxdı ki, görüşə dəvət almayan "Simurq"un baş məşqçisi Roman Pokora dəvətlilər sırasında olmadığı üçün hiddətlənib və Zaqatala təmsilçisinin futbolçularını yığmanın Frankfurtda təşkil olunacaq təlim-məşq toplanışına buraxmayacaq. Məlumatın nə dərəcədə həqiqətə uyğun olmasını araşdırmaq üçün "Simurq"un əsas söz sahibi - klubun prezidenti Zaur Məmmədovun mövqeyini öyrəndik. Livesport.az saytına verdiyi müsahibədə "Simurq"un prezidenti bunları söylədi: "Biz hamımız bir məqsəd güdürük: Azərbaycan futbolunu inkişaf etdirmək. AFFA Berti Foqtsu millinin baş məşqçisi təyin edib. Foqts da yığmamızın uğur qazanması üçün bacarığını ortaya qoyur. Millinin istənilən toplanışına nəinki "Simurq", istənilən Azərbaycan klubu oyunçularını canla-başla buraxacaq. Ölkənin əsas komandasının formasını geyinmək hər bir futbolçu üçün şərəfdir. Biz istəyərdik daha çox sayda futbolçumuz Azərbaycan yığmasının şərəfini qorusun. Axı əsas məqsədimiz milliyə oyunçu hazırlamaqdır! Bir sözlə, millinin istənilən təlim-məşq toplanışı, yoxlama və ya rəsmi görüşünə dəvət alan hər bir oyunçumuz göstərilən tarixdə düşərgədə olacaq".

Həftə içi.- 2009.- 27 fevral.- S. 7.